ىلە وبلىسىنا توتە قاراستى ورىندار بيىلعى جوعارى مەكتەپ ەمتيحانى قىزمەتىنە ورنالاستىرۋ جاسادى

  • كەلۋ قاينارى: ىلە گازەتى
  • 09:05:59 06/06/2018

 

   ىلە وبلىسىنا توتە قاراستى ورىنداردىڭ 2018 – جىلعى ادەتتەگى جوعارى مەكتەپ ەمتيحانى مەن ەمتيحان ورتاسىنىڭ حاۋىپسىزدىگى جونىندەگى قىزمەت ءماجىلىسى 5 – ايدىڭ سوڭىندا ىلە وبلىستىق وقۋ – اعارتۋ مەكەمەسىندە اشىلدى. وبلىستىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى گاۋ تيانشان، وبلىستىڭ ورىنباسار باستىعى ەلشات تۇرسىنباي ۇلى جانە وبلىستىق وقۋ – اعارتۋ مەكەمەسىنىڭ قاتىستى جاۋاپتىلارى، سونداي – اق، ىلە وبلىسىنا توتە قاراستى اۋدان، قالالاردىڭ وقۋ – اعاتۋ مەكەمەلەرىندەگى جوعارى مەكتەپ ەمتيحانى قىزمەتىنىڭ جاۋاپتىلارى، وبلىستىق قوعام حاۋىپسىزدىگى مەكەمەسى، ىلە وبلىستىق تەلەگراف سەرىكتىگى سىندى تاراۋلاردىڭ جاۋاپتىلارى ماجىلىسكە قاتىناستى.

    ىلە وبلىستىق وقۋ – اعارتۋ مەكەمەسىنىڭ ەمتيحان ورتالىعىنان ۇعىسۋىمىزشا، بيىلعى ادەتتەگى جوعارى مەكتەپ ەمتيحانى 6 – ايدىڭ 7 – كۇنىنەن 9 – كۇنىنە دەيىن الىنىپ، وعان ىلە وبلىسىنا توتە قاراستى 8 اۋدان، ءۇش قالا مەن بيڭتۋان 4 -، 7 – ديۆيزيالارىنان 22 مىڭ 922 وقۋشى قاتىناسادى ەكەن، بۇل بىلتىرعىدان 2 مىڭ 373 وقۋشى ارتىق بولىپ، تاريحتاعى ەڭ جاڭا ورە جاراتىلعان. بۇل جولى ىلە وبلىسىنا توتە قاراستى ورىنداردا جالپى 8 ەمتيحان رايونى، 28 ەمتيحان ءتۇيىنى مەن 961 ەمتيحان مايدانى ورنالاستىرىلعان، مۇندا 4 ەمتيحان ءتۇيىنى مەن 94 ەمتيحان مايدانى بىلتىرعىدان ارتىق بولعان. وبلىستىق وقۋ – اعارتۋ مەكەمەسى بيىلعى ادەتتەگى جوعارى مەكتەپ ەمتيحانى قىزمەتى ماجىلىسىندە حاۋىپسىزدىككە كەپىلدىك ەتۋ، ەلەكترمەن قامداۋ، توراپ جۇيەسىن قامتاماسىزداندىرۋ، اماندىق قورعاۋ، قاتىناس باسقارۋ سياقتى جاقتارداعى ناقتى تالاپتاردى ورتاعا قويىپ، جوعارى مەكتەپ ەمتيحانى قىزمەتىن قامتاماسىز ەتەتىن ورىنداردىڭ مىندەتىن ايقىنداعان.

    ءماجىلىس ەمتيحان رايونى ورنالاستىرىلعان اۋدان، قالالاردان ەمتيحان كەزىندەگى اماندىق قىزمەتى مەن ەمتيحان قاعازىنىڭ قۇپيالىعىن ساقتاۋ قىزمەتىن جاقسى ىستەۋدى؛ ەمتيحان قىزمەتى كوميتەتى قۇرىلىسىن كۇشەيتىپ، مەملەكەتتىڭ، اۆتونوميالى رايوننىڭ، وبلىستىڭ وقۋشى قابىلداۋعا، جوعارى مەكتەپ ەمتيحانىنا قاتىستى بەلگىلەمەلەرىن بۇلجىتپاي اتقارىپ، ەمتيحان ستيلىن دۇرىستاپ، ەمتيحان ءتارتىبىن قاتاڭداستىرىپ، ەمتيحان قىزمەتىنىڭ ءساتتى، ءتارتىپتى بولۋىن قامتاماسىزداندىرۋدى تالاپ ەتتى. سونىمەن بىرگە، قوعام حاۋىپسىزدىگى، توراپ جۇيەسى، ونەركاسىپ – ساۋدا سىندى تاراۋلارعا مەملەكەتتىڭ جوعارى مەكتەپ ەمتيحانى قىزمەتىنىڭ تالابىنا ساي وقۋ – اعارتۋ اكىمشىلىك تاراۋى جانە ەمتيحان قۇرىلىمدارىمەن بەلسەنە سايكەسىپ، ەمتيحان ورتاسىن جاپپاي جونگە سالۋ قىزمەتىن ويداعىداي ىستەۋدى، ال اۋا رايى، ورتانى قورعاۋ، ەلەكتر قۋاتى، قاتىناس، دەنساۋلىق ساقتاۋ سىندى ورىندارعا ساپالى قىزمەت وتەپ، ەلەكترمەن قامداۋدىڭ قالىپتىلىعى مەن ەمتيحان مايدانى توڭىرەگىنىڭ شۋىلسىز بولۋىنا كەپىلدىك ەتۋدى مىندەتتەدى.

    اقىلباي مۇقامەتالي ۇلى

جاۋاپتى رەداكتور: گۇلدەن ماقسات قىزى