كۇركەشەدەن كۇللى الەمگە

  • كەلۋ قاينارى: ىلە گازەتى
  • 10:43:50 06/07/2018

   

    _ وتانىمىزدىڭ 40 جىلدىق رەفورما جەمىسىنە ارناۋ

    تاۋلەنقان مۇقاتاي ۇلى

 

    ءوز كوزىمە ءوزىم سەنبەيمىن، ءوز ويىما ءوزىم جەتە الماي كەلەمىن! نەگە دەيسىز–اۋ! سەبەبى: 40 جىلدىڭ الدىنداعى كورگەندەرىم كۇركەشەدەگى تىرلىك بولاتىن. ال وعان قاراعاندا بۇگىنگى كورگەندەرىم كورگەن ءتۇس سەكىلدى. امالياتتا رەالدىق. 40 جىلدىڭ الدىنداعى ويلارىم _ ەرتەڭ نە ءىشىپ، نە جەيمىز؟ قىستان ءوتۋدىڭ قامى ءۇشىن تەزەك تەرۋ، وتىن شابۋ، تەزەك، وتىن تاۋسىلسا نە جاعامىز؟ بيىلعى استىق ءونىمى ىشەرلىككە جەتە مە؟ بارلىق جاننىڭ ويلايتىنى الاي تارتسا دا جەتپەي، بىلاي تارتسا دا جەتپەي جاتاتىن جۇپىنى تۇرمىس قامى بولاتىن... ال 40 جىلدان كەيىنگى بۇگىن ادامداردىڭ ويلايتىنى مۇلدە باسقاشا! بۇرىنعى ويلايتىن ىشەر اس، كيەر كيىم، كۇركەشە ءۇي، ءمىنىس كولىككە ۆەلوسيپەد بولسا دەگەن ويلار ادامداردىڭ ويىنان مۇلدە ۇمىت بولعان! مىنە وسى رەالدىقتار بۇگىن مەنى ءوز كوزىمە ءوزىمدى سەندىرمەي، ءوز ويىما ءوزىمدى جەتكىزبەي كەلە جاتقان شىندىق ەدى...

    ءبىز 2018–جىلى 5–ايدىڭ 5–كۇنى تاڭعى ساعات 9 دا شاۋەشەك اۋەجايىنان ۇشاققا وتىرىپ، كەڭىستىككە كوتەرىلدىك. بۇل جٶلعى ساپارىمىز ەلىمىز رەفورماسىنىڭ تەرەزەسى بولعان شىنجىن قالاسىنا بارىپ 19–قۇرىلتاي رۋحى مەن جاڭا دامۋ كوزقاراسىن ۇيرەنۋ بولاتىن. شاۋەشەكتەن ۇشىپ، ءۇرىمجى اۋەجايىنان ۇشاق الماستىرىپ، شىنجىن قالاسىنا كۇنبە–كۇن جەتۋ ەدى. كوڭىل كۇيىمنىڭ تەبىرەنۋى سونشالىق ۇشاق اۋەجايدان ىسقىرىپ كەڭىستىككە كوتەرىلگەندە بالا كۇنىمدەگى مىنا اڭگىمە ەسىمە ورالا كەتتى.

    _ اجە، ءبىز ادامدار نەگە قۇستار قۇساپ ۇشا المايمىز؟–دەپ سۇراعام اجەمنەن.

    _ ە، بالام، ادامدار دا ۇشا الادى. ەرتەكتەردە ادام اعاش اتقا، كىلەمگە ءمىنىپ ۇشادى دەپ ايتىلعان. جانە قوي ۇستىنە بوزتورعاي جۇمىرتقالاعان زامان بولادى. سەندەردىڭ زاماندارىڭ وسىعان تۋرا كەلەدى. وتان امان بولسا سەندەر ءبارىن دە كورەسىڭدەر،–دەگەن ەدى اجەم.

    ۇشاق لەزدە ءدوربىلجىن اۋدانىنىڭ سولتۇستىك قيىس توبەسىنەن قالىقتاپ، ورقاشار تاۋىنىڭ تۇستىك توبەسىنەن اسىپ، ۇرىمجىگە ءتۇزۋ بەتتەدى. ۇشاقتا وتىرىپ وتان توپىراعىنا قاراعاننىڭ ءوزى ءبىر عانيبەت ەكەن. جاسىل ورمانمەن جيەكتەلگەن تاقتالار، عيماراتتار، ساۋلەتتى كوشەلەر، تارام–تارام اسفالت جٶلدار، جٶلداردا زىمىراعان اۆتوكولىكتەر، موتوتسيكلدەر بارلىعى دا 40 جىلدىڭ الدىنداعى جەر كەپە كۇركەشە ۇيلەردى، ات اربا، بۇت ارتار كولىكتەردى جٶققا شىعارىپ، جٷپىنى تۇرمىس پەن ايلىق جٶلداردى كەلمەسكە كەتىرىپ، ادامداردىڭ زاتتىق وركەنيەت قاجەتىن الدە قاشان قامتاماسىزداندىرىپ، تاماشا ومىرگە شەرۋ تارتىپ بارا جاتقانداي.

    ءبىزدىڭ بۇگىنگى ساپارىمىز دا شاۋەشەكتەن سوناۋ تەڭىز جاعاسىنداعى شىنجىن قالاسىنا دەيىنگى 6 مىڭ كيلومەتر جٶلدى 6 ساعاتتا باسىپ، بۇرىنعىلار 6 ايدا باراتىن جەرگە 6 ساعاتتا جەتىپ، باتىس پەن شىعىستىڭ ارالىعىن ۋاقىت كەڭىستىگى بويىنشا ءبىر نۇكتەگە جيىپ قويعانداي بولماق. پا شىركىن! وسى قيالداردىڭ، قيال ەمەس–اۋ، رەالدىقتىڭ وي جەتەگىندە 40 جىلدا وتانىمىزدىڭ وسىنداي تەز قۇدىرەتتەنۋىن قولعا كەلتىرگەن ۇيتقى كۇشتىڭ ۇلى پارتيامىز بولعانىن وتانىمىزداعى بارلىق ازامات تۇسىنە بىلسە، قادىرلەي بىلسە قانداي عانيبەت ەدى دەپ تەبىرەندىم.

جاۋاپتى رەداكتور: گۇلدەن ماقسات قىزى