اقپارات ناعىز شىندىقتى ارقاۋ ەتۋى كەرەك

  • كەلۋ قاينارى: ىلە گازەتى
  • 04:39:16 14/05/2018

 

    اقىلباي مۇقامەتالي ۇلى

 

    شىندىقتى ءىس جۇزىنەن ىزدەۋ، ناقتى ءىس پەن بولمىستى شىپ–شىرعاسىن شىعارماي قاز–قالپىندا حابارلاۋ–تىلشىلەرگە قويىلاتىن ەڭ نەگىزگى العى شارت. ءتىلشى اقپاراتتىق حابار جازعاندا قوعامدىق ومىرگە ىشكەرىلەي ارالاسۋ نەگىزىندە امالياتتى شىعار ءتۇيىن ەتىپ پارتيانىڭ لۋشيان، باعىت، ساياساتىن دۇرىس ءارى بۇلجىتپاي ۇگىتتەۋى ءتيىس. سوندا عانا حاباردى ءداۋىر تالابىنا شىن مانىندە ۇيلەستىرۋگە، كاسىپتىك جاسامپازدىقتى اناعۇرلىم ساۋلەلەندىرۋگە، بۇقارانىڭ وتانشىلدىق، باۋىرمالدىق، العا باسارلىق رۋحىن جەتىلدىرۋگە بولادى. اقپاراتتىق حابار بۇقارا كوز تىگىپ، نازار اۋدارىپ وتىرعان ناعىز وبيەكتيۆ شىندىقتى، جۇرتشىلىق اڭىس ەتىپ وتىرعان كوكەيتەستى ماسەلەلەردى، ولاردىڭ كۇتكەن ارمانى مەن تىلەگىن شىن مانىندە وبىرازدى ەتىپ بەينەلەي العاندا عانا وقىرماندى قوعامدىق بولمىستان، بۇقارانىڭ ناقتى تۇرمىس تىرشىلىگىنەن، اتقارىلىپ وتىرعان رەفورمانىڭ باياندى بولعان–بولماعاندىعىنان، جولعا قويىلعان باعىت–ساياساتتاردىڭ ءساتتى تۇردە تياناقتانعان–تياناقتانباعاندىعىنان تولىق حابارلى ەتەدى، سونداي–اق، ءار دارەجەلى باسشىلىقتىڭ سول نەگىزدە ۇتىمدى ءادىس–شارا قولدانۋىنا، جاڭا دامۋ ستراتەگياسىن ورناتۋىنا دا بەلگىلى دارەجەدە سەپتىگىن تيگىزەدى. ەگەر، ءتىلشى حابار جازعاندا يەلەگەن ماتەريالى شىندىقتان مۇلدە الشاق بولسا نەمەسە قالىپتان تىس اسىرەلەنسە، ءتىپتى، حاباردىڭ جان جۇيەسى بولعان فاكت بۇتىندەي ويدان قۇراستىرىلسا، وندا حابار ومىرشەڭدىك قۋاتىنان ايىرىلادى دا، وقىرمانداردىڭ گازەت وقۋ قىزعىندىلىعىنا سۋ سەبەدى، اۋەلى پارتيانىڭ نەگىزگى ۇگىت قۇرالدارىنىڭ ءبىرى بولعان گازەتتىڭ بەدەلىنە اۋىر ىقپال جەتكىزەدى. بۇل جاعىندا ۇلگى تۇتىپ پايدالانۋعا ءتيىستى تاجىريبە–ساباقتار تولىپ جاتىر. سوندىقتان، ناعىز شىندىق ارقاۋ ەتىلگەن حابار عانا وقىرماندى ايرانداي ۇيىتىپ، جۇرت جۇرەگىنەن جول تابا الادى.

    پارتيانىڭ باعىت–ساياساتىنىڭ دۇرىس، ءادىل دايەكتىلەنۋىن اقپاراتتىق حابار- ماقالانىڭ نەگىزگى وزەگى، قۇنارلى مايەگى ەتە ءبىلۋ–ءتىلشى جونىنەن العاندا ۇلكەن شەبەرلىك، ناعىز كورەگەندىك سانالادى. قازىر، كەيبىر ورىنداردا جوعارىعا وزدەرىن ونەگەلى ەتىپ كورسەتىپ، «جاقسى» دەگەن توندى جامىلۋ ءۇشىن، شىمىرىكپەستەن جالعان مالىمەت بەرەتىن، كىرىستى كوپە–كورنەۋ وتىرىك مالىمدەپ، شاشتان كوپ شىعىندى مۇمكىندىكتىڭ بارىنشا بۇركەمەلەيتىن، جەكە باسىنىڭ قامىن عانا كۇيىتتەپ، قيىنشىلىق قىسپاعىندا قالىپ اۋىرتپالىق ارقالاعان بۇقارانىڭ مۇڭ–مۇڭتاجىمەن ساناسىپ تا قويمايتىن تار ءورىستى، سىڭار جاقتى نىسايدى جوق دەي المايمىز. سوندىقتان، تىلشىلەر قاي–قاشاندا قىراعى بولىپ، جىڭىشكەلىكپەن تەكسەرىپ–زەرتتەۋ جۇرگىزىپ، قوعامدىق دامۋعا ورالعى بولىپ، بۇقارانىڭ كوڭىلىنە قاياۋ سالاتىن كەمىستىكتەردى ايپاراداي اشىپ، شىندىق اتاۋلىنى بۇكپەسىز تۇردە اشىق ايتۋى كەرەك. رەال ومىردە كەزىگەتىن قوعامدىق بولمىستار مەن قيمىلدار ساناپ تاۋىسقىسىز، ولاردىڭ ءار دايىم ءبىر–بىرىمەن ۇشتاسىپ، بايلانىسىپ جاتاتىنى دا بارشىلىق، ءتىپتى، بۇقارانىڭ ءتول مۇددەسىنە ساياتىن كەيبىر قولامتالى اڭىس، پىكىرلەر دە از ەمەس.

جاۋاپتى رەداكتور: گۇلدەن ماقسات قىزى