قىزمەت گرۋپپاسى نەگىزگى ساتىدا يگىلىكتى ءىس ىستەپ، حالىق قالاۋىنان شىقتى

  • كەلۋ قاينارى: ىلە گازەتى
  • 09:31:06 20/06/2018

 

    تۇتاس رايونىمىز كولەمىندە ورىستەتىلىپ وتىرعان «ۇلتتار ىنتىماعىنىڭ بەرەكەلى شاڭىراعى» اتىنداعى تۋىستاسۋ قيمىلى مەن نەگىزگى ساتىلارعا بارعان قىزمەت اترەتىندە جۇرتتى اسەرلەندىرەرلىك كوپتەگەن ىزگى ءىس جارىققا شىقتى، بۇل قوعام ورنىقتىلىعى مەن ۇلتتار ىنتىماعىن بەكەمدەۋگە بەرىك نەگىز قالادى. سول تۋىستاسۋ قيمىلى مەن نەگىزگى ساتىعا بارعان قىزمەت گرۋپپاسىنىڭ ونەگەلى ۇلگىسى بولعان كادرلاردىڭ ءبىرى دولقىن. ول ىلە وبلىستىق ۇلت، ءدىن ىستەرى كوميتەتىنەن 2014 – جىلى قورعاس اۋدانىنىڭ لانگار اۋىلىنا بارعان «ۇعىسۋ، تيىمدىلىك جاساۋ، توعىستىرۋ» قىزمەت اترەتىندەگىلەرمەن بىرگە ەكى جىلداي قىزمەت وتەۋ بارىسىندا اۋىز تولتىرىپ ايتارلىق ەلەۋلى ەڭبەك ءسىڭىرىپ، ىلە وبلىستىق ساياسي – زاڭ كوميتەتى جاعىنان ۇزدىك قىزمەتكەر بولىپ باعالانعان بولاتىن.

    دولقىن بيىلعى «ۇلتتار ىنتىماعىنىڭ بەرەكەلى شاڭىراعى» اتىنداعى تۋىستاسۋ اپتالىعى قيمىلىندا ءوزىنىڭ تۋىستاسىپ، دوس بولعان قۇلجا اۋدانى اراوستەڭ اۋىلى ويمانبايتوقاي قىستاعىنداعى كەدەي وتباسى ما دى -يىڭگە قۇنى ءبىر مىڭ 500 يۋاندىق ءتۇستى تەلەۆيزور ساتىپ الىپ بەرىپ قامقورلىق جاساۋمەن بىرگە، قازىرگە دەيىن ونىڭ وتباسى قيىنشىلىعىنا كومەكتەسىپ كەلەدى. دولقىن ءار جولعى تۋىستاسۋ قيمىلى كەزىندە سول قىستاقتاعى تۇرعىنداردىڭ اۋىر جۇمىستارىنا بەل شەشە كىرىسىپ، قيىنشىلىعى اۋىر وتباسىلارعا ءوز جانىنان اقشا شىعارىپ قول ۇشىن بەرىپ جۇرەدى. سونىمەن بىرگە، بيىل 5 – ايدا قىزمەتتەسى تاسقىن ەكەۋى قۇلجا اۋدانى اراوستەڭ اۋىلى ويمانبايتوقاي قىستاعىنا تۇسكەن قىزمەت گرۋپپاسىنىڭ مونشاسىن ورناتىپ بەرۋ ءۇشىن، اراوستەڭ اۋىلىنا كەتىپ بارا جاتقان جولىندا موتو شىرعالاڭىنا ۇشىراپ جول شەتىندە ەس – تۇسسىز جاتقان ءبىر ديقاندى دەرەۋ شيپاحاناعا جەتكىزىپ، اجالدان اراشالاپ قالادى. ونىڭ ءبىر يىعى سىنىپ، دەنەسى بىرنەشە جەردەن جارالانعان بولاتىن، بۇل ادامدا بۇرىننان قانتتى نەسەپ اۋرۋى بار بولعاندىقتان، يىعىنا وپەراتسيا جاساۋعا بولمايتىن – دى، دولقىن مۇنى شيپاگەردەن سۇراپ ۇعىسقان سوڭ، وعان سىنىق سالاتىن ارناۋلى وتاشى اكەلىپ، ونىڭ ءوز ۇيىندە جاتىپ ەمدەلۋىنە وراي جاراتىپ بەرەدى.

    دولقىننىڭ قىزمەت گرۋپپاسىنداعىلارمەن بىرگە نەگىزگى ساتىعا بارىپ قىزمەت وتەۋ بارىسىنداعى سىڭىرگەن ەڭبەكتەرى مەن تۋىستاسۋ اپتالىعى قيمىلى كەزىندەگى ىستەگەن يگى ىستەرى جۇرت القاۋىنا بولەنگەندىكتەن، ىلە تەلەۆيزياسىنىڭ حانزۋشا ارناسىندا 6 – ايدىڭ 6 – كۇنى ارناۋلى بەرىلىپ جۇرتقا تانىستىرىلدى.

    اقىلباي مۇقامەتالي ۇلى

جاۋاپتى رەداكتور: گۇلدەن ماقسات قىزى