ۇلتتار ارا تۇسىنىستىكتى شىنايى تەرەڭدەتىپ، ۇلتتاردىڭ ارالاسۋىن، ىشتەسۋىن، توعىسۋىن بارىنشا كۇشەيتەيىك

  • كەلۋ قاينارى: ىلە گازەتى
  • 04:50:05 14/01/2018

    قايىربەك قاسيران ۇلى (ءوز ءتىلشىمىز)

    

    قاڭتاردىڭ 13 – كۇنى تۇستەن كەيىن، ساياسي كەڭەس ىلە قازاق اۆتونوميالى وبلىستىق 13 – كەزەكتى كوميتەتىنىڭ 2 – ءماجىلىسى گرۋپپالار تالقىسىن ورىستەتتى. ساياسي كەڭەس مۇشەلەرى اۆتونوميالى وبلىستىق ساياسي كەڭەستىڭ ءتوراعاسى سەرجان ۇعىباي ۇلىنىڭ ساياسي كەڭەس ىلە قازاق اۆتونوميالى وبلىستىق 13 – كەزەكتى كوميتەتىنىڭ تۇراقتى كوميتەتى اتىنان جاساعان بايانداماسىن تالقىلاعان كەزدە ءبىر اۋىزدان بايانداما كەڭ ءورىستى، مازمۇنى تەرەڭ بولىپتى، ونداعى نىسانا، مىندەتتەر ايقىن، وي جەلىسى انىق، كوپتەگەن مازمۇندار سان – سيفر ارقىلى ىشكەرىلەي دالەلدەنىپتى، - دەدى.

    باياندامادا ايتىلعان ۇلتتار ىنتىماعى قىزمەتى ساياسي كەڭەس مۇشەلەرىنىڭ نازارىن اۋدارعان ماڭىزدى ءتۇيىن بولدى. اسىرەسە، «ۇلتتار ىنتىماعىنىڭ بەرەكەلى شاڭىراعى»، «ۇلتتار ىنتىماعى ‹تۋىستار اپتالىعى› قيمىلىنىڭ» باياندامادا ارناۋلى اۋىزعا الىنۋى ساياسي كەڭەس مۇشەلەرىن تەرەڭ تولقىتتى.

    ساياسي كەڭەس ىلە قازاق اۆتونوميالى وبلىستىق 13 – كەزەكتى كوميتەتىنىڭ مۇشەسى، ءدوربىلجىن اۋدانى ءدوربىلجىن قالاشىعى مۇگەدەكتەر بىرلەستىگىنىڭ ءتوراعاسى باتناسىن تىلشىگە بىلاي دەدى:

    - باياندامادا ۇلتتار ىنتىماعىن كۇشەيتۋ جونىندە توعىز جاقتان ناقتى تالاپ قويىلىپتى، مەن مۇنى ەرەكشە قۇپتايمىن ءارى وعان ۇلتتار ارا ءوزارا تۇسىنىستىكتى شىنايى تەرەڭدەتۋ كەرەك دەگەن ءبىر مازمۇن قوسقىم كەلەدى. انىعىراق ايتار بولسام، ۇلتتار ىنتىماعىندا ءار ۇلت ءبىر – ءبىرىنىڭ ءتىلىن، جازۋىن بىلاي قويعاندا، سالت – داستۇرىنە دەيىن تەرەڭ ۇعىنۋى كەرەك. مىنە ۇلتتاردىڭ شىنايى ارالاسۋى، ىشتەسۋى، توعىسۋى دەگەن وسى.

    باتناسىن ۇلتتار ىنتىماعىن ءوز كوزىمەن كورگەن شىنايى ءبىر ۋاقيعامەن ءسوزىن ارى قاراي ساباقتادى:

    - مەنىڭ جاس كەزىمدە اۋىلىمىزدا جاۋ حۋا ەسىمدى جۇڭگوشا ەمشىلىكپەن شۇعىلداناتىن ءبىر اۋىل شيپاگەرى بولدى، ءبىزدىڭ اۋىلىمىز ەجەلدەن حانزۋ، قازاق، موڭعۇل ۇلتى ارالاس قونىستانعان بەرەكەلى اۋىل ەدى، مىنە وسى اۋىلدا جاۋ حۋا شيپاگەر ءار ۇلت بۇقاراسىمەن ەتەنە ارالاستى. ءالى كۇنگە ەسىمنەن كەتپەيتىن ءبىر ۋاقيعا، ءبىر كۇنى جاۋ حۋا شيپاگەر مەنىڭ شەشەمە امانداسا كەلىپتى. ول كەزدە 10 تيىنعا 7 تال كامپيت كەلەتىن. ول كىسى 50 تيىنعا قالتاسىن كامپيتكە تولتىرىپتى دا، ءبىزدىڭ ۇيگە كەلگەننەن كەيىن «شەشەي، سىزگە امانداسا كەلدىم، بالالارعا اكەلگەن ازىراق بازارلىعىم ەدى» دەپ قالتاسىنان ۋىستاپ الىپ، كامپيتىن شەشەمنىڭ قولىنا ۇستاتتى. قاراڭىزشى، بەرگەنى قاراپايىم كامپيت بولعانىمەن، استارىندا شىنايى كوڭىلدىڭ ىستىق ىقىلاسى جاتپاي ما؟ «ورامال تون بولمايدى، جول بولادى» دەگەن مىنە وسى، - دەيدى باتناسىن اعىنان اقتارىلىپ.

جاۋاپتى رەداكتور: جازيرا بولاتباي قىزى