قۇلجا قالاسى مال تۇقىمىن ساپالاندىرىپ شارۋالاردىڭ كىرىسىن ارتتىردى

  • كەلۋ قاينارى: ىلە گازەتى
  • 03:11:50 12/01/2018

    قۇلجا قالاسى مال تۇقىمىن ساپالىلاندىرۋ قىزمەتىن تىڭعىلىقتى ىستەپ، شارۋالاردى وسى زامانعى مال شارۋاشىلىعى كاسىبىمەن شۇعىلدانۋعا جەبەدى، اسىل تۇقىمدى مال باعىمشىلىعىن كۇش سالا جالپىلاستىرىپ، تۇرعىنداردىڭ كىرىسىن ارتتىردى. بۇل ءۇشىن قۇلجا قالالىق ۇكىمەت پەن ءار دارەجەلى اۋىل – قالاشىق، فەرمالار مال تۇقىمىن ساپالىلاندىرۋ جاۋاپكەرلىك توقتامىنا قول قويىسىپ، مىندەتتى ايقىندادى.

    قۇلجا قالاسى وتكەن جىلى مال تۇقىمىن ساپالىلاندىرۋدىڭ اياق الىسىن تەزدەتىپ، مال تۇقىمىن ساپالىلاندىرۋ دەڭگەيىن جوعارىلاتۋ ءۇشىن، جەرگىلىكتى بۇقالاردى ءبىر جاقتى ەتۋ مىندەتىن %100 ورىنداۋعا كەپىلدىك ەتتى. ءىس جۇزىندىك جاعدايمەن بىرلەستىرە وتىرىپ «قۇلجا قالاسىنىڭ تولىمسىز بۇقالاردى باسقارۋ ءادىسىن» بەلگىلەپ، ء ارقايسى اۋىل – قالاشىق، فەرمالارداعى تولىمسىز بۇقالاردان قازىرگە دەيىن 287 باس بۇقانى ءبىر جاقتى ەتتى.

    قۇلجا قالالىق مال شيپاگەرلىك پۋنكىتىنەن ۇعىسۋىمىزشا، قۇلجا قالاسى وتكەن جىلى 23 مىڭ باس اسىل تۇقىمدى قوڭىر سيىردى توڭازىتىلعان سفەرمامەن ۇرىقتاندىرۋدى جوسپارلاعان بولاتىن، ءىس جۇزىندە 21 مىڭ باس اسىل تۇقىمدى سيىردى توڭازىتىلعان سفەرمامەن ۇرىقتاندىرىپ، مىندەتتىڭ %90 ىن ورىندادى. تۇقىمى ساپالىلاندىرىلعان 5 مىڭ باس ەنەلىك سيىرعا ارحيۆ تۇرعىزدى. قازىر قۇلجا قالاسىندا شينجياڭ قوڭىر سيىرى، سيممەنتال سيىر مەن گوليستەيىن سيىرىنان 35 مىڭ باس، مىڭ باستان جوعارى اسىل تۇقىمدى سيىرى بار سەلبەستىك كووپەراتيۆىنەن ەكەۋى، 300 باستان جوعارى اسىل تۇقىمدى سيىرى بار سەلبەستىك كووپەراتيۆىنەن بەسەۋى بار. سونىمەن بىرگە 12 ورىننان تۇراقتى توڭازىتىلعان سفەرمامەن ۇرىقتاندىرۋ پۋنكتىن، التى ورىننان توڭازىتىلعان سفەرمامەن ۇرىقتاندىراتىن پۋنكتىن قۇردى.

    قۇلجا قالاسى سيىر تۇقىمىن ساپالىلاندىرۋمەن بىرگە، قوي، جىلقى تۇقىمىن ساپالىلاندىرۋعا دا بارىنشا ءمان بەردى. بۇل بارىستا بەس ورىننان قويدى جاساندى جولمەن ۇرىقتاندىرۋ پۋنكتىن قۇردى، اسىل تۇقىمدى قازاق قويىن ەكى مىڭ 150 تۇياققا جەتكىزىپ، وعان تۇگەل ارحيۆ تۇرعىزدى. تىزىمگە الدىرعان اسىل تۇقىمدى قوشقاردى 870 تۇياققا، سارالانعان اسىل تۇقىمدى جىلقى تۇلىگىن 351 باسقا جەتكىزدى. مال تۇقىمىن ساپالىلاندىرۋ جونىندە ەكى مارتە كۋرس اشتى، كۋرستا 30 مال شارۋاشىلىق تەحنيگى مال تۇقىمىن ساپالىلاندىرۋ جونىندە ارناۋلى لەكسيا جاسادى، وعان قۇلجا قالاسىنا قاراستى اۋىل – قالاشىق، فەرمالاردان 782 شارۋا قاتىناستى.

    اقىلباي مۇقامەتالي ۇلى

جاۋاپتى رەداكتور: جازيرا بولاتباي قىزى