ورتالىق اسكەري ىستەر كوميتەتىنىڭ قارۋلى ساقشى بولىمىنە تۋ تاپسىرۋ سالتى بەيجيڭدە وتكىزىلدى

  • كەلۋ قاينارى: ىلە گازەتى
  • 03:05:41 12/01/2018

  

    شي جينپيڭ قارۋلى ساقشى بولىمىنە تۋ تاپسىردى ءارى نۇسقاۋ بەردى

 

    شينحۋا اگەنتتىگىنىڭ 10-قاڭتاردا بەيجيڭنەن بەرگەن حابارى. ورتالىق اسكەري ىستەر كوميتەتىنىڭ قارۋلى ساقشى بولىمىنە تۋ تاپسىرۋ سالتى 10-قاڭتار كۇنى بەيجيڭدەگى 1-تامىز عيماراتىندا وتكىزىلدى. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قارۋلى ساقشى بولىمىنە تۋ تاپسىردى ءارى نۇسقاۋ بەردى.

    تۇستەن بۇرىن ساعات 10دا تۋ تاپسىرۋ سالتى باستالدى، كوماندير - جاۋىنگەرلەر رەتتى ساپ تۇزەدى، بۇكىل زالداعىلار مەملەكەت ءانىن اسقاقتا شىرقادى. قۇرمەت قاراۋىلى قارۋلى ساقشى ءبولىمىنىڭ تۋىن قورعاپ، نىق قاداممەن ءتوراعالار مىنبەسىنىڭ الدىنا كەلىپ توقتادى. شي جينپيڭ تۋدى قارۋلى ساقشى ءبولىمىنىڭ قولباسشىسى ۋاڭ نيڭ مەن ساياسي كوميسسارى جۋ شىڭليڭگە سالتاناتتى تۇردە تابىس ەتتى. ۋاڭ نيڭ، جۋ شىڭليڭ كوتەرىڭكى رۋحپەن شي جينپيڭگە اسكەري سالەم بەرىپ، شي جينپيڭنىڭ قولىنان قارۋلى ساقشى ءبولىمىنىڭ تۋىن تاپسىرىپ الدى دا، تۋدى سەرت ۇستاپ، قاسقايىپ تۇرا قالدى. كوماندير-جاۋىنگەرلەر قارۋلى ساقشى ءبولىمىنىڭ تۋىنا ايبىندى تۇردە اسكەري سالەم بەردى.

    تۋ تاپسىرۋ سالتىنان كەيىن شي جينپيڭ نۇسقاۋ بەردى. ول مىنالاردى اتاپ كورسەتتى: پارتيا ورتالىق كوميتەتى قارۋلى ساقشى ءبولىمىنىڭ باسشىلىق، قولباسشىلىق ءتۇزىلىسىن رەتتەۋدى، پارتيا ورتالىق كوميتەتى مەن ورتالىق اسكەري ىستەر كوميتەتىنىڭ قارۋلى ساقشى بولىمىنە ورتالىقتانعان ءبىر تۇتاس باسشىلىق جۇرگىزىپ، ورتالىق اسكەري ىستەر كوميتەتى − قارۋلى ساقشى ءبولىمى − اسكەري ءبولىم باسشىلىق، قولباسشىلىق ءتۇزىلىسىن اتقارۋدى ۇيعاردى. بۇل پارتيا ورتالىق كوميتەتىنىڭ پارتيانىڭ بۇكىل ەلدەگى قارۋلى كۇشتەرگە ابسوليۋتتى باسشىلىعىن تياناقتاندىرىپ، جۇڭگوشا اسكەري تۇزىمگە تاباندى بولۋ جانە ونى دامىتۋ تۇرعىسىنان جاساعان كەلەلى ساياسي ۇيعارىمى، پارتيانىڭ جاڭا داۋىردەگى ارميانى قۇدىرەتتەندىرۋ نىساناسىن ىسكە اسىرىپ، مەملەكەتتىڭ باسقارۋ جۇيەسى مەن باسقارۋ قابىلەتىنىڭ وسىزاماندانۋىن ىلگەرىلەتىپ، پارتيا مەن مەملەكەتتىڭ باياندى تىنىشتىعىن ىسكە اسىرۋدا كەلەلى دە تەرەڭ مانگە يە.

    شي جينپيڭ مىنالاردى باسا دارىپتەدى: قارۋلى ساقشى ءبولىمى − پارتيا باسشىلىق ەتەتىن حالىقتىق قارۋلى كۇشتەردىڭ ماڭىزدى قۇرامداس بولىگى، مەملەكەتتىڭ حاۋىپسىزدىگى مەن قوعامنىڭ ورنىقتىلىعىن ساقتاپ، حالىقتىڭ كوركەم ءومىرىن قورعاۋدا كەلەلى جاۋاپكەرشىلىك ارقالاپ، ساياسي حاۋىپسىزدىكتى، اسىرەسە، بيلىك حاۋىپسىزدىگى مەن ءتۇزىم حاۋىپسىزدىگىن قورعاۋدا ماڭىزدى رول اتقارادى. پارتيانىڭ قولباسشىلىعىنا بۇلجىماستان بويسۇنىپ، جاڭا داۋىردەگى پارتيانىڭ ارميانى قۇدىرەتتەندىرۋ يدەياسىن جاپپاي دايەكتىلەندىرىپ، پارتيانىڭ ابسوليۋتتى باسشىلىعىنا تاباندى بولىپ، پارتيانىڭ ءامىر - جارلىعىنا بۇلجىماستان قۇلاق اسىپ، ساياسي تانىمدى، جالپى جاعداي تانىمىن، ۇيتقى تانىمىن، ساپ تۇزەۋ تانىمىن كۇشەيتىپ، قاشان دا پارتيا مەن حالىقتىڭ ادال قورعاۋشىلارى بولۋى كەرەك.

جاۋاپتى رەداكتور: گۇلدەن ماقسات قىزى