«جەر ۇيىعى _ كوركەم ىلە» اتىنداعى ساياحات ونىمدەرىن تانىستىرۋ جينالىسى نانجيڭدە وتكىزىلدى

  • كەلۋ قاينارى: ىلە گازەتى
  • 07:14:15 02/05/2018

  

    ءتىلشىمىز ما چىڭلۋ حابارلايدى. 4 – ايدىڭ 27 – كۇنى اۆتونوميالى رايوندىق ساياحات كاسىبىن دامىتۋ كوميتەتى، ىلە وبلىستىق حالىق ۇكىمەتى، جياڭسۋ ولكەسىنىڭ ىلەگە باعىتتامالى كومەك بەرۋ الدىڭعى شەپ قولباسشىلىق شتابى باس بولىپ، ىلە وبلىستىق ساياحات مەكەمەسى، وبلىستىق ءان – ءبي ۇيىرمەسى، نانجيڭ قالاسىنىڭ قۇلجا قالاسىنا باعىتتامالى كومەك بەرۋ الدىڭعى شەپ قىزمەت گرۋپپاسى ۇستىنە الىپ وتكىزگەن «جەر ۇيىعى – كوركەم ىلە» اتىنداعى ىلەنىڭ ساياحات ونىمدەرىن تانىستىرۋ جينالىسى نانجيڭ قالاسىنىڭ حۋانيۇيچىڭ زات ساتىپ الۋ ورتالىعىنىڭ ۇلكەن زالىندا باستالدى.

    جياڭسۋ ولكەلىك حالىق ۇكىمەتىنىڭ ورىنباسار باس حاتشىسى حۋاڭ لان، اۆتونوميالى رايوندىق ساياحات كاسىبىن دامىتۋ كوميتەتىنىڭ مەڭگەرۋشىسى گۇلي ابليكىم، وبلىستىق پارتكومنىڭ ورىنباسار شۋجيى، جياڭسۋ ولكەسىنىڭ ىلە وبلىسىنا باعىتتامالى كومەك بەرۋ الدىڭعى شەپ قولباسشىلىق شتابى پارتكومىنىڭ شۋجيى، باس جەتەكشىسى پان داۋجين، ىلە وبلىستىق حالىق ۇكىمەتىنىڭ ورىنباسار باستىعى، جياڭسۋ ولكەسىنىڭ ىلە وبلىسىنا باعىتتامالى كومەك بەرۋ الدىڭعى شەپ قولباسشىلىق شتابى پارتكومىنىڭ ورىنباسار شۋجيى، ورىنباسار باس جەتەكشىسى جاڭ ميڭحۋا تانىستىرۋ جينالىسىنا قاتىناستى.

    سول كۇنى نانجيڭ قالاسىنىڭ نەگىزگى جينالىس الاڭى قىزۋ دۋمانعا بولەنىپ، ىلە وبلىسىنىڭ 11 اۋدان، قالاسىنىڭ كورمە تەكشەسىنىڭ الدى ادامدارعا تولىپ، ىلەنىڭ سارا ساياحات ونىمدەرى ادامداردى ەرىكسىز باۋرادى. ىلە وبلىستىق ءان – ءبي ۇيىرمەسىنىڭ ارتيستەرى ورىنداعان شينجياڭ ەرەكشەلىگىندەگى تارتىمدى كونسەرت نومىرلەرى كورمەنىڭ دۋمانىن ونان ارى اسىردى. بۇدان تىس ناق مايدانداعى ىلەنىڭ ساياحات ونىمدەرىن ۇگىتتەيتىن فوتو سۋرەت كورمەسى مەن قىزىقتى ويىن تۇرلەرى قالا تۇرعىندارىنىڭ كوز مەيىرىن قاندىردى.

    بيىل 75 جاسقا كەلگەن نانجيڭ قالاسىنىڭ تۇرعىنى جيا جىن مەن ونىڭ جۇبايى جاڭ ياۋ – ۋىن ەكەۋى ءارقايسى كورمەلەردى ارالاپ، جاعداي ۇعىستى. جيا جىن تىلشىگە بىلاي دەدى: «جۇبايىم ەكەۋىمىز 1961 – جىلدان باستاپ ىلە دە 20 جىل تۇرمىس كەشىردىك، ىلەگە دەگەن سۇيىسپەنشىلىگىمىز تەرەڭ، وسى رەت ۇلىم توراپتان ءونىم تانىستىرۋ جينالىسى وتكىزىلەتىندىگىن بىلگەننەن كەيىن، ولاردى ەرتىپ كەلدىم. ىلە جاقسى جەر، كەتكەنىمە ۇزاق جىل بولسا دا، ول جەردە قىزمەت ىستەپ، تۇرمىس كەشىرگەن ماعىنالى ساتتەرىمدى ساعىنامىن. كەزىندە ىلەدەن نانجيڭگە كەلۋ ءۇشىن كەم دەگەندە ءبىر اپتا ۋاقىت كەتەتىن، قازىر قاتىناس دامىدى، بىرنەشە ساعاتتا _ اق جەتۋگە بولادى. بۇل رەتكى ءونىم تانىستىرۋ جينالىسىنىڭ وتكىزىلۋى وتە جاقسى بولدى، كوپتەگەن نانجيڭدىكتەر وسى جينالىس ارقىلى ىلەنى تۇسىنەتىن بولادى».موڭعۇلكۇرە اۋدانىنىڭ كورمە رايونى ماڭىندا كوپتەگەن قالا تۇرعىندارى قىزمەتكەرلەردەن قولدان جاسالعان تەرى بۇيىمدارى، جىلقى مايى تەرى قورعاۋ بۇيىمدارى، شۇعىنىق گۇلى تەرى قورعاۋ بۇيىمدارى سياقتى ونىمدەردى ۇعىستى. شينجياڭ شۇعىنىق بيولوگيا تەحنيكالىق شەكتى سەرىكتىگىنىڭ باس القاسى سۋ حۋا تىلشىگە بىلاي دەدى: «ساياحات ونىمدەرىن تانىستىرۋ جينالىسى كاسىپورىندارعا ءوز ونىمدەرىن تانىستىرۋعا تاماشا تەكشە ازىرلەپ بەردى. ءبىزدىڭ جەلىلەس ونىمدەرىمىز نانجيڭ قالا تۇرعىندارىنىڭ قولداۋى مەن قۇپتاۋىنان ءوتتى. بۇدان كەيىن دە وسى رەتكى تانىستىرۋ جينالىسىنداعى تاجىريبەلەردى قورىتىندىلاپ، ماركانى ۇزدىكسىز كەمەلدەندىرىپ، ونىمدەرىمىزدى جياڭسۋ ولكەسىنىڭ بارلىق جەرىنە تانىستىرۋ ويىم بار».

جاۋاپتى رەداكتور: گۇلدەن ماقسات قىزى