كۇركەشەدەن كۇللى الەمگە

  • كەلۋ قاينارى: ىلە گازەتى
  • 10:43:50 06/07/2018

    سول زاماندا ادامدار ارا حابار–وشار دەگەن حاتپەن بولاتىن. ايىنا–جىلىنا ءبىر حابارلاسۋشى ەدىك. قازىر وسى زامانعى ينفورماتسيانىڭ (تەلەگرامما، كومپيۋتەر، قولفون، ت.ب.) ارقاسىندا ادامدار دا ارالىق جٶق دەۋگە بولادى. كەز كەلگەن مينۋت، ساعاتتاردا ءبىرىن–ءبىرى كورىپ اڭگىمەلەسىپ، جۇمىستارىن ءبىتىرىپ جاتادى. ءبىر–بىرىنەن كەرەك–جاراقتارىن تاپسىرىق بەرىپ الىپ جاتادى. راديو، تەلەۆيزوردان كۇللى الەمنىڭ رۋحاني ازىعىمەن ازىقتانىپ جاتادى. كومپيۋتەردەن ءتىنتۋىر ارقىلى نە قاجەتىن ىزدەپ تاۋىپ جاتادى. پاي–پاي شىركىن! مىناۋ قانداي زامان؟ ويىم وسى اراعا كەلگەندە 1976–جىلى اجەم ايتقان " كەيىن ادامدار كۇللى جەر شارىنداعى قۇبىلىستار مەن بولمىستاردى شار اينادان كورىپ، ءبىلىپ وتىرادى،–دەگەن ەرتەك اڭىز ەسىمە كەلدى. راس–اۋ! سول كىسىلەر ايتقان شار اينا دەپ وتىرعانى مىنە بۇگىنگى تەلەۆيزور مەن كومپيۋتەردىڭ ءدال ءوزى عوي. كۇللى جەر شارىنداعى بولمىستار مەن قۇبىلىستاردى كەرەك–جاراق ءبارىن تاۋىپ ءبىلىپ وتىرمىز–عوي! وسىلاردى ويلاپ وتىرعاندا:

    _ مىرزا، قاي تۇردەگى تاعامعا تابەتىڭىز تارتادى؟–دەگەن ۇشاق بيكەشىنىڭ سىڭعىرلى داۋىسى نازارىمدى تاعى اۋداردى. مەن تاۋىق ەتى قۋىرماش مەن كۇرىش بىقتىرماسىن بۇيىرىپ ۇشاقتاعى تۇسكى اسقا وتىردىم...

    قانداي ءدامدى، قازاننان جاڭا شىققان تاعامنان اۋمايدى. ۇشاقتاعى ورىندىققا قاراپ ساناسام 300 دەن استام جولاۋشى ءبىر ۋاقىتتا تاماقتانىپ جاتىر. ۇشۋ قارقىنىمىز 1000 كيلومەتر، جەر بەتىنەن 10 مىڭ مەتر بيىكتە. ارينە تاعام جەر بەتىندە دايارلانعانىمەن، قازىر كەڭىستىكتە جولاۋشىلاردىڭ تابەتىن قاناعاتتاندىرىپ وتىر. قانداي عاجاپ، قانداي اسەرلى دەسەڭىزشى! ستۋدەنت كەزىمىزدە جەر بەتىندە ءجۇرىپ قارا سۋ ىشكەن ءبىز بۇگىن كەڭىستىكتە ءدامى ءتىل ۇيىرەتىن تاعام جەپ وتىرىپ، 1000 كيلومەتر قارقىنمەن ساپارلاپ بارامىن! فيلوسوفيا عىلىمىندا ايتىلاتىن ۋاقىت، ورىن، شارت–جاعداي، كەڭىستىك ءبىر نۇكتەگە جينالىپ، ءبارى ءبىر ۋاقىتتا شەشىم تاپقانداي!

    ءتىپتى وسى ساتتە مەنىڭ وسى ۇشاقتاعى، وسى شوعىر ادامداردىڭ قازىرگى جاعدايىنان قاراعانداعى كوڭىل كۇيىم كوممۋنيزمگە جەتىپ العانداي ەدى نەمەسە كوممۋنيزم تۇبىندە جٷزەگە اسادى دەگەن سەنىمىمدى راستاي تۇسكەندەي ەدى. پارتيانىڭ 19–قۇرىلتايىندا تۇجىرىمداعان ەلىمىز سوتسياليزمنىڭ جاڭا داۋىرىنە كىردى، ەلىمىز قوعامىنىڭ باستى قايشىلىعى حالىقتىڭ كۇن سايىن ارتىپ وتىرعان تاماشا تۇرمىس قاجەتى مەن دامۋدىڭ بىركەلكى، تولىق بولماۋى اراسىنداعى قايشىلىق دەلىندى.

    پارتيامىز قانداي دانىشپان، قانداي كورەگەن دەسەڭىزشى؟ قازىرگى ەلىمىز قوعامىنىڭ باستى قايشىلىعىن ءداپ باسىپ كورسەتىپ وتىر. بۇرىن باستى قايشىلىق حالىقتىڭ كۇننەن كۇنگە ارتىپ وتىرعان زاتتىق قاجەتى مەن مەشەۋ وندىرگىش كۇش اراسىنداعى قايشىلىق بولاتىن. ال قازىر زاتتىق وركەنيەت مولىقتى (ىشەر اس، كيەر كيىم، تۇرعىن ءۇي، كولىك) مەشەۋ وندىرگىش كۇش جٶيىلدى (ماشينالاسقان ءوندىرىس، تامشىلاتىپ سۋارۋ،ت.ب.) قازىر قوعامدا حالىقتىڭ كۇننەن كۇنگە ارتىپ وتىرعان تاماشا تۇرمىس قاجەتى جارىققا شىقتى (تاماشا تۇرمىس زاتتىق وركەنيەت پەن رۋحاني وركەنيەتتى، ساياسي وركەنيەتتى قامتيدى). ياعني جەتكىلىكتى بولماي وتىرعانى بارلىق ءوڭىر، بارلىق ادامداردىڭ تابىسى جەتكىلىكتى ەمەس، بىركەلكى بولماۋى وڭىرلەر مەن وڭىرلەر، رايوندار مەن رايوندار، ادامدار مەن ادامداردىڭ تابىسى بىركەلكى ەمەس، ءبىرى جٶعارى، بىرەۋلەرى تومەن كىرىستە. پارتيامىز ەندى وسىنى قالاي شەشۋگە قۇلشىنۋدا. كوڭىل كۇيىم شارىقتاپ وسى اراعا كەلگەندە، 3–ايدا قىستاققا ءتۇسىپ، مالشى سەمياسىندا جاتقانداعى اۋىل اقساقالىنىڭ ايتقاندارى ەسىمە ورالدى.

جاۋاپتى رەداكتور: گۇلدەن ماقسات قىزى