باعدارلامام باعالى بولسىن دەسەڭىز

  • كەلۋ قاينارى: ىلە گازەتى
  • 03:37:03 15/06/2018

 

    اينۇر كامال قىزى

 

    ءدۇبىرلى دۇنيەنىڭ دامۋىنا كوز سالساق ءداۋىردىڭ دامۋ اياق الىسى بارعان سايىن تەزدەپ، زامان تالابىنىڭ بارشا ادامزات تۇرمىسىنا، رۋحاني وي دۇنيەسىنە جاساعان ىقپالى دا ايرىقشا دارالانۋدا. وسىعان ساي جەكە ادامداردىڭ كۇندەلىكتى تۇرمىستاعى تالابى دا ءار ءتۇرلى بولىپ، وتباسىنداعى تەلە بەرىلىمدەرىن تاڭداپ كورۋ تالعامى كۇن ساناپ جاڭارىپ، راديو ـ تەلەۆيزيا بەرىلىمدەرىنە سىن كوزبەن قارايتىن بولدى. ارينە، ينتەرنەت ءداۋىرى دامىعان وسىناۋ التىن كەزەڭدە اركىم ءوز قالاۋىن ۇيدە وتىرىپ ـ اق وپ ـ وڭاي تابا الاتىن بولدى. وسى ورايدا كوزقاراقتى كورەرمەننىڭ كوڭىل قالاۋىنىڭ كوكجيەگىنەن ورىن الار ايدارىنان جەل ەسكەن ايتۋلى باعدارلاما دايىنداۋدىڭ دا قيىندىعى تەلە ونەرىنىڭ تەكتىلەرىنە از قىسىم الا كەلمەگەنى بەلگىلى. دەسە دە قىسىمنان قۋات الىپ، وڭتايلى ساتتە ورايىن تاۋىپ، حالىق قالاۋىنان شىعاتىن تاڭداۋلى باعدارلاما دايىنداۋ كاسىپ يەلەرىنىڭ قولىنان كەلەتىن شارۋا دەپ بىلەمىن. تومەندە تەلە باعدارلامالارىن دايىنداۋ بارىسىنداعى كوڭىل بولۋگە ءتيىستى باستى تۇيىندەرگە ازدى-كوپتى توقتالايىق.

    ءبىرىنشى، كەزەكتەگى ۇگىت ـ ءناسيحاتتىڭ باستى باعىتىن باعامداي ءبىلۋ كەرەك. ەلىمىزدەگى راديو ـ تەلەۆيزيا، گازەت ـ جۋرنالدار پارتيانىڭ ۇگىت ـ ءناسيحاتىن نەگىزگى ساتىعا جەتكىزۋ تەكشەسى. ەڭ اۋەلى وسى سالادا جۇمىس جاساپ وتىرعان ءاربىر قىزمەتكەر راديو ـ تەلەۆيزيا ۇگىت اقپاراتىنىڭ جەتەكشىسى بولعان پارتيانىڭ كەزەكتى ساياساتىن، ۇگىت قىزمەتىنە بولعان تالابىن سانالى تۇردە ۇعىنۋى، ءتۇسىنۋى كەرەك. قاي مەزگىلدە قاي مازمۇنداعى، قاي باعىتتاعى ۇگىت ـ تاربيە قىزمەتىن ورىستەتۋ قاجەتتىلىگىن بەس ساۋساعىنداي قانىق ءبىلۋى، وسىعان قاراي جوبا ـ جوسپار جاساۋى كەرەك.

    ەكىنشى، باعدارلاما جوباسى كەمەلدى بولۋ كەرەك. ءارقانداي ءىس ـ ارەكەت تولىق دايىندىق، جۇيەلى جوبا -جوسپارمەن اتقارىلعاندا ودان ۇلكەن اقاۋ شىقپايتىنى بەلگىلى. سول سەكىلدى سارا تۋىندى جاراتىپ، تاڭداۋلى تەلە باعدارلاماسىن دايىنداۋ ءۇشىن اي بۇرىن نەمەسە جىل بۇرىن جوبا جاساپ، جوسپار بويىنشا ارناۋلى دايىندىق قىزمەتى ىستەلۋ كەرەك. مۇندا قانداي مازمۇنداعى باعدارلاما قانداي فورمادا تۇسىرىلەدى؟ قاي ورىندا، كىمدەر اتسالىسادى؟ قاجەتتى جابدىقتاردىڭ قامدالۋى قالاي؟ مۇنىڭ ءبارىن الدىن الا تولىق ويلاستىرماسا ءىستىڭ ءساتتى بولۋى ەكىتالاي.

    ءۇشىنشى، سوڭعى كىرىستىرۋ، رەداكسيالاۋ جۇمىستارىنىڭ ءجۇرىلۋى كاسىپتىك ورەدە عىلمي، جاڭالىققا باي بولۋى كەرەك. باعدارلاما ءتۇسىرىلىپ بولعاننان كەيىن ونى كىرىستىرىپ جاساپ، وڭدەۋ بارىسى دا اسا وڭاي شارۋا ەمەس. جاڭا داۋىردەگى جاڭالىققا جانى قۇشتار كورەرمەننىڭ كوڭىلىنەن شىعاتىن باعدارلاما جاراتۋ ءۇشىن فورماسى الۋان ءتۇرلى، مازمۇنى باي، ەستەتيكالىق بەينەلەۋ قۋاتى كۇشتى بولعانى ابزال. باعدارلامانىڭ باعىن اسىراتىن تاعى ءبىر فاكتور ونىڭ سوڭعى كىرىستىرىپ جاسالۋى بولماق. ارينە، كەيدە باستاماسى تارتىمدى، سۇيەمەل مۋزىكاسى جاعىمدى، كىرىستىرىلۋى كۇشتى، تۇنىقتىعى جوعارى باعدارلامانى كوپ ساندى ادامداردىڭ ۇناتىپ كورەتىنى تابيعي. سوندىقتان، كىرىستىرۋ بارىسىنداعى كەيبىر زامانعا ساي تەحنيكالىق وڭدەۋلەردىڭ دە قاجەتتىلىگى اسا جوعارى.

جاۋاپتى رەداكتور: گۇلدەن ماقسات قىزى