«شىرعاناق تاۋىق» شىرقاۋعا شىعارماق

  • كەلۋ قاينارى: شينجياڭ گازەتى تورابى
  • 10:12:17 12/06/2018

    ەرىكتى تىلشىلەر ۋي جىيۋان، چين جيانمين

 

    «ساۋ اپەكە، قولىڭىز بوس بولسا، ءبىزدىڭ ءۇيدىڭ شوجەلەرىن كورىپ بەرە الاسىز با؟ كەشە عانا كورىم ەدى، بۇگىن اياق استىنان جەم جەمەي قالىپتى». «بالاپاننىڭ كۇيى قالاي؟ جاشىكتىڭ تەمپەراتۋراسى قانشا؟». 5 - ايدىڭ 18 - كۇنى شىڭگىل اۋدانى تايكەشكەن قالاشىعى اققارىن قىستاعىنىڭ تۇرعىنى ءۇمىت شارشابەك ۇلى تاۋىق ءوسىرۋدىڭ شەبەرى ساۋ جينشياڭنان وسىلاي كەڭەس سۇرادى.

    شىڭگىل اۋدانىنىڭ ەرەكشە ءۇي قۇستارى سالاسىندا ساۋ جينشياڭنىڭ اتىن بىلمەيتىن ادام جوق. قارا تورى وڭىنە، جۇپىنى كيىنىسىنە قاراساڭىز، قاتارداعى اۋىل ايەلدەرىنەن ەش ايىرماسى جوق. 2017 - جىلى قالاشىق ۇكىمەتتىڭ، «ۇعىسۋ، تيىمدىلىك جاساۋ، توعىستىرۋ» بويىنشا قىستاقتا تۇراتىن قىزمەت اترەتىنىڭ كومەگىمەن، «پارتيا مۇشەلەرىنىڭ اۋقاتتانۋ قورىنان» بولىنگەن 160 مىڭ يۋان قاراجاتتىڭ ارقاسىندا، ول اۋدانى 10 نەشە مۋ شىعاتىن شىرعاناق ورمانىنان ەرەكشە تاۋىق فەرماسىن اشادى.

    ساۋ جينشياڭنىڭ «شىرعاناق تاۋىعى» اتىنداعى فەرماسى ءتورت اياعىنان تۇرا باستاعاندا، ساتىلىم ماسەلەسى وعان ۇلكەن قيىندىق تۋدىرادى. التاي ايماقتىق ەگىنشىلىك مەكەمەسىنىڭ وسى قىستاقتا تۇراتىن قىزمەت اترەتىنىڭ باستىعى، قىستاق پارتيا ياچەيكاسىنىڭ ءبىرىنشى شۋجيى شى گۋاڭيۇن بۇدان حابار تاپقان بويدا ارناۋلى جيىن اشىپ، وي جۇلگەسىن انىقتاپ، جوسپار جاساپ، جەلىدە ساتۋ، ءۇنحاتتا ۇگىتتەۋ، ەرەن بازاردا كورمەگە قويۋ سياقتى تاسىلدەردى پايدالانۋ جانە «شىرعاناق تاۋىعى» ماركاسىنا ءوتىنىش ەتۋ ارقىلى ەكولوگيالىق ءونىم رەتىندە جارنامالاپ، ساۋ جينشياڭعا بازاردىڭ كەڭ ءورىسىن اشادى. كوپ وتپەي، ونىڭ ونىمدەرى قالىڭ تۇتىنۋشىلاردىڭ القاۋىنا بولەنەدى، «شىرعاناق تاۋىعى» دا الىس - جاقىنعا بەلگىلى بولىپ، قارامايلى، ءۇرىمجى سياقتى ۇلكەن قالالاردا ساتىلا باستايدى. ساۋ جينشياڭ ادال ەڭبەگىمەن اقشا تاۋىپ، جىلدىق تابىسىن 400 مىڭ يۋاننان اسىرادى.

    «شىرعاناق تاۋىعى» شىڭگىل اۋدانىنىڭ ەرەكشە اۋىل شارۋاشىلىق ونىمدەرىنىڭ بەتكە ۇستارىنا اينالعاننان كەيىن، ساۋ جينشياڭ تاۋىق ءوسىرۋ تەحنيكاسىن اينالاسىنداعى ءار ۇلت جۇرتشىلىعىنا بۇكپەسىز ۇيرەتىپ، ولاردى اۋقاتتانۋ جولىنا باستايدى. ساۋ جينشياڭ تاۋىق فەرماسىنىڭ قىستاقتاعى قولايلى جاعدايىنان پايدالانىپ ىلگەرىندى - كەيىن 40 نەشە كەدەيدى جۇمىسقا الادى، قىستاقتاعى 25 كەدەي وتباسىنا 5000 شوجە، 2 توننا جەم تەگىن ۇلەستىرىپ، ولاردىڭ تاۋىق وسىرۋىنە جەتەكشىلىك ەتەدى، سونىڭ ارقاسىندا ءاربىر كەدەي وتباسىنىڭ تابىسى 5000 يۋاننىڭ ۇستىندە وسەدى، «شىرعاناق تاۋىعىن» ءوسىرۋدىڭ تەحنيكالىق تالاپتارىن يگەرگەن كەدەي ەگىنشى - مالشىلاردىڭ دا قاتارى وسە تۇسەدى.

    بيىل 39 جاستاعى ءۇمىت شارشابەك ۇلى دا سولاردىڭ ءبىرى، قىزمەت اترەتىنىڭ ورنالاستىرۋىمەن ءۇمىت ساۋ جينشياڭنان تاۋىق ءوسىرۋ تەحنيكاسىن ۇيرەنەدى. ءۇمىت: قىزمەت اترەتىنىڭ مەنى ساۋ اپەكەدەن تەحنيكا ۇيرەنۋگە ورنالاستىرعانىنا جانە مەنى شوجەمەن تەگىن قامداعانىنا العىس ايتامىن، شوجەلەردە جايسىزدىق بايقالسا، ول كىسى ۇيگە كەلىپ ءجون كورسەتىپ وتىرادى، وتكەن جىلى تەك تاۋىق وسىرۋدەن 10 مىڭ يۋانعا جۋىق تابىس تاپتىم، بيىلعى تابىسىمنىڭ ونان دا مول بولاتىنى داۋسىز، - دەدى.

جاۋاپتى رەداكتور: جازيرا بولاتباي قىزى