شارۋالار جالبىز ءشوپ ەگىمشىلىگىمەن شۇعىلدانىپ، كىرىستەرىن ارتتىردى

  • كەلۋ قاينارى: ىلە گازەتى
  • 08:39:30 17/04/2018

  

    ەرەكشە حوش ءيىستى ماتەريال الىناتىن جالبىز ءشوپتىڭ دارىلىك قۇنى جوعارى ەكەندىگى دالەلدەنگەن. جالبىز ءشوپ ارقىلى تۇماۋدى، قىزۋ ورلەۋدى، باس اۋرۋدى ەمدەۋگە بولادى. بالاۋسا ساباعى ازىقتىققا پايدالانىلسا، جاپىراعىنان ماي ايىرىپ الىنىپ، ءتىس مايى، ساعىز سياقتىلاردىڭ حوش ءيىستى ماتەريال قوسپاسىنا پايدالانىلادى، جالبىز ءشوپتىڭ تۇلابويى تولعان اسىل. سوڭعى جىلدارى جالبىز ءشوپ كۇنەس اۋدانىنداعى ەرەكشە ەگىمشىلىكتىڭ بىرىنە اينالدى.

    جۋىردا ءتىلشى كۇنەس اۋدانى المالى قالاشىعى اقشي قىستاعىندا قىستاق تۇرعىنى جاۋ كايميڭنىڭ جەتەكشىلىگىندە شارۋالاردىڭ جالبىز ءشوپ ەگىپ جاتقانىن كورگەن. جالبىز ءشوپ كوپ جىلدىق جاپىراق ساباقتى وسىمدىك، ادەتتە تامىر ساباعىنان ءوسىپ كوبەيەدى، ءبىر رەت ەگىپ، ءونىمىن بەس جىل كورۋگە بولادى، جاۋ كايميڭ 2009–جىلدان باستاپ وسى ەرەكشە ەگىمشىلىكپەن شۇعىلدانىپ، ءار جىلى مۋ باسىندىق جىلدىق تازا كىرىسىن ءبىر مىڭ 500 يۋاننان اينالدىرىپ كەلەدى، كىرىسى ادەتتەگى اۋىل شارۋاشىلىق داقىلدارىنا قاراعاندا 4 – 5 ەسە ارتىق. جالبىز ءشوپ ونىمدىلىگىنىڭ جوعارى بولۋى وسى قىستاقتاعى تۇرعىنداردىڭ جالبىز ءشوپ ەگۋ بەلسەندىلىگىن قوزعادى. كەزەكتە قىستاقتاعى 50 دەن استام ديقان وتباسى ەرەكشە ەگىمشىلىك كاسىبى بولعان جالبىز ءشوپ ەگۋ ارقىلى كىرىستەرىن ارتتىرۋ جولىنا ءتۇستى.

    المالى قالاشىعى اقشي قىستاعىنىڭ تۇرعىنى جاۋ كايميڭ: مەن پارتيا مۇشەسى بولۋ سالاۋاتىممەن شارۋالارعا ۇلگى بولۋ ءۇشىن ەڭ الدىمەن جالبىز ءشوپ ەكتىم. وتكەن جىلى 100 مۋ جەردەن 80 دە 90 مىڭ يۋان كىرىس ەنگىزدىم، بيىل جالبىز ءشوپ ەگىلەتىن جەر كولەمىن كەڭەيتپەكشىمىن، –دەدى.

    ۇعىسۋعا قاراعاندا، المالى قالاشىعىندا جالبىز ءشوپ ەگىلگەن جەر كولەمى 2 مىڭ 300 مۋ، ريىم كۇرەڭكەيى ەگىلگەن جەر كولەمى ءبىر مىڭ 200 مۋ ەكەن. المالى قالاشىعى ەگىمشىلىك كاسىبى قۇرىلىمىنا ۇزدىكسىز رەتتەۋ جۇرگىزۋ ارقىلى ديقانداردىڭ كىرىسىن ارتتىرۋعا بەرىك نەگىز قالاعان.

    قالينۇر بەلدەنبەك ۇلى

جاۋاپتى رەداكتور: گۇلدەن ماقسات قىزى