اق مامىق قار اق كۇمىستەي ىرىس بولدى

  • كەلۋ قاينارى: ىلە گازەتى
  • 03:59:16 11/01/2018

    

    جاڭا جىل كەلىسىمەن جاۋعان قار شينجياڭنىڭ تەرىستىك ءوڭىرىن اق مامىققا ورادى.

    ەلىمىز بويىنشا ايگىلى كورىنىس رايونى، جانعا جايلى جاننات جەر اتالعان قاناستىڭ قىسقى ساياحاتى ساياحاتشىلاردىڭ جاپپاي نازارىن اۋدارۋدا.

    مالشى ساۋلەن قومقاناس موڭعۇل ۇلتتىق اۋىلىنىڭ قوم قىستاعىنداعى سۇلۋ شوقى باۋرايىنان «دينا ساياجايى» اتتى ساياجاي اشقان بولاتىن. بۇرىن بۇل ساياجاي جاز – كۇز ماۋسىمدارىندا عانا اشىلاتىن، قازىر قىستا دا اشىلىپ، ساۋداسى كۇسەتتەنۋدە. 2017 – جىلدىڭ قاراشا ايىنان قازىرگە دەيىن بۇل شاعىن ساياجاي 300 – 400 ساياحاتشى قابىلداپ، 10 مىڭ يۋانعا جۋىق كىرىس كىرگىزگەن. ساۋلەننىڭ ساياجايىنان ساياحاتشىلار قازاقتىڭ اس – سۋىنان ءدام تاتا الادى، ياعني جىلقى ەتى نارىنىن جەپ، قويۋ اق شاي ىشەدى. «ساياحات كاسىبىمەن شۇعىلدانعاننان بەرى كىرىسىمىز 20 مىڭ يۋاننان استى، بۇل جالپى كىرىسىمىزدىڭ جارىمىن ۇستايدى. قازىر قاناستىڭ ساياحاتى جازدا عانا جاندانىپ قالماستان، باسقا ماۋسىمداردا دا ساياحاتشىلاردىڭ اياعى ۇزىلمەيتىن بولدى»، – دەدى ساۋلەن.

    قىسقى ساياحات جىم – جىرتتىققا شومعان قاناستى تاعى دا دۋمانعا بولەۋدە، جەرگىلىكتى ورىنداعى تۇرعىندار وسى ورايدى مىقتى ۇستاپ، قىسقى مالشىلار ساياجايىن اشىپ، ساياحاتشىلارعا ءار ءتۇرلى ۇلتتىق ەرەكشەلىككە يە قىزمەت وتەپ، ۇلتتىق سالت – سانانى تانىستىرۋمەن بىرگە، اق مامىق قار الا كەلگەن بايلىقتان دا يگىلىكتەندىرۋدە.

جاۋاپتى رەداكتور: جازيرا بولاتباي قىزى