كۇرىش ساتۋ

  • كەلۋ قاينارى: ىلە گازەتى
  • 03:57:09 23/04/2018

     فەي حۋا

 

    بۇل اڭگىمە كەزىندە بەيجيڭ ۋنيۆەرسيتەتىنىڭ تۇڭعىش كەزەكتى ادەبي جاسامپازدىق جارىسىندا ءبىرىنشى دارەجەلى سيلىق العان. الايدا، سيلىق تاراتۋ سالتىندا اۆتور كەلمەيدى، تەك ونىڭ ساباقتاستارى ساحناعا شىعىپ، كوزدەرىنە جاس الىپ، وعان دەگەن قايعىلى ساعىنىشتارىن بىلدىرگەندە بەيجيڭ ۋنيۆەرسيتەتىنىڭ تۇتاس زالى ءۇنسىز تىنىشتىققا شومدى. سوندا عانا سەزگەن كورەرمەندەر ورىندارىنان تۇرىپ قايعىلى ازا ءبىلدىردى. ءاسىلى اۆتور ءبىر جىلدىڭ الدىندا اق قان اۋرۋىنان قايتىس بولعان ەدى.

    تاڭ شەتى قىلاڭ بەرگەن الاڭ ـ ەلەڭ شاق. شەشەم توسەگىمنىڭ جانىنا كەلىپ: «چيۇڭ باۋ تۇرا عوي، بۇگىن بازار اشىلادى، كۇرىش اپارىپ ساتىپ اكەڭە ءدارى اكەلەمىز»-دەپ باسىمنان سيپاپ وياتتى.

    ۇيقىلى ـ وياۋ كوزىمدى ازەر اشىپ، تەرەزەدەن سىرتقا قاراسام تاڭ شەتى ءالى سوگىلە قويماپتى. ورنىمنان تۇرعىم كەلمەي قايتادان جاستىققا باسىمدى قويدىم.

    ىرگەدەگى بولمەدەن اكەمنىڭ جوتەلگەن داۋىسى ەستىلدى، ال شەشەم اس ۇيدە ابىگەر بولىپ ءجۇر، مايدىڭ جالىنى مەن تاماقتىڭ جاعىمدى ءيىسى مۇرنىما كەلگەندە قارنىم اشقاندىقتان بولار ءاپ ـ ساتتە ۇيقىم شايداي اشىلىپ سالا بەردى. ەندى جاتۋدىڭ قاجەتى دە قالماعانداي بولعان سوڭ ورنىمنان ەرىنە تۇرىپ كيىمىمدى كيىپ، توسەك ـ ورنىمدى جيناستىرىپ جاتقانىمدا شاشى ۇيپالانىپ، ۇيقىلى ـ وياۋ باۋىرىم جانىما كەلدى:

    -اپەكە، مەن دە سەندەرمەن بىرگە بازارعا بارسام بولا ما؟ بالمۇزداق جەگىم كەلەدى! –دەي بەرگەن ەدى، قاناتتاس بولمەدەن:

    -بولمايدى، ي ـ باۋ، سەن كەتسەڭ اتىزدى كىم سۋارادى ـ دەگەن اكەمنىڭ القىنا جوتەلگەن داۋىسى ەستىلدى.

    -اكە، مي قايناعان مىنا ىستىقتا اتىزدا ءجۇرىپ ىستىق ءوتىپ اۋىرىپ قالدىڭىز عوي، ەندى ماعان ىستىق وتەدى دەپ ويلامايسىز با، قايتىپ سۋارامىن،-دەپ باۋىرىم باياعى قىڭىر مىنەزىنە باسىپ، دۇڭك ەتە ءتۇستى.

    -بىزگە ىستىق وتەدى دەپ قورعالاعاندا، ەگىنگە ىستىق وتپەي مە؟ سۋارماساڭ كۇرىش مايساسى قۋراپ قالادى، ءبىر ءۇيلى جان نە ءىشىپ، نە جەيمىز سوندا؟ - دەپ اكەم القىنا سويلەي بەرگەندە وكپەسى قىسىپ جوتەلى ۇدەپ كەتتى.

    باۋىرىم، ماعان قاراپ ءتىلىن شىعارىپ، بەت ـ اۋزىن تىرجىڭداتتى دا اكەمە قاراي كەتتى.

    ىرگەدەگى بولمەدەن اكەمنىڭ باۋىرىما اتىزدى قالاي سۋارۋدى، قايسى توعاننىڭ سۋىن الدىمەن قايسى تاقتاعا سالۋ كەرەكتىگىن، ارىق ـ قۇلاقتارعا مىقتى بولۋىن تاپسىرىپ جاتقان داۋىسى ەمىس ـ ەمىس ەستىلىپ تۇردى.

جاۋاپتى رەداكتور: گۇلدەن ماقسات قىزى