تۋىسى تابىس تورىنە جەتەلەدى

  • كەلۋ قاينارى: شينجياڭ گازەتى تورابى
  • 10:08:43 12/06/2018

    ءتىلشىمىز ماقسات قيزات ۇلى

 

    ساۋان اۋدانى شيگوبي قالاشىعىنىڭ ۋداۋگۋ قىستاعىندا تۇراتىن مالشى توقتارعازى تۇردى ۇلىنىڭ جىعىلىپ جاتقان ورنىنان تىك تۇرىپ كەتۋىنە، كەدەيلىكتەن قۇتىلىپ، دوڭگەلەك داۋلەتتى قوعامنىڭ داڭعىل جولىنا تۇسۋىنە سەبەپشى بولعان، جۇرەگى مەيىرگە تولعان ءبىر جان بار، ول − ساۋان اۋدانى شيگوبي قالاشىق ەگىن شارۋاشىلىق پۋنكتىندە قىزمەت ىستەيتىن ەگىن شارۋاشىلىق مامانى، ۇزدىك تەحنيك ۋاڭ يبين.

    ۋاڭ يبين مەن توقتارعازىنىڭ تۋىس بولعانىنا 2 جىلدان اسىپ بارادى. «تۋىستاسۋ اپتالىعى قيمىلى» ەتەك العاننان باستاپ، قازاق جىگىتى مەن حانزۋ ازاماتتىڭ دوستىعى بىلايعى ەلگە ۇلگى بولارلىقتاي اسەر سيلادى. ەكى تۋىس تانىسا سالا سىرلاسىپ كەتتى. اق كوڭىل ۋاڭ يبين اشىق - جارقىن توقتارعازىنى بەينە ءوز ىنىسىندەي باۋىرىنا تارتتى، «جاقسىدا جاتتىق جوق» دەگەن، توقتارعازى ۋاڭ اعاسىن تورىنە شىعارىپ سيلادى.

    ۋاڭ يبين ءار 10 كۇندە ءبىر رەت توقتارعازىنىڭ وتباسىنا كەلىپ احۋال ۇعىسىپ، پارتيانىڭ ابزال ساياساتتارىن ۇگىتتەپ، پارتيا 19 - قۇرىلتايى رۋحى مەن مەملەكەتتىك ەكى ءماجىلىس رۋحىن جەتكىزىپ، توقتارعازىنىڭ تۇرمىسىنىڭ جاقسارىپ كەتۋىنە تاماشا نەگىز قالادى.

    جىگەرلى جىگىت توقتارعازىنىڭ تۇرمىسى بۇرىننان جاقسى ەدى، وسىدان 5 جىل بۇرىنعى ءبىر رەتكى قاتىناس شىرعالاڭى توقتارعازى وتباسىن تۇرالاتىپ كەتتى دە، باردام وتباسى كەدەيلىكتىڭ قالپاعىن كيىپ قالا بەردى، سودان بەرى توقتارعازى تىنىمسىز ەڭبەك ەتىپ، وشارلى وتباسىنىڭ ءال - اۋقاتىن جاقسارتۋعا ءبىر كىسىدەي كۇش شىعاردى.

    توقتارعازىنىڭ تالپىنىسى مەن تالابىنا ءتانتى بولعان ۋاڭ يبين تۋىسىنان: قانداي كاسىپتەن ناتيجە جاراتقىڭ كەلەدى؟ - دەپ سۇرادى.

    − مەن بۇرىندارى مال شارۋاشىلىعىن وركەندەتۋدى ويلاپ جۇرگەنمىن، مالىمنىڭ سانى دا جىل سايىن كوبەيىپ كەلە جاتقان بولاتىن. ءبىراق ءبىر رەتكى قاتىناس شىرعالاڭى قولىمداعى مالىمنان ايىردى. ەندى وركەندەتەيىن دەسەم قولىم قىسقا، بارلىعى دا ۋاقىتتىڭ ەنشىسىندە، العى كۇندەردە تاعى تالپىنىپ كورەرمىن، - دەدى توقتارعازى تۋىسىنا بارلىق جايدى پاش ەتىپ.

    − ەرجىگىتتىڭ باسىنا توقتىق تا، اشتىق تا كەلەدى. ءومىر بولعان سوڭ ءسۇرىنۋ بولادى. قۋاتىڭ جەتپەسە، مەن 10 مىڭ يۋان كومەك بەرەيىن، مال وسىرۋگە سەپتىگى تيەر، - دەپ ۋاڭ يبين تۋىسىنا كومەك جاساۋعا بەكىدى.

    − و نەدەگەنىڭىز، مەن ءوز ەڭبەگىممەن بايۋىم كەرەك، كۇن وتە كەلە كۇن كورىسىم جاقسارىپ كەتەتىنىنە سەنەمىن، - دەدى توقتارعازى تۋىسىنىڭ كومەگىنەن باس تارتىپ.

    − ولاي دەمە، ءىنىم، بۇل اعاڭنىڭ ازعانتاي عانا كومەگى، «اعاسى باردىڭ جاعاسى بار» دەگەن ەمەس پە، تۋىستار ءبىر - بىرىنە كومەكتەسىپ تۇرعانى ءجون، سەن بايىساڭ مەنىڭ دە كوڭىلىم ورنىعادى، - دەپ ۋاڭ اعاسى توقتارعازى ءىنىسىنىڭ قولىن قىستى.

جاۋاپتى رەداكتور: جازيرا بولاتباي قىزى