اقپارات ناعىز شىندىقتى ارقاۋ ەتۋى كەرەك

  • كەلۋ قاينارى: ىلە گازەتى
  • 04:39:16 14/05/2018

    ءتىلشى قوعامدىق شىندىقتى بۇلجىتپاي قاز قالپىندا جازۋ ءۇشىن، الدىمەن فاكتتى ايقىنداپ الۋى شارت. ەگەر، حاباردىڭ نەگىزگى مايەگى، جان جۇيەسى بولعان فاكت سەنىمدى بولماسا، شالاعايلىق ورىن السا، ناعىز شىندىقتى جازۋ بوس قيالعا اينالىپ قالادى. مۇندا ەڭ الدىمەن قوعامدىق ومىرگە تەرەڭ ارالاسۋ، تەكسەرىپ–زەرتتەۋ جۇرگىزۋ ارقىلى سەنىمدى، قۇندى ماتەريالداردى قولعا كەلتىرۋگە مۇمكىندىكتىڭ بارىنشا قۇلشىنۋ قاجەت. وتە–موتە، ونەركاسىپ پەن كاسىپورىننىڭ، اۋىل–قىستاقتاردىڭ، اۋدانداردىڭ، اۋىل شارۋاشىلىق تاراۋلارىنىڭ قىزمەت وتەۋ ءتاسىلى، رەفورما جاساۋ بەتالىسى، گۇلدەنىپ–كوركەيۋ بارىسى، دامۋ ستراتەگياسى، وركەندەۋ جولىنداعى قۇندى تاجىريبە–ساباقتارى جونىندە جان–جاقتى احۋال ۇعىسىپ، ىجداعاتتىقپەن تەكسەرۋ جۇرگىزگەندە عانا ناقتى جاعدايدى كوزبەن كورىپ، بۇقارا قاداعالاي كوز تىگىپ، كوڭىل ءبولىپ وتىرعان كەيبىر كوكەيتەستى ماسەلەلەردى تولىق، جۇيەلى تۇردە مەڭگەرۋگە، سول ارقىلى اقپاراتتىق حابار–ماقالانى جاندى، تارتىمدى، عىلمي ەتىپ جازۋعا بولادى. بۇل اقپاراتتىق حابار–ماقالانىڭ ومىرشەڭدىك قۋاتىن ارتتىرىپ، مازمۇنىنا ءار بەرۋمەن بىرگە، اقپارات كاسىبىنىڭ بەدەلىن اسىرىپ، سەنىمىن ارتتىرارى حاق. قازىر كەيبىر ەرىكتى تىلشىلەردەن كەلەتىن حاباردىڭ كوپ ساندىسىنىڭ ۋاقىتى، ونداعى ارقاۋ ەتىلگەن قيمىلدىڭ وتكىزىلگەن ورنى كۇڭگىرت نەمەسە ايقىن ەمەس، اۋەلى دەسەڭىز كەيبىرەۋىنىڭ يەلەگەن ماتەريالىندا دا شيكىلىك بار، دەمەك، كوبىندە سەنىمدى، تولىق بولا بەرمەيدى. سول سەبەپتى، ولاردىڭ جازعان حابار–ماقالاسىندا تەك قولعا كەلتىرگەن ساناۋلى جەتىستىكتەر مەن ازدى–كوپتى دامۋشىلىقتار عانا تىلگە تيەك ەتىلگەنىمەن، ونىڭ ارتقى كورىنىسى، ناقتى ورىن تەۋىپ وتىرعان ماسەلەلەردىڭ بەتى اشىلماي جابۋلى كۇيىندە قالعان. «سىن تۇزەلمەي ءمىن تۇزەلمەيدى» دەمەكشى، ءتىلشى حابار–ماقالا جازعاندا كەي ورىنداردىڭ اۋىز تولتىرىپ ايتۋعا تاتيتىن سۇبەلى جەتىستىكتەرى مەن تابىستارىن ءسوز ەتۋمەن قوسا، ورىن تەۋىپ وتىرعان ءىشىنارا ولقىلىق، كەمىستىكتەرىن جاسىرماي اشكەرە تۇردە ورتاعا سالار بولسا، بۇل سول ورىننىڭ جەتىستىكتەردى ءتىپتى دە مولايتىپ، ولقىلىقتاردى تولىقتاۋىنا، دامىپ وركەندەۋدىڭ سارا جولىنا تۇسۋىنە جەبەۋ بولارى داۋسىز. سوندىقتان، اقپارات قوسىنىنداعى تىلشىلەر حابار جازعاندا ماسەلە اتاۋلىعا ءار قىرىنان تالداۋ جاساۋى، وبيەكتيۆ بولمىستى، ناعىز شىندىقتى تولىق مەڭگەرىپ، سىڭار جاقتىلىقتان ساقتانۋى قاجەت.

    قورىتىپ ايتقاندا، شىندىق–اقپاراتتىڭ جانى. شىندىقتان قول ۇزگەن اقپارات ءدام–تاتۋى جوق اسپەن بىردەي. دەمەك، اقپاراتتىق حابار–ماقالانىڭ جانى بولعان شىندىق اقساعان جەردە ول ومىرشەڭدىك قۋاتىنان ايىرىلىپ، اقپاراتتىق قۇنىن جويادى. سوندىقتان، اقپارات تىلشىلەرى حابار–ماقالا جازعاندا ءسوز بۇيدالىققا سالىنا بەرمەي، ناعىز شىندىققا تىزگىن بەرگەنى ورىندى. سوندا عانا اقپارات ءوز قۇدىرەتىن ايگىلەيدى.

جاۋاپتى رەداكتور: گۇلدەن ماقسات قىزى