ءباس ويىنى جونىندە باعامداساق

  • كەلۋ قاينارى: ىلە گازەتى
  • 03:59:20 13/02/2018

    بالۋان ءالىمعازى الكەي ۇلىنىڭ ءباسى

    بۇل ءباس بۋراتالا موڭعۇل اۆتونوميالى وبلىسى اراسان اۋدانىنىڭ جىڭىشكە سۋ دەگەن جايلاۋدا 1992–جىلى تامىزدا بولعان ەدى. ول كەزدە ءالىمعازىنىڭ ات–اتاعى اسپانداپ، «تۇيە بالۋان ءالىمعازى الكەي» دەگەن داڭققا يە بولىپ، وتانىمىزدىڭ ابىرويىن اسقاقتاتىپ، حالقىنىڭ قۇرمەتىنە بولەنگەن شاعى ەدى.

    اراسان اۋدانىنان بالۋان ءالىمعازىنى ءمۇتالىپ دەگەن شوفەر جىگىت بەس ادامدىق جەڭىل اۆتوكولىگىنە وتىرعىزىپ جايلاۋعا سەرۋەندەۋگە شىعادى. ءاردايىم بارىپ، جاز جايلاۋدا باعلانىن جەيتىن قولى اشىق، باردام ناۋرىزباي دەگەن اقساقالدىڭ اقشاڭقان التى قانات اق ورداسىنىڭ ەسىگىنىڭ كوزىنە اۆتوكولىگىن توقتاتقان ءمۇتالىپ:

    − ءاي، اقساقال، بۇگىن مەن جالعىز كەلگەمىن جوق. اتاعى الاتاۋداي بالۋان باۋىرىڭىزدى ەرتىپ كەلدىم. سوندىقتان، اۆتوكولىگىمدى ەسىگىڭىزدىڭ كوزىنە توقتاتتىم،–دەيدى ازىلدەپ.

    اۋىل بىتكەن تورەدەي كورەتىن كوپشىل قارت ناۋرىزباي ساۋىقشىل، مولقور پەيىلىنە باسىپ:

    − جارايدى، اتاعى الاتاۋداي ارقالى ەر ەسىك الدىما كەلگەنىنە مەن نەگە قۋانبايمىن. ءالىمعازى باۋىرىم بۇگىنگىنىڭ باتىرى. دەسە دە، بالۋان ەكەنى شىن بولسا، سەنىڭ مىنا اۆتوكولىگىڭدى وسى ەسىك كوزىنەن جىلجىتپاي ۇستاپ توقتاتا السا مەن قورالى قويىمنان ءالىمعازىعا تايىنشاداي ەركەك قوي بەرەمىن، بۇل ءباس. جەڭىلسەڭدەر مەنى اۋدانعا شاي–شالاڭ العانعا تەككە اپارىپ كەلەسىڭ،–دەيدى.

    سالەمىن بەرىپ، ناۋرىزباي اقساقالدىڭ قولىن ۇستاعان بالۋان:

    − جارايدى، «ەرجىگىت سوزىنەن، جولبارىس ىزىنەن» دەگەن ۇلى ءسوز بار بابامىزدان قالعان. ۇلكەن كىسىنىڭ ايتقانى بولسىن،–دەيدى دە، جەڭىل اۆتوكولىكتىڭ ارتقى جاقتاۋىنان ۇستاپ تۇرادى. شوفەر ءمۇتالىپ اۆتوكولىگىن وتالدىرىپ، مايدى بەرىپ، ايداي جونەلگەندە، ءبىر مەتردەي جىلجىپ بارىپ، تابانداپ ورنىندا دوڭگەلەگى اينالىپ تۇرىپ قالادى. سويتسە، بالۋان ءالىمعازى العاش تابان تىرەگەن جەردە باتىڭكەسىنىڭ قوس تابانى قالىپ قالىپتى. بالۋاننىڭ كۇشىنە ەرەسەن ريزا بولعان ناۋرىزباي اقساقال ولاردى كۇتىپ، ەرتەسى ءباسىن بەرىپ، ايتقان سەرتىنە جەتىپ قايتارادى.

    مىنە، بۇل قازاق بالۋاندارىنىڭ ۇرپاقتان ۇرپاققا جالعاپ كەلگەن قارىمدىلىعىن سىنايتىن ءباس بيىگى، كۇشتىڭ بيىك مارەسى.

جاۋاپتى رەداكتور: گۇلدەن ماقسات قىزى