اۆتونوميالى رايونىمىزدىڭ سيفرلى ەكونوميكاسىنىڭ ومىرشەڭدىك كۇشى تاسقىنداي ءتۇستى

  • كەلۋ قاينارى: شينجياڭ گازەتى تورابى
  • 10:21:46 24/07/2018

  

  زاتتار ينتەرنەتى، ءىرى ساندى مالىمەت، بۇلت ەسەپتەۋ سياقتى تەحنيكالار ەكونوميكانىڭ، قوعامنىڭ ءتۇرلى سالالارىنا پايدالانىلدى

 

    ءتىلشىمىز ليۋ ي 7 - ايدىڭ 22 - كۇنى ۇرىمجىدەن حابارلايدى. 4000 شارشى مەترلىك قىزمەت ورتاسىندا 3 ميلليارد يۋاننىڭ ساۋداسى جاسالىپ، 800 ميلليون يۋاننىڭ ءونىم قۇنى جاراتىلىپ، 32 ميلليون يۋان سالىق تاپسىرىلدى، قىزمەت كولەمى ەۆروپاداعى كوپتەگەن ەلدەرگە كەڭەيدى... 7 - ايدىڭ 21 - كۇنى ءۇرىمجى ەكونوميكالىق، تەحنيكالىق اشۋ رايونىنداعى (توۋتۇنحى رايونى) جىجيڭ ەلەكتروندى ساۋدادا جاڭالىق اشۋ، شارۋاشىلىق قۇرۋ ورتالىعىنان ءتىلشى رايونىمىزدىڭ ەلەكتروندى ساۋدا ۋاكىل بولعان سيفرلى ەكونوميكاسىنىڭ ومىرشەڭدىك كۇشكە تولى ەكەنىن جەتە سەزىندى.

    وسى باقشا رايونىنا ىرگە تەپكەن يەلينماۋ ەلەكتروندى ساۋدا تۇعىرىنىڭ مەڭگەرۋشىسى جاۋ دۇڭلياڭ بىلاي دەپ تانىستىردى: كاسىپورنىمىز شينجياڭنىڭ جىبەك جولى ەكونوميكالىق بەلدەۋى وزەكتى رايونىن قۇرۋ سىندى ماڭىزدى ورايدى قولدان بەرمەي، شەكارا اتتاعان ەلەكتروندى ساۋدا تۇعىرىن قۇردى، كەزەكتە تۇعىرىمىزدا تىركەلگەن ەكسپورت ەتەتىن كاسىپورىننان 7000نان استامى بار، ونىمدەرى كيىم - كەشەك، قۇرىلىس ماتەريالدارى، شاعىن ماشينا - ەلەكتر جابدىقتارى سياقتى سالالارعا سايادى، بىلتىر جەلىدەگى ساۋدا سوماسى 50 ميلليون دوللاردان اسىپ، جىلدىق ارتۋ قارقىنى شامامەن %30 اينالاسىندا بولدى. جۇڭگو - ەۆروپا كەزەكشى پويەزىنىڭ قاتىناۋى سىندى ۇتىمدى ورايدان پايدالانىپ، كاسىپورنىمىز ورتا ازياداعى ەلدەردىڭ ساپالى اۋىل شارۋاشىلىق ونىمدەرىن، قولونەر بۇيىمدارىن ەل ىشىنە اكەلىپ ساتىپ، ساۋدانىڭ ىركىلىسسىزدىگىن ىسكە اسىردى.

    «بيىل سەرىكتەستىگىمىز شامامەن 120 ميلليون يۋان قارجى قوسىپ، جىبەك جولى ايالداماسى نىسانىن باستاپ، قازاقستان، پولشا، گەرمانيا قاتارلى ەلدەردە 7 قامبا سالۋدى جوسپارلاپ وتىر. ەكسپورت ەتۋشى كاسىپورىندار زاتتاردى الدىن الا كوپتەپ شەتەلدەگى قامباعا جەتكىزەدى، ونان سوڭ ينتەرنەت ارقىلى ەلەكتروندى ساۋدا جاساپ، ونىمدەردى سول جەردە ساتىپ، سول جەردىڭ وزىندە جەتكىزىپ بەرەدى»، - دەدى جاۋ دۇڭلياڭ.

    شەكارا اتتاعان ەلەكتروندى ساۋدا رايونىمىزدىڭ سيفرلى ەكونوميكاسىنىڭ دامۋىنىڭ ىقشام كورىنىسى. بۇل كۇندەرى زاتتار ينتەرنەتى، ءىرى ساندى مالىمەت، بۇلت ەسەپتەۋ سياقتى تەحنيكالار ەكونوميكانىڭ، قوعامنىڭ ءتۇرلى سالالارىنا پايدالانىلىپ، اۆتونوميالى رايونىمىز ەكونوميكاسىنىڭ دامۋىنا قۇدىرەتتى ومىرشەڭدىك كۇش سيلادى.

    مەجەگە قاراعاندا، 2017 - جىلى اۆتونوميالى رايونىمىزدىڭ سيفرلى ەكونوميكاسىنىڭ كولەمى شامامەن 250 ميلليارد يۋان بولىپ، GDPدا ۇستاعان سالىستىرماسى %22.9كە جەتىپ، ارتۋ قارقىنى الدىڭعى جىلداعىدان %15، GDPنىڭ ارتۋ قارقىنىنان %7.4 جوعارى بولدى. اسىرەسە، جۇمىسقا ورنالاسۋدى جەبەۋ جاعىندا سيفرلى ەكونوميكانىڭ ارتۋ قارقىنى %15.2كە جەتىپ، مەملەكەت بويىنشا الدىڭعى 10 ورىننىڭ قاتارىنا كىرگەن.

جاۋاپتى رەداكتور: گۇلدەن ماقسات قىزى