قولفونعا بايلاندىڭىز با: ساۋالناماعا قاتىناسقانداردىڭ جارىمىنا جۋىعى جۇبايىنىڭ قولفونعا وتە بەرىلىپ كەتەتىنىن ايتقان

  • كەلۋ قاينارى: حالىق تورابى
  • 09:27:09 11/01/2018

    

    حالىق تورابى، 11 – قاڭتار، بەيجيڭ. جۇڭگو اقپارات اگەنتتىگىنىڭ 10 – قاڭتاردا حابارلاۋىنشا، دەلويت سەرىكتەستىگى جۋىردا بەيجيڭدە «2017 – جىلعى جۇڭگوداعى قولفون تۇتىنۋشىلارى جونىندە تەكسەرۋدى» جاريالاعان، اتالعان تەكسەرۋ مالىمەتىنە قاراعاندا، زەردەلى قولفوننىڭ تۇرمىسىمىزعا ەندەپ كىرۋىنە بايلانىستى كەيبىر تۇتىنۋشىلاردىڭ كوپ ۋاقىتى قولفونعا تەلمىرۋمەن وتەتىن بولعان. ساۋالناماعا قاتىناسقانداردىڭ ىشىندە جارىمىنا جۋىعى جۇبايىنىڭ قولفونعا وتە بەرىلىپ كەتكەنىنە نارازى.


قولفون تۇتىنۋشىلارىنىڭ قولفوننان پايدالانۋ احۋالىن بەينەلەۋ ءۇشىن، اتالعان تەكسەرۋ مالىمەتىندە كۇنىنە قولفونعا 50 رەتتەن ارتىق قارايتىنداردى «اۋىر دارەجەدەگىلەر» دەپ، 50 رەتتەن تومەن قارايتىنداردى «جەڭىل دارەجەدەگىلەر» دەپ بولگەن.


جاس شاماسىنا قاراي بولگەندە، 18 – 24 جاس ارالىعىنداعى تۇتىنۋشىلاردىڭ ىشىندە اۋىر دارەجەدە قولفونعا بايلانعاندار سانى %29 بولعان، 25 – 34 جاس ارالىعىندا بۇل كورسەتكىش %30 بولعان. سالىستىرمالى تۇردە ايتقاندا، 35 – 44 جاس ارالىعىنداعىلاردىڭ قولفونعا اۋىر دارەجەدە بايلانۋ مولشەرى %23 بولعان، 45 – 50 جاس ارالىعىنداعىلاردا بۇل كورسەتكىش تەك %18 بولعان.


اتالعان مالىمەتتە بۇعان مىناداي ساراپتاما جاساعان: جاستاردىڭ «قولفون دەرتىنە» وڭاي شالدىعاتىن سەبەبى ولاردىڭ زەردەلى قولفونمەن ءبارىن تىندىرۋعا بولاتىن داۋىردە تۋعانىنان بولىپ وتىر، جىلجىمالى تەحنيكانىڭ داۋىرىندە تۋعان ۇرپاق قولفونمەن كوڭىل اشۋعا، تۇتىنۋعا، اڭگىمەلەسۋگە ەرەك قۇشتار، مۇنان سىرت، قازىر قىزمەت پەن تۇرمىستاعى بارلىق ىستەردى دەرلىك قولفونمەن تىندىرۋعا بولاتىندىقتان، تۇتىنۋشىلاردىڭ ۇزاق ۋاقىت قولفونعا بايلانۋىنا بۇل دا سەبەپ بولادى.


وتباسىڭىزدىڭ مۇشەلەرى قولفونعا ۇزاق تەلمىرە مە دەگەن ساۋالناماعا، قاتىسۋشىلاردىڭ كوبى ءوزى مەن جۇبايىنىڭ قولفونعا وتە بەرىلىپ كەتەتىنىن ايتقان، بۇل جەكە – جەكە %51 جانە %47تى ۇستاعان، بالاسى مەن اكە – شەشەسى تەلەفونعا وتە بەرىلىپ كەتەدى دەپ قارايتىنداردىڭ سانى از بولعان، بۇل جەكە – جەكە %30 جانە %15 بولعان.


جاۋاپتى رەداكتور: گۇلدەن ماقسات قىزى