بايلىق كاپيتالعا اينالىپ، كىرىس ەسەلەپ ارتتى

  • كەلۋ قاينارى: شينجياڭ گازەتى تورابى
  • 09:09:01 25/05/2018

    

    سانجىداعى شارۋالار سەلبەستىك كووپەراتيۆتەرى اۋقاتتانۋدى جەبەۋدىڭ قوزعاۋشى كۇشىنە اينالدى

    

    ءتىلشىمىز گاي يوۋجۇن 5 - ايدىڭ 21 - كۇنى سانجىدان حابارلايدى.سانجى قالاسى اشىلى قازاق ۇلتتىق اۋىلىنداعى جاڭ فىڭ مەن ونىڭ «شينفىڭ» ساۋىن سيىر باعىمشىلىعى كاسىپتىك سەلبەستىك كووپەراتيۆى سول ماڭداعى مالشىلاردى ەگىن، مال شارۋاشىلىعىن وسىزامانداندىرا دامىتىپ، كىرىستەرىن ارتتىرۋعا باۋرادى.

    5 - ايدىڭ 17 - كۇنى «شينفىڭ» ساۋىن سيىر باعىمشىلىعى كاسىپتىك سەلبەستىك كووپەراتيۆىنىڭ ساۋىن سيىر فەرماسى الدىندا سەلبەستىك كووپەراتيۆىنىڭ مۇشەسى، نۇرجا قىستاعىنىڭ تۇرعىنى قادىلجان جۇمان تىلشىگە: بۇرىندارى ءبىر جىلدىڭ ءتورت ماۋسىمىندا تاۋدا مال باعۋمەن عانا بولىپ، ماردىمدى اقشا تابا المايتىنبىز، قازىر سەلبەستىك كووپەراتيۆىنە قاتىناسىپ جۇمىس ىستەگەننەن بەرى، كىرىسىمىز ەسەلەپ ارتتى، - دەدى. بۇگىندەرى قادىلجاننىڭ وتباسىنداعى 4 ادام بىردەي ساۋىن سيىر فەرماسىندا جۇمىس ىستەيدى، جارنا قوسقانداعى تابىس ءبولىسىن ەسەپكە الماعاندا، ءبىر جىلدىڭ وزىندە ەڭبەكاقىدان 200 مىڭ يۋانعا تاياۋ كىرىس كىرگىزەدى. نۇرجا قىستاعى پارتيا ياچەيكاسىنىڭ شۋجيى قالمۇرات قابدەش ۇلى: تۇتاس قىستاقتا 604 مالشى، 2284 ادام بار، بىلتىرعى جان باسىندىق ورتاشا كىرىس 16 مىڭ 800 يۋان بولدى، مۇنىڭ باسىم كوبى سەلبەستىك كووپەراتيۆىنىڭ ارقاسىندا قولعا كەلدى، - دەدى.

    مىنە بۇل سانجى حۇيزۋ اۆتونوميالى وبلىسىنداعى شارۋالار كاسىپتىك سەلبەستىك كووپەراتيۆتەرىنىڭ تەز قارقىنمەن دامىپ كەلە جاتقاندىعىنىڭ شاعىن كورىنىسى. اۋىل - قىستاقتار مەن شارۋالاردى بايلانىستىراتىن ماڭىزدى دانەكەر رەتىندە، شارۋالار كاسىپتىك سەلبەستىك كووپەراتيۆتەرى سانجى وبلىسىنىڭ اۋىل - قىستاقتاردى كوركەيتۋ اياق الىسىن جەبەۋ، وسى زامانعى اۋىل شارۋاشىلىعى تيجارات جۇيەسىن ورناتۋ، ەگىن، مال شارۋاشىلىعىنىڭ دامۋ تاسىلىنە بۇرىلىس جاساۋ، شارۋالاردىڭ كىرىسىن ارتتىرۋ جانە كەدەيلىكتەن قۇتىلۋدان قامال الۋ شايقاسىن جەبەۋدەگى ماڭىزدى تۇيىنگە اينالدى.

    سانجى حۇيزۋ اۆتونوميالى وبلىستىق ەگىن شارۋاشىلىق مەكەمەسىنىڭ باستىعى ما ۋىنشين بىلاي دەدى: سانجى وبلىسى سوڭعى بىرنەشە جىلدا «1000 سەلبەستىك كووپەراتيۆىنىڭ دەڭگەيىن جوعارىلاتۋ ارەكەتىن» بار كۇشپەن ورىستەتكەننەن كەيىن، شارۋالار كاسىپتىك سەلبەستىك كووپەراتيۆتەرىنىڭ دامۋىندا سەلبەستىك ءورىسى كەڭەيۋ، سەلبەستىك تىزبەگى ۇزارۋ، سەلبەستىك كولەمى زورايۋ، قىزمەت كورسەتۋ قۋاتى كۇشەيۋدەي تاماشا بەينە جارىققا شىعىپ، سانجى وبلىسىندا جەردى بىرلەسىپ باسقارىپ شارۋاشىلىق جۇرگىزۋ، جايلىم مەن مالدى بىرلەسىپ باسقارىپ شارۋاشىلىق جۇرگىزۋ، ەڭبەكتى كوتەرمەگە الۋ، كاسىپتىك قىزمەت كورسەتۋ سىندى وزىندىك ەرەكشەلىككە يە سەلبەستىك كووپەراتيۆى ۇلگىسى قالىپتاسىپ، اۋىل شارۋاشىلىعىنىڭ كاسىپ سالالانا دامىتۋىن ىلگەرىلەتىپ، اۋىل - قىستاقتاردى كوركەيتۋ ستراتەگياسىنىڭ اتقارىلۋىن جەبەدى.

جاۋاپتى رەداكتور: گۇلدەن ماقسات قىزى