شي جينپيڭ فرانسيانىڭ زۇڭليى فيليپپەن كەزدەستى

  • كەلۋ قاينارى: ىلە گازەتى
  • 04:50:54 27/06/2018

 

    شينحۋا اگەنتتىگىنىڭ 6 - ايدىڭ 25 - كۇنى بەيجيڭنەن بەرگەن حابارى (ءتىلشى باي جيە). مەملەكەت ءتوراعاسى شي جينپيڭ 6 - ايدىڭ 25 - كۇنى حالىق سارايىندا فرانسيانىڭ زۇڭليى فيليپپەن كەزدەستى.

    شي جينپيڭ فيليپتىڭ جۇڭگوعا ساپارلاي كەلگەنىن قارسى الا كەلىپ، مىنالاردى اتاپ كورسەتتى: ماكرون زۇڭتۇڭ مەن زۇڭلي مىرزانىڭ جارتى جىلدىڭ ىشىندە بىرىنەن سوڭ ءبىرى جۇڭگوعا ساپارلاي كەلۋى فرانسيانىڭ جۇڭگو - فرانسيا قاتىناسىن دامىتۋعا باسا ءمان بەرگەندىگىن، جۇڭگو - فرانسيا قاتىناسىنىڭ جوعارى دەڭگەيىن ايگىلەدى. كەزەكتە دۇنيە جۇزىندە تەرەڭ، كۇردەلى وزگەرىستەر جارىققا شىعۋدا. جۇڭگو فرانسيامەن بىرگە جۇڭگو مەن فرانسيانىڭ جان - جاقتى ستراتەگيالىق سەرىكتەستىك قاتىناسىنىڭ مازمۇنىن ۇزبەي بايىتىپ، ەلدەر ارا ءوزارا قۇرمەت ەتۋدىڭ، ىنتىماقتاستىق جاساسىپ، تەڭ يگىلىككە كەنەلۋدىڭ، اۋىس - كۇيىس جاساسىپ، ءبىرىن - ءبىرى ۇلگى ەتۋدىڭ ۇلگىسى بولۋدى قالايدى.

    شي جينپيڭ مىنالاردى باسا دارىپتەدى: جۇڭگو مەن فرانسيا جان - جاقتى ستراتەگيالىق سەرىكتەر. تاراپتار سەرىكتەستىك تانىمىن كۇشەيتىپ، ءوزارا سەنىمدىلىككە، ءبىر - بىرىنە تەڭ تۇرعىدا مامىلە جاساۋعا تاباندى بولىپ، ءبىر - ءبىرىنىڭ وزەكتى مۇددەسى مەن نازار اۋدارىپ وتىرعان ماڭىزدى تۇيىندەرىنە قۇرمەت ەتۋى جانە كوڭىل ءبولۋى كەرەك. جۇڭگو مەن فرانسيانىڭ وزدەرىنىڭ پىكىرلەسۋ، اۋىس - كۇيىس مەحانيزمى مەن تۇعىرلىق رولىن تولىق ساۋلەلەندىرىپ، ءوزارا ءتۇسىنىسۋدى ارتتىرىپ، ءوزارا سەنىمدىلىكتى تەرەڭدەتۋى قاجەت. ناقتى جۇمىس تىندىرۋ جاعىنداعى ىنتىماقتاستىقتى كۇش سالا تەرەڭدەتىپ، جاساسقان ءتۇرلى ىنتىماقتاستىق ورتاق تانىمدار مەن كەلىسىمدەردى تەز ارادا تياناقتاندىرىپ، كەلەلى نىسانداردىڭ جەتەكشىلىك، باستاماشىلدىق رولىن ويداعىداي ساۋلەلەندىرىپ، ىنتىماقتاستىقتىڭ جاڭا ارتۋ تۇيىندەرىن جەدەل جەتىلدىرۋى ءتيىس. جۇڭگو فرانسيانىڭ «ءبىر بەلدەۋ، ءبىر جولدى» بىرگە قۇرۋ ىنتىماقتاستىعىنا بەلسەنە ات سالىسۋدى قولداعاندىعىن القايدى. بىرگە اقىلداسۋ، بىرگە قۇرۋ، تەڭ يگىلىككە كەنەلۋ پرينسيبىمەن «ءبىر بەلدەۋ، ءبىر جول» باستاماسىنىڭ فرانسيانىڭ جانە ەۆروپا وداعىنىڭ دامۋ ستراتەگياسىمەن ءونىمدى ۇشتاسۋىن جۇزەگە اسىرۋدى قالايدى. تاراپتار كوپ جاقتىلىق تۋىن بىرگە كوتەرىپ، ءادىل، تۋراشىل بولىپ، حالىقارالىق قاتىناستىڭ نەگىزگى ولشەمىن بىرگە قورعاۋى كەرەك. جۇڭگو ەۆروپا وداعىمەن بىرگە قۇلشىنىپ، جۇڭگو - ەۆروپا وداعى قاتىناسىنىڭ نىق قاداممەن باياندى بولۋىن ىلگەرىلەتۋدى قالايدى.

    فيليپ بىلاي دەدى: ماكرون زۇڭتۇڭنىڭ جىل باسىندا جۇڭگوعا ءساتتى ساپاردا بولۋى فرانسيا مەن جۇڭگونىڭ ستراتەگيالىق ىنتىماقتاستىعىنىڭ ماڭىزدىلىعىن تاعى دا ايگىلەدى. جۇڭگودا بولاشاق جوبا بار ءارى تىڭعىلىقتى ىستەي الادى، دامۋ جەتىستىگى كىسىنى سۇيىندىرەدى. فرانسيا فرانسيا - جۇڭگو قاتىناسىنا تولىق سەنىم ارتادى. ەكى ەلدىڭ ەكونوميكا - ساۋدا، مادەنيەت اۋىس - كۇيىسىن ۇزدىكسىز تەرەڭدەتىپ، حالىقتىق يادرو ەنەرگيا، اۆياتسيا، عارىش سياقتى ستراتەگيالىق ىنتىماقتاستىقتى ىلگەرىلەتۋدى قالايدى. «ءبىر بەلدەۋ، ءبىر جول» باستاماسى بولاشاقتى بەتكە العان ىنتىماقتاستىق وي، بۇل بۇكىل ادامزاتتىڭ مۇددەسىنە ۇيلەسەدى. فرانسيا حالىقارالىق ىستەردە دەربەس، ءوز - وزىنە قوجا بولۋ ساياساتىنا تاباندى بولادى. كوپ جاقتىلىق سىن - سايىستارعا ءدوپ كەلگەن بۇگىنگى كۇندە ورنىقتى ىنتىماقتاستىق سەرىگى بولۋى توتەنشە باعالى. فرانسيا جۇڭگومەن بىرگە دۇنيە ءجۇزىنىڭ بەيبىتشىلىگى مەن ورنىقتىلىعىن جەبەۋگە بىرگە كۇش سالۋدى، ەۆروپا وداعى مەن جۇڭگونىڭ ىنتىماقتاستىق قاتىناسىن كۇشەيتۋدى قالايدى.

    ياڭ جيەچى، ۋاڭ ي، حى ليفىڭ قاتارلىلار كەزدەسۋدە بىرگە بولدى.

جاۋاپتى رەداكتور: گۇلدەن ماقسات قىزى