قىزىعى مول قار–مۇز مەرەكەسى

  • كەلۋ قاينارى: ىلە گازەتى
  • 05:04:48 07/02/2018

    _ «جۇڭگو.نارات 2018» جانە 15–كەزەكتى «قىس كەلبەتى» اتتى قار–مۇز ساياحات–مادەنيەت مەرەكەسىنەن ەلەس

    ماقالاسىن جازعان حان شاشا، سۋرەتكە العان ليۋ چىڭگاڭ (ءوز تىلشىلەرىمىز)

    

    «جۇڭگو.نارات 2018» جانە 15–كەزەكتى «قىس كەلبەتى» اتتى قار–مۇز ساياحات–مادەنيەت مەرەكەسى اقپاننىڭ 3–كۇنى كۇنەس اۋدانىنداعى نارات حالىقارالىق شاڭعى الاڭىندا كۇمبىرلەگەن كۇيمەن، مىڭ بۇرالعان بيمەن شىمىلدىعىن اشتى.

    بۇل رەتكى قار–مۇز ساياحات–مادەنيەت مەرەكەسىندە قيمىل مازمۇنىنا جاڭالىق ۇستەلىپ، ۇلتتىق سالت–سانا مەن قار–مۇز مازمۇندارى قابىستىرىلىپ، ءان–ءبي نومىرلەرىنەن تىس قار موتوتسيكل، ۇلتتىق سپورت ويىندارى، سوعىم مادەنيەتى كورمەسى جانە ءدامدى تاعامدار قۇزىرى، نارات قىسقى فوتو سۋرەت مەرەكەسى سياقتى قيمىلدار دا ورنالاستىرىلدى. بۇل قيمىلدار ءوزارا ۇشتاستىرىلا، تۇتاس شارانى قامتي ءجۇرىلىپ، ساياحاتشىلاردىڭ قىس ماۋسىمىنا دەگەن سەزىم سارايىن كەڭەيتتى. ىلەدەگى ءار ۇلت بۇقاراسىنىڭ وزگەشە تۇرمىس سالتى قار–مۇزدى تاقىرىپ ەتكەن ءىس–شاراعا ءسىڭىرىلىپ كورسەتىلدى. مەرەكە بۇكىل ەلىمىزدىڭ جەر–جەرىنەن 6 مىڭ 500 دەن استام ساياحاتشىنى باۋرادى.

    شاڭعى الاڭىندا الدىمەن كوز تارتىپ، كوڭىل اۋداراتىنى قاتار–قاتار اشىلعان اس–تاعام جايمالارى مەن جىلى–جۇمساقتىڭ جاعىمدى ءيىسى ەدى. ولارداعى ارنايى پىسىرىلعان شينجياڭنىڭ وزگەشە تاعامدارى كەلگەن ساياحاتشىلاردى ىلە تابيعاتىنىڭ اسەمدىگىمەن قوسا ءتىل ۇيىرگەن تاعامدارىنا دا قۇمار ەتەتىندەي. سونىڭ باستى بەلگىسىندەي بوپ تۇرعان «مۇز بەن وتتىڭ جىرى» اتتى قار ۇستىندەگى مىڭ كىسىلىك، 50 وتتىقتى قازانعا سالىنعان سيىر ەتى 12 ءتۇرلى كوكونىسپەن قوسا قايناتىلىپ، ساياحاتشىلاردى قاۋمالاي وتىرىپ ءدام تاتتىرىپ، كوڭىلدى كۇيگە بولەيدى.

    «بۇل رەت مەن جىجياڭدىق ەكى دوسىمدى ەرتىپ كەلدىم، ولارعا تاۋ ەتەگىندە ءان تىڭداپ، وتتىقتى قازاننان ءدام تاتۋدىڭ ءلاززاتىن سيلادىم» دەيدى ساياحاتشى شۇي تاۋ.

    قارلى دالاداعى فۋتبول مايدانىندا قاۋمالاعان ەل فۋتبول كيىمدەرىن كيىپ جارىسقا تۇسكەن ەكى كوماندا قازاق جىگىتتەرىنە «قايراتتان! دوپ كىردى!» دەپ ايعايلاپ دەم بەرەدى. ءبىر شەتتە اتەش تالاستىرعان جاستار تىكىرەيە اڭدىسىپ، تىك شاپشىپ، ءبىرىن ءبىرى ءتۇتىپ جەپ توبەلەسكەن ەكى اتەشتىڭ «جەكپە–جەگىمەن» دۋىلدايدى.

    20 نەشە جىل اتەش تالاستىرۋمەن اينالىسقان 45 جاستاعى فاڭ گاڭ: «وسى رەتكى قار–مۇز ساياحات–مادەنيەت مەرەكەسىندە اتەش تالاستىرۋ بار ەكەنىن ەستىپ، <سايىپقىرانىمدى> ارنايى الىپ كەلدىم»–دەيدى تىلشىگە.

جاۋاپتى رەداكتور: جازيرا بولاتباي قىزى