جۇڭگو مەن قازاقستان قورعاس حالىقارالىق شەكارالىق سەلبەستىك ورتالىعىندا بىرلەسىپ ساۋداگەر شاقىرۋ، تانىستىرۋ جانە نىسانعا قول قويۋ سالتىن وتكىزدى

  • كەلۋ قاينارى: ىلە گازەتى
  • 03:09:56 31/01/2018

  

    جۇڭگو مەن قازاقستاننىڭ 100 دەن استام كاسىپورىنى ناق مايداندا 20 ميلليارد 100 ميلليون يۋاندىق توقتامعا قول قويىستى

 

    قاڭتاردىڭ 29-كۇنى «جاڭا ءداۋىر، تىڭ كوزقاراس، تىڭ ساپار» دەگەندى باس تاقىرىپ ەتكەن جۇڭگو - قازاقستان قورعاس بىرلەسىپ ساۋداگەر شاقىرۋ، تانىستىرۋ جانە نىسانعا قول قويۋ سالتى قورعاس حالىقارالىق شەكارالىق سەلبەستىك ورتالىعىندا وتكىزىلدى. جۇڭگودان، قازاقستاننان، شينجياڭنىڭ ءىشى-سىرتىنان كەلگەن 100 دەن استام كاسىپورىننىڭ ۋاكىلدەرى ءبىر اراعا باس قوسىپ، دوستىق جىرىن شىرقاپ، دامۋدى ورتاق جوسپارلادى. بۇل قيمىلدا جالپى 35 نىسانعا قول قويىلىپ، جالپى نىسان قارجىسى 20 ميلليارد 100 ميلليون يۋانعا جەتتى.

    بۇل رەتكى ساۋداگەر شاقىرۋ، تانىستىرۋ جينالىسىن قورعاس ەكونوميكالىق اشۋ رايونىن باسقارۋ كوميتەتى مەن قازاقستان قورعاس حالىقارالىق شەكارالىق سەلبەستىك ورتالىعى مەملەكەتتىك قارجىلاندىرۋ سەرىكتىگى بىرلەسىپ وتكىزدى. مۇنداعى ماقسات - «ءبىر بەلدەۋ، ءبىر جول» ستراتەگيالىق ورايىن مىقتى يگەرۋ، ورتالىقتىڭ، اۆتونوميالى رايوننىڭ ءتۇرلى ءتيىمدى ساياساتتارىنان پايدالانىپ، ناقتى نىساندارعا ساۋداگەر شاقىرىپ، قارجى باۋراۋ جانە جەبەۋ تەبىنىن اناعۇرلىم ارتتىرۋ، نەگىزدىك قۇرىلعى قۇرىلىسىن كۇشەيتىپ، ساۋدا -ساتىق ورتاسىن ساپالىلاندىرىپ، تۇلعالى ەكونوميكانى الۋەتتەندىرە، كولەمدەندىرە ءتۇسۋ ءۇشىن بولىپ تابىلادى.

    سول كۇنى قورعاس قالاسىمەن جالپى 200 ميلليون يۋان قارجى قوسىپ، جىلدىق ءونىم مولشەرى ميلليون توننادان اساتىن جەم - ءشوپ مانەرلەۋ زاۆودىن قۇرۋ نىسانىنا قول قويىسقان تايۋان تايتان بيولوگيا جانە اۋىل شارۋاشىلىق تەحنيكالىق شەكتى سەرىكتىگىنىڭ باس ديرەكتورى ءراپقات ءدولات بىلاي دەدى: قورعاس قالاسى وزگەشە وڭىرلىك ابزالدىققا، مايەكتى مادەنيەتكە جانە تاماشا دامۋ ورتاسىنا يە بولىپ قالماستان، «ءبىر بەلدەۋ، ءبىر جول» بويىنداعى ءتۇيىندى قالا بولۋ تۇرعىسىنان كومەسكى قۋاتى مىعىم. سەرىكتىگىمىزدىڭ بۇدان كەيىنگى دامۋ بولاشاعىنا سەنىمىم زور. وتە - موتە، «قورعاس ەكونوميكالىق اشۋ رايونى ەرەجەسىنىڭ» جانە كوپتەگەن ءتيىمدى ساياساتتاردىڭ قولداۋى - كاسىپورىنداردىڭ سىرتقا، ءتىپتى، كەڭ حالىقارالىق بازارعا بەت الۋىنا، دامۋ بولاشاقتارىنىڭ جارقىن بولۋىنا ءتيىمدى بولدى.

    قازاقستان - قورعاس حالىقارالىق شەكارالىق سەلبەستىك ورتالىعى مەملەكەتتىك قارجىلاندىرۋ سەرىكتىگىنىڭ ءتوراعاسى قاھارمان قۇتتىقتاۋ سوزىندە بىلاي دەدى: جۇڭگو ـ قازاقستان قورعاس حالىقارالىق شەكارا سەلبەستىك ورتالىعى - دۇنيە ءجۇزى بويىنشا بىردەن ـءبىر شەكارا اتتاعان ەركىن ساۋدا رايونى. ول ەكى ەلدىڭ جاپپاي سەلبەستىك ورناتۋىن تەرەڭدەي دامىتۋدا ماڭىزدى مانگە يە. اسىرەسە، 2017-جىلى استاناداعى الەمدىك كورمە كەزىندە جۇڭگو-قازاقستان قورعاس حالىقارالىق شەكارالىق سەلبەستىك ورتالىعى ساۋداگەر شاقىرۋ، تانىستىرۋ ءماجىلىسىن بىرلەسىپ وتكىزدى، ءتىپتى، سەلبەستىك ورتالىعى جۇڭگو-قازاقستان سىندى ەكى ەلدى ازيا-ەۆروپاعا، اۋەلى، دۇنيە جۇزىنە تانىستىردى. بۇل سەلبەستىك ورتالىعىنىڭ دامۋى ءۇشىن ۇزاق بولاشاقتىق ماڭىز الادى. جاقىنعى جىلداردان بەرى قازاقستان - جۇڭگو ەكى ەلدىڭ دوستىق سەلبەستىگىندە تاماشا ىلگەرىلەۋشىلىكتەرگە قول جەتكىزىلدى، سەلبەستىك نىساندارى بارعان سايىن مولايدى، ەكى ەلدىڭ بارىس -كەلىستى، سەلبەستىكتى اناعۇرلىم كۇشەيتىپ، ءوزارا دوستىقتى تەرەڭدەتۋىن، اسىرەسە، سەلبەستىك ورتالىعىنىڭ قۇرىلىسى مەن دامۋى جاقتارىنداعى ەكى جاقتى سەلبەستىكتى نىعايتىپ، نۇرلى بولاشاقتى بىرلىكتە جاراتۋىن ءۇمىت ەتەمىن.

جاۋاپتى رەداكتور: گۇلدەن ماقسات قىزى