ءباس ويىنى جونىندە باعامداساق

  • كەلۋ قاينارى: ىلە گازەتى
  • 03:59:20 13/02/2018

    −ارتىڭىزعا ءبىر بەلگى قالدىرىپ كەتىڭىز، تامام ەلدى كۇشىڭىزبەن تاڭداي قاقتىرعان القاۋلى ساتىڭىزگە كۋا بولسىن. بولاشاق ۇرپاق ءسىزدىڭ كۇشىڭىزدى كورىپ، قۋاتىڭىزدى باعالاسىن،–دەپ قولقالاعان ساتىندە كوتەرىپ كۇش اتاسىن تانىتسا؛ سەرىك قوجاباي ۇلى كوكتوعاي اۋدانىنىڭ قۋ ەرتىس بويىندا القالى جۇرتتىڭ قولقالاۋىمەن 18 جاسىندا 432 كيلوگرامدىق تاستى كوتەرىپ، ەرەن كۇشىن جاريا ەتكەن، «ەركىن كۇرەستىڭ چەمپيونى» سولتىكەن كوكىش ۇلى 1974 – جىلى ون بەستەي جاس جىگىتپەن بىرگە التاي قالاسى لاستى اۋىلىنىڭ شوجىك جايلاۋىنا اعاش كەسۋگە بارادى. ول كەزدە سوكەڭ سولقىلداعان 22 دەگى جىگىت ەدى. كەنەت ون بەستەي جىگىتتىڭ ايعايى اسپاندى كەرنەپ، زورلانىپ جاتقان قيمىلدارىن كورەدى دە، سول ماڭعا بارادى. سويتسە ولاردىڭ جولىن كەسىپ، قولىن بايلاعان تايقازاننىڭ جارتىسىنداي تاۋدىڭ كوك شىبارلانعان كەسەك تە شىمىر تاسى اينالاسىن وشاقتاي ەتىپ قازىپ، سۇيمەن سالىپ، جىلى ورنىنان جىلجىتقانىنا دولىلىعى ۇستاپ، ەكپەتتەپ جاتىپ العان ەكەن.

    ولار سولتىكەندى كورگەننەن كەيىن بالۋاندىعىن ءبىر سىناپ كورگىسى كەلىپ:

    − وسى سەنى بالۋان، بالۋان دەپ ماقتايمىز–اي كەلىپ، شىن بالۋان بولساڭ مىنا تاستى ورنىنان جالعىز ءوزىڭ جىلجىتىپ كورشى،–دەيدى دە قولىنا ۇزىن سۇيمەندى ۇستاتادى. ەندى شەگىنۋگە جول قالماعانىن بىلگەن بالۋان:

    − قانە، بىلاي تۇرىڭدار! كوتەرسەم كوتەردىم، − دەيدى دە سۇيمەندەرىن لاقتىرىپ جىبەرىپ، تاربيىپ جاتقان تاسقا قىرانداي ءشۇيىلىپ كەپ قارىمدى قولىمەن قاپسىرا قۇشاقتاپ، جەردەن لوق ەتكىزىپ جۇلىپ الىپ، قوس تىزەسىنە قويادى دا، قايتا ءبىر تىنىستاپ الىپ ءبىر ادىم جەردەگى تاستىڭ ۇستىنە تاستاي سالعاندا، قالىڭ جىگىت كوزدەرىنە جاس الىپ، شاپالاق سوعىپ كەتەدى. ال، سول ءبىر كوتەرە سالعان تاس بۇگىن «بالۋان تاس» اتالىپ، بالۋاننىڭ مەرەيىن اسىرۋدا. «بالۋان تاستىڭ» اۋىرلىعى 292 كيلوگرام ەكەن. سول كەزىن سولتىكەن كوكىش ۇلى:

    ونبەس جىگىت قاراپ تۇردى قاسىمدا،

    كوك شىبار بوپ جاتتى قىران تاسى دا.

    كەيىنگى ۇرپاق كورسىن دەگەن ويمەنەن،

    كوتەردىم مەن جيىرما ەكى جاسىمدا (1974–جىلى شىلدە)،– دەپ ولەڭمەن ورنەكتەگەن.

جاۋاپتى رەداكتور: گۇلدەن ماقسات قىزى