اسپاز سىنى _ تاماقتىڭ ٴدامىن، تاعامنىڭ ٴسانىن كەلتىرۋ

  • كەلۋ قاينارى: ىلە گازەتى
  • 03:53:59 16/05/2018

    ٴتىلشى باعامى:

    جۋىق جىلداردان بەرى پارتيا، ۇكىمەتتىڭ كاسىپتەندىرۋ ساياساتىنىڭ اۋىل–قىستاقتا تياناقتانۋىنا ساي، اۋىل–قىستاق جاستارىنىڭ ىزدەنۋىنە، كوپتەپ ونەر ۇيرەنىپ ٴوزىن كەمەلدەندىرىپ، جاسامپازدىق قابىلەتتەرىن سومداۋىنا جانە ٴوز الدىنا يگىلىك جاراتۋىنا شابىت سيلادى. انە، سونىڭ ٴبىر مىسالى رەتىندە اۋىلدان ۇزاپ شىعىپ ٴوز الدىنا كاسىپتەنگەن، ىستەگەن كاسىبىنەن ناتيجە جاراتىپ جۇرگەن ازاماتتارىمىزدىڭ ٴبىرى اسپاز، مەملەكەت دارەجەلى كۇمىس مەدالدىڭ يەگەرى ايدىن مولداقىمەت ۇلىنىڭ اسپازدىق ونەرى ٴجايلى سىر–سۇحپاتتى وقىرمان قاۋىمعا ۇسىنۋدى ٴجون كوردىك. بۇل سۇحپات ەندى كاسىپتەنگەلى جۇرگەن ازاماتتارعا تاماشا باعىت–باعدار سيلايدى دەپ سەنەمىز.

    

    ەرسىنالى سۇلتان ۇلى: سالەمەتسىڭ بە؟ ايدىن، ٴوزىڭدى سۇحپاتقا تارتىپ اسپازدىق ونەر جايلى سىر بولىسكىم كەلدى، اسپازدىق ونەر جايلى توقتالا كەتسەڭ.

    ايدىن مولداقىمەت ۇلى: سۇحپاتقا تارتقانىڭا كوپ راقىمەت. مەن وسى اسپازدىق ونەرىمەن شۇعىلدانعالى بىرنەشە جىلدىڭ ٴجۇزى بولدى. اسپازدىق دەسە باسقالاردىڭ كوز الدىنا ەڭ الدىمەن تەك تاماق جاساۋ ۇيىندە قاربالاس تاماق جاساپ جاتقان جاپاكەش اسپازدار ەلەستەۋى مۇمكىن. راسىندا اسپازدىق سونداي جاپالى، جاپاسىنا ساي جاۋاپكەرلىگى وتە كۇشتى كاسىپ. مەن قازىرگى ىلە كاسىپتىك تەحنيكالىق مەكتەبىن 2001–جىلى ٴبىتىرىپ، قۇلجا، ٴۇرىمجى، قارامايلى، بەيجيڭ سياقتى قالالاردا جۇمىس ىستەدىم. 2009–جىلى اۆتونوميالى رايوندىق كوممۋنيستىك جاستار وداعى مەكتەبىندەگى مىقتى دا تاجىريبەلى ساقا ۇستازداردان ٴبىلىم الۋدىڭ ورايى تۋدى. مەن سودان كەيىن اسپازدىق كاسىپ جونىندە كوڭىلىمدە تۇيگەن كوپ سۇراۋعا جاۋاپ تاپتىم. 2010–جىلى مەملەكەت بويىنشا وتكىزىلگەن بۇكىل مەملەكەتتىك «مۇسىلمانشا تاعامدار فەستيۆالىنا» قاتىسىپ، كۇمىس مەدال ەنشىلەپ ورالدىم. 2012–جىلى ٴوزىم ىستەگەن «ياڭگۋاڭ» حالىقارالىق سەرىكتەستىگىنىڭ ٴبىرتۇتاس ورنالاستىرۋىمەن انحۇي ولكەسى حۋاڭشان شۋەيۋانىندا 6 مەملەكەتتەن كەلگەن كۋرسانتتارمەن بىرگە وقىپ، ۇيرەنىپ كوز ايامدى كەڭەيتىپ، ٴبىلىم دەڭگەيىمدى جوعارىلاتتىم. سول كەزدە بارىپ اسپازدىق كاسىپتىڭ قانشالىق ورەدەگى كاسىپ ەكەنىن اڭعاردىم. الدا ۇيرەنەتىنىمنىڭ قانشالىق كوپ ەكەنىن بىلگەننەن كەيىن ٴبىر–بىرلەپ ۇيرەنە باستادىم. اسپازدىق _ كاسىپتىك ونەر. ونەر بولعاندا جاۋاپكەرشىلىك پەن تازالىقتى، شەبەرلىك پەن قاجىرلىلىقتى ۇشتاستىراتىن ونەر. مەن وسى كاسىپتىك ونەردى ىشكەرىلەي يگەرۋ بارىسىندا تاماقتىڭ ءدامىن كەلتىرۋمەن بىرگە ودان ءتۇرلى ادەمى ورنەك شىعارعاندا عانا قاريداردى باۋراۋعا بولاتىندىعىن اڭعاردىم. اسپازدىق _ وسىزاماندانعان ارناۋلى كاسىپ سالاسى. اسپازدىقتى 2–3 اي ۇيرەنىپ قانا اسپاز بولا سالۋعا بولمايدى. كەمىندە 2–3 جىل ۇيرەنۋ، ۇيرەنگەندى تاجىريبەدەن وتكىزۋ بارىسىندا عانا تولىق اسپاز بولۋدىڭ جولىنا تۇسۋگە بولادى. قىسقاسى «قايناپ جاتقان قازانعا قاراپ، تاماقتىڭ ٴدامىن سەزىنۋ» دارەجەسىنە جەتۋ كەرەك.

جاۋاپتى رەداكتور: جازيرا بولاتباي قىزى