قالامگەرلەر قالجىڭدارىنان

  • كەلۋ قاينارى: ىلە كەشى گازەتى
  • 06:49:15 30/01/2018

 

    سان مەن تەمىر-تەرسەك

    شينجياڭ جاستار-ورەندەر باسپاسىنىڭ الدىندا كىتاپ جۇرگىزىپ تۇرعان قىزىر ءجۇنىس ۇلىنا، ءبىر مەكەمەدە ىستەيتىن ءارى جاسى كىشى باۋىرى بولعاسىن ەركەلەپ ءازىل ايتا بەرەتىن بولات عابدىلكارىم ۇلى:

    -وسى قۇلجادا ادامدارعا ىلعي پايعامبارلاردىڭ اتىن قويادى ەكەن ءا؟-دەسە كەرەك. سوندا قىزىر اعا بولاتتىڭ تارباعاتايدان ەكەنىن كولدەنەڭ تارتىپ:

    -تارباعاتاي جاقتا ىلعي ساندى ادام اتى قىلادى، زاداقان مىڭباي، ەلۋباي ءابىلقاسىم، الپىسباي ءتوراعا قاتارلى، ال، سان جەتپەگەن كەزدەردە بولات دەگەن سىقىلدى مەتالدىڭ اتىن قويادى ەكەن ءا؟-دەپ باۋىرىن سوزدەن ءسۇرىندىرىپتى.

    ادەبيەتتى تىڭنىڭ ۇستىنەن قۇتقارۋ

    90-جىلداردىڭ باسىندا جاس اقىن بۇرلەن ىليمان ۇلى بار ءبىر توپ ستۋدەنت وتىرىستا ءاركىم ءوز وقىعان كاسىبىن ماقتاپ كەركىلدەسىپ قالىپتى. سولاردىڭ ىشىندە ادەبيەتشى بولامىز دەگەندەر مەن ادەبيەت كاسىبىن وقىعاندار مولاڭداۋ ەكەن. ماتەماتيكا وقىعان بىرەۋ:

    -ادەبيەتتىڭ قولىنان ەشتەمە كەلمەيدى، عارىشتان تارتىپ ءۇي قۇرىلىسى، سۋ قويماي، جول، ونەركاسىپتىڭ بارلىعىنا كەرەگى ماتەماتيكا، ال، ادەبيەتتى وقىتپاسا دا بولادى،-دەپتى. ونىڭ بۇل سوزىنە انالار قىزىنىپ داۋ كوبەيىپ، ارتى قىزاراقتاسىپ كەتىپتى. قىرىق كىسى ءبىر جاق، قىڭىر كىسى ءبىر جاق بولىپ كەركىلدەسەدى.

    -ادەبيەت قۋ سوزدەن قۋىرداق قۋىرعانىمەن، ومىردەگى قاجەتى شامالى، ادەبيەت بولماسا دا بولا بەرەدى، ماتەماتيكا، حيميا بولماسا بولمايدى،-دەپ قىڭىرايادى. ونىڭ ءسوزى باسقاسىنىڭ شامىنا ءتيىپ جەلىگىپ-جەلپىنىپ العان ولار الگى ادەبيەتتى نولگە تەڭەپ وتىرعان مىقتىعا تاپ بەرەدى. وعان دا جان كەرەك، ۇيدەن قاشىپ شىققاندا انالار قاۋمالاپ ءجۇرىپ ۇيگەن تىڭنىڭ ۇستىنەن ۇستاپ الىپ، ەندى قول كوتەرگەندە اناۋ:

    -ويباي، مەن قالجىڭداپ ەدىم، ازىلگە دە ءوستىپ شامدانعان بار ما؟-دەيدى. مۇنى ەستىگەن ادەبيەت سۇيگىشتەردىڭ اشۋى تاراپ:

    -باسە، ءازىلى ەكەن، قالجىڭداپتى،-دەپ ونى تۇرعىزىپ بارلىعى ۇيگە قايتا كەلەدى. سوندا جاتىپ اتارى بار بۇرلەن ىليمان ۇلى:

    -پو، القىنىپ شارشاپ كەتكەنىمدى قاراشى، ادەبيەتتى بارلىعىمىز قاپتاپ ءجۇرىپ تىڭنىڭ ۇستىنەن ارەڭ قۇتقارىپ قالمادىق پا؟!-دەپتى.

جاۋاپتى رەداكتور: گۇلدەن ماقسات قىزى