جۇڭگو حالىقارالىق اۆياتسيا سەرىكتەستىگى شينجياڭعا قاتىنايتىن اۆياتسيا جەلىسى بويىنشا ەڭ ۇلكەن جولاۋشىلار ۇشاعىن ىسكە قوسادى

  • كەلۋ قاينارى: شينجياڭ گازەتى تورابى
  • 08:50:21 19/06/2018

 

 ۇشاق ءۇرىمجى - بەيجيڭ جەلىسىندە قاتىنايدى

 

 ءتىلشىمىز شى شين 6 - ايدىڭ 16 - كۇنى ۇرىمجىدەن حابارلايدى. جۇڭگو حالىقارالىق اۆياتسيا سەرىكتەستىگى 7 - ايدىڭ 1 - كۇنى ءۇرىمجى - بەيجيڭ جەلىسىندە بوين 777 ۇلكەن ۇشاعىنان ۇشەۋىن ىسكە قوسادى، سونىمەن بۇل اۋە جەلىسى ءار جولى 387 جولاۋشى ارتىق تاسىمالداپ، تاسىمالداۋ مولشەرى %38كە جۋىق ارتادى.

    بۇل − جۇڭگو حالىقارالىق اۆياتسيا سەرىكتەستىگىنىڭ شينجياڭنىڭ ساياحات كاسىبىنىڭ دامۋىنا دەم بەرۋىندەگى شارالارىنىڭ ءبىرى ەسەپتەلەدى.

    جۋىق جىلداردان بەرى، شينجياڭ ساياحات كاسىبى ساياحاتتىڭ قامداۋ جاعىنداعى قۇرىلىمدىق رەفورمانى تەرەڭدەتىپ، ساپالى ساياحات قۇرىلىسىن كۇشەيتۋدەن تارتىپ، تۇتاس الاپتىق ساياحات ۇستانىمىن جەتەكشى ەتۋگە دەيىن حالىقتىڭ تاماشا تۇرمىسقا دەگەن تالپىنىسىن ۇزدىكسىز قاناعاتتاندىرۋعا كۇش سالدى. جۇڭگو حالىقارالىق اۆياتسيا سەرىكتەستىگى ۇشاق تۇرپاتىن جاڭالاۋ، اۋە جەلىسىن كەڭەيتۋ ارقىلى اۆياتسيالىق ساياحاتتىڭ تەز ارتۋ جاعىنداعى تالابىن بارىنشا قاناعاتتاندىردى.

    ۇعىسۋعا قاراعاندا، قازىر جۇڭگو حالىقارالىق اۆياتسيا سەرىكتەستىگىنىڭ ءۇرىمجى - بەيجيڭ اۋە جەلىسىندە ءار كۇنى 6 كەزەك جولاۋشى ۇشاعى قاتىنايدى. 6 - ايدىڭ 20 - كۇنىنەن باستاپ سەرىكتەستىك بەيجيڭ - ءۇرىمجى - حوتان اۋە جەلىسىندەگى جانە بەيجيڭ - ءۇرىمجى - قاشقار اۋە جەلىسىندەگى ۇشاق سانىن اپتاسىنا 5 كەزەكشى ۇشاققا مولايتادى. اۋە جەلىلەرىن اشۋ جانە كەزەكشى ۇشاقتاردى مولايتۋ ارقىلى سەرىكتەستىك شينجياڭنىڭ قاتىناس - تاسىمالىنداعى قيىنشىلىقتى شەشىپ، شينجياڭداعى قىزمەت كورسەتۋ قابىلەتىن جاپپاي جوعارىلاتىپ، شينجياڭنىڭ اۆياتسيالىق ساياحاتىنىڭ دامۋىن ونان ارى ىلگەرىلەتەدى.

    شينجياڭداعى اۋە جەلىسى جاعىندا، جۇڭگو حالىقارالىق اۆياتسيا سەرىكتەستىگى ايماق، وبلىستاردا جاڭا اۋە جەلىلەرىن ۇزدىكسىز ىسكە قوسىپ، بەيجيڭ - قۇمىل - شىحىزى، بەيجيڭ - قۇمىل - تۇرپان، بەيجيڭ - قارامايلى - قۇلجا، تيانجين - ءۇرىمجى - قۇلجا، چىڭدۋ - حوتان سياقتى اۋە جەلىلەرىن ىلگەرىندى - كەيىندى اشتى.

    جۋىردا، جۇڭگو حالىقارالىق اۆياتسيا سەرىكتەستىگى اۆتونوميالى رايوندىق دامۋ - رەفورما كوميتەتىنىڭ ازاماتتىق اۆياتسيانىڭ بەلەت باعاسىن تومەندەتۋ ۇندەۋىنە بەلسەنە ءۇن قوسىپ، ۇرىمجىدەن قاشقارعا، ۇرىمجىدەن حوتانعا قاتىنايتىن ۇشاقتاردىڭ بەلەت باعاسىن 2780 يۋاننان جەكە - جەكە 1970 يۋانعا جانە 2010 يۋانعا تومەندەتىپ، شينجياڭنىڭ ازاماتتىق اۆياتسيا بازارىنداعى بەلەت باعاسىن تومەندەتكەن تۇڭعىش اۆياتسيا سەرىكتەستىگى بولدى.

جاۋاپتى رەداكتور: گۇلدەن ماقسات قىزى