شي جينپيڭ فرانسيانىڭ بۇرىنعى زۇڭتۇڭى وللاندپەن كەزدەستى

  • كەلۋ قاينارى: شينجياڭ گازەتى تورابى
  • 04:19:47 28/05/2018

 

    شينحۋا اگەنتتىگىنىڭ 5 - ايدىڭ 25 - كۇنى بەيجيڭنەن بەرگەن حابارى (ءتىلشى باي جيە). مەملەكەت ءتوراعاسى شي جينپيڭ 5 - ايدىڭ 25 - كۇنى دياۋيۇيتاي مەملەكەتتىك قوناق ۇيىندە فرانسيانىڭ بۇرىنعى زۇڭتۇڭى وللاندپەن كەزدەستى.

    شي جينپيڭ وللاندتىڭ فرانسيانىڭ زۇڭتۇڭى بولعان كەزدە جۇڭگو - فرانسيا ەكى جاقتى قارىم - قاتىناسىن جەبەۋگە، جۇڭگو مەن فرانسيانىڭ حالىقارالىق ىستەردەگى ىنتىماقتاستىعىن كۇشەيتۋگە قوسقان ۇلەسىن القادى. شي جينپيڭ مىنانى اتاپ كورسەتتى: ءسىز مىندەت وتەگەن مەزگىلدە ءبىز ءساتتى تۇردە ءوزارا ساپاردا بولىپ، جۇڭگو مەن فرانسيانىڭ قويۋ دا باياندى جالپى بەتتىك ستراتەگيالىق سەرىكتەستىك قارىم - قاتىناسىن بىرگە ورناتىپ، جۇڭگو - فرانسيا قارىم - قاتىناسىنىڭ باياندى دامۋىنا تاماشا نەگىز قالادىق. بيىل 1 - ايدا فرانسيانىڭ زۇڭتۇڭى ماكرون جۇڭگودا تۇڭعىش رەت مەملەكەتتىك ساپاردا بولدى، جۇڭگو مەن فرانسيا ەكى جاقتى جانە كوپ جاقتى سالاداعى ىنتىماقتاستىقتى كەڭەيتۋ جونىندە كەڭ كولەمدى ورتاق تانىمعا كەلدى. مەن جۇڭگو - فرانسيا قارىم - قاتىناسىنىڭ بولاشاعىنا زور سەنىم ارتامىن.

    شي جينپيڭ مىنانى اتاپ كورسەتتى: قازىر حالىقارالىق جاعداي تەرەڭ دە كۇردەلى وزگەرىستەردى باستان وتكىزۋدە، سونىمەن قاتار، دۇنيە جۇزىندەگى ەلدەردىڭ ءبىر - ءبىرىن سۇيەنىش ەتۋى دە كۇشەيدى، ءوز الدىنا دەربەس تۇراتىن ەشقانداي ءبىر ەل جوق. جۇڭگو فرانسيامەن ستراتەگيالىق سايكەستىكتى كۇشەيتىپ، كوپ جاقتىلىق اياق الىسىنان جازباي، جەر شارىندىق سايىستارعا بىرگە توتەپ بەرىپ، الەمدىك ەكونوميكانىڭ ارتۋىن، ساۋدا مەن قارجى قوسۋدى ەركىندەندىرۋدى، قولايلىلاندىرۋدى جەبەپ، بەيبىت تە ورنىقتى، اشىق تا قامتىمدى حالىقارالىق ءتارتىپتى قورعاۋعا بەلسەندى ۇلەس قوسۋدى قالايدى. جۇڭگو ەۆروپا وداعىمەن ىنتىماقتاستىقتى كۇشەيتۋگە دە كۇش سالۋعا پەيىل.

    وللاند بىلاي دەدى: فرانسيانىڭ زۇڭتۇڭى بولعان كەزىمدە، فرانسيا - جۇڭگو قارىم - قاتىناسىن كۇشەيتۋ ءۇشىن قۇلشىنىپ، فرانسيا - جۇڭگو جالپى بەتتىك ستراتەگيالىق سەرىكتەستىك قارىم - قاتىناسىنا تىڭ قوزعاۋشى كۇش سيلاعانىما ەرەكشە قۋانامىن. ءتوراعا شي جينپيڭمەن اراداعى دوستىعىمدى قاستەرلەيمىن، ءتوراعا شي جينپيڭنىڭ باسشىلىعىندا، جۇڭگونىڭ حالىقارالىق ىستەردەگى بەلسەندى رولىن، اسىرەسە، كليمات وزگەرىسى جونىندەگى «پاريج كەلىسىمىن» جاساسۋعا قوسقان ماڭىزدى ۇلەسىن ايرىقشا جوعارى باعالايمىن. كەزەكتەگى اۋقىمدا فرانسيا مەن جۇڭگونىڭ ستراتەگيالىق ىنتىماقتاستىق جاعدايىنىڭ جالعاسا، بەكەمدەلە تۇسكەنىنە ەرەكشە قۋانامىن، بۇل كوپ جاقتىلىقتى قورعاۋعا، كەڭەس جانە ىنتىماقتاستىق ارقىلى حالىقارالىق جانە وڭىرلىك ماسەلەلەردى شەشۋگە ءتيىمدى.

    ياڭ جيەچى، ۋاڭ ي قاتارلىلار كەزدەسۋدە بىرگە بولدى.

جاۋاپتى رەداكتور: گۇلدەن ماقسات قىزى