شوڭقۇشتاي قىستاعى ەرەكشە مەرەكەلىك قيمىلمەن ساياحات كاسىبىنىڭ دامۋىن جەبەدى

  • كەلۋ قاينارى: ىلە گازەتى
  • 10:59:08 06/07/2018

 

    ەرىكتى ءتىلشى قاھار ەشەن ۇلى تەكەستەن حابارلايدى. 7–ايدىڭ 1–كۇنى پارتيانىڭ قۇرىلعان ءارى تۋىلعان كۇنى. سوعان وراي تەكەس اۋدانى قارادالا قالاشىعى شوڭقۇشتاي قىستاعى ءۇشىنشى كەزەكتى اقىندار ايتىسى، مادەنيەت–دەنەتاربيە قيمىلىن وتكىزدى.

    قىستاقتاعى ءار ۇلت كادرلارى مەن بۇقارا، قىستاقتا تۇراتىن قىزمەت اترەتى، قىستاقتا تۇراتىن ءار دارەجەلى كۇشتەر، ارتقى ساپ ورىندار، ساياحاتشىلار بولىپ جالپى ءبىر مىڭ 200 دەن استام ادام قيمىلعا قاتىناستى. كوپشىلىك پارتيانىڭ ەرەن ەڭبەك، ۇلى ۇلەسىن جىرعا قوسىپ، پارتيانىڭ شاپاعاتىنا راقىمەت ايتىپ، اۋەلگى ماقساتتى ۇمىتپاي، بورىشتى ەستە بەرىك ساقتاپ، باتىلدىقپەن جاۋاپكەرلىك ارقالاپ، پارتيانىڭ مەيىرىن سەزىنىپ، پارتياعا ىلەسىپ، كورىكتى مەكەن قۇرۋ ءۇشىن تىنباي قۇلشىناتىندىقتارىن ءبىلدىردى.

    اقىندار ايتىسى جانە كوركەمونەر ويىندارى اراسىندا دۋلات، قايرات قاتارلى اقىندار پارتيا قۇرىلعاندىعىنىڭ 97 جىلدىعىن، «ۇلتتاردىڭ بەرەكەلى شاڭىراعىن» تىلگە تيەك ەتىپ جىر تولعادى. ولار جاعىمدى اۋەن، يۋمورلى تىلمەن ءار ۇلت بۇقاراسىنىڭ بەرەكە–بىرلىگىن، ەڭبەكشىلدىگىن، قاراپايىمدىلىعىن، وركەنيەت پەن عىلىمدى قاستەرلەيتىن جاڭا اۋاندى بەينەلەدى ءارى ساياحاتشىلاردى قازاق ۇلتى مادەنيەتىمەن سۋسىنداتتى.

    ويىن نومىرلەردى تاماشالاعان ساياحاتشى جاڭ شياۋنا بىلاي دەدى: «مۇندا كەلگەلى كوڭىلىم كوتەرىڭكى، جانىم جادىراڭقى، بۇل جەردىڭ قۇراعىنا دا، بۇلاعىنا دا قۇلاي قۇمارتتىم. الگىندە عانا اقىندار ايتىسىنىڭ اشىلۋ سالتىن تاماشالادىم، بۇل مەنىڭ ەشبىر ساپارىمدا كەزدەستىرمەگەن قۋانىشىم».

    شوڭقۇشتاي قىستاعى پارتيا ياچەيكاسىنىڭ شۋجيى ەركىن تۇردىباي ۇلى بىلاي دەدى: «ءبىزدىڭ قىستاق جۇڭگونىڭ تاريحي مادەنيەت قىستاعى، ءبىز بۇقارانىڭ ساياحات شارۋاشىلىعىن دامىتۋىنا باستاماشىلىق ەتەمىز، بۇل رەت وتكىزىلىپ وتىرعان ۇلتتىق ەرەكشەلىكتەگى قيمىلدىڭ ماقساتى جەرگىلىكتى مادەنيەتىمىزدى ۇگىتتەپ، ءتىپتى دە كوپ ساياحاتشى باۋراپ، ساياحات شارۋاشىلىعىن دامىتىپ، مالشىلاردىڭ تۇرمىس ورەسىن، مادەنيەت ساپاسىن بارىنشا جوعارىلاتۋ».

    ىلە–شالا مەيىربان انالار اترەتى ويىن كورسەتىپ، كەشكى مەكتەپ وقۋشىلارى تاڭ ءداۋىرىنىڭ جىرلارىن مانەرلەپ وقىدى. قازاقتىڭ حالىق ءبيى «قارا جورعا» مۋزىكاسىنىڭ شىعىسىمەن مايدانداعى كورەرمەن قوتارىلا بيگە باسىپ، قيمىلدى قىزدىرا ءتۇستى.

    قيمىل كۇنتارتىبى بويىنشا 10 كيلومەترلىك، 5 كيلومەترلىك ات بايگىسى، كوكپار، قىز قۋار، اۋدارىسپاق وتكىزىلىپ، وعان ساياحاتشىلار دا قاتىناسىپ، مادەنيەت ساياحاتىنىڭ مەرەيىن اسىردى. وبلىستىق ونەركاسىپ–ساۋدا بانكەسىنەن قارادالا قالاشىعى شوڭقۇشتاي قىستاعىنا «ۇعىسۋ، تيىمدىلىك جاساۋ، توعىستىرۋ» قىزمەتىمەن تۇسكەن اترەت باستىعى جاڭ يۇيپيڭ بىلاي دەدى: «قىستاق حالقىنىڭ كاسىپتەن سىرتقى تۇرمىسىن بايىتۋ ءۇشىن كۇش–قۋاتتى شوعىرلاندىرىپ، بۇگىن ەكى قيمىلدى قاتار وتكىزىپ وتىرمىز، بۇل ەگىنشى–مالشىلاردىڭ مادەني تۇرمىسىن بايىتۋمەن بىرگە ۇيىسۋ، شوعىرلانۋ قۋاتىن كۇشەيتەدى».

جاۋاپتى رەداكتور: گۇلدەن ماقسات قىزى