باستاۋىش مەكتەپتىڭ كومپيۋتەر وقىتۋى بارىسىندا وقۋشىلاردىڭ ۇيرەنۋ اۋەسىن ارتتىرۋ جونىندە

  • كەلۋ قاينارى: ىلە گازەتى
  • 09:03:43 28/08/2018

  

    گۇلزات قايرات قىزى

    ٴبىرىنشى، كومپيۋتەر ساباعىنا دەگەن اۋەستىگىن كۇشەيتۋ

    اۋەستىك - وقۋشىنىڭ بارلىق ساباقتاردى ۇيرەنۋىندە قوزعاۋشى رول اتقارادى. كومپيۋتەر ساباعىن العاش باستاپ وقىتقاندا وقۋشىنىڭ وسى ساباققا قىزىعۋشىلىعىن وياتىپ، ساباقتى جاقسى يگەرۋىنە نەگىز قالاۋ كەرەك. باستاۋىش مەكتەپ ساتىسىندا كومپيۋتەردىڭ الىپپەلىك ساباعى وقۋشىلار ٴۇشىن قيىن سەزىلەدى. كوپتەگەن وقۋشىلار كومپيۋتەردىڭ سىرتقى بولشەكتەرىن عانا بىلەدى دە، ىشكى بولشەكتەرى تۋرالى كوپ بىلە بەرمەيدى. مۇنداي جاعدايدا وقۋشىلارعا كومپيۋتەردىڭ بولشەكتەرىن ۇيرەتكەندە ونى ەسىنە تولىق ساقتاي المايدى نەمەسە ولاردى دۇرىس اجىراتا المايدى. بۇدان وقۋشىلاردىڭ ساباققا دەگەن بەلسەندىلىگى تومەندەيدى. بۇل كومپيۋتەر وقىتۋشىسىنىڭ وقىتۋ قىزمەتىنە كوپتەگەن قيىنشىلىقتار اكەلەدى. سوندىقتان، وقىتۋشى باستاۋىش مەكتەپ وقۋشىلارىنىڭ پسيحولوگيالىق ەرەكشەلىگىن كوزدە ۇستاي وتىرىپ، ولاردىڭ ساباققا دەگەن اۋەسىن قوزعاي ٴبىلۋى كەرەك.

    ەكىنشى، وقىتۋشى مەن وقۋشى ٴوزارا سەلبەسىپ، بىرگە العا باسۋ

    كومپيۋتەر ساباعى كەزىندە ٴبىر وقۋشىدا ٴبىر كومپيۋتەر بولاتىندىقتان كومپيۋتەر وقىتۋشىسى توراپ ارقىلى وقۋشىلاردىڭ كومپيۋتەرىن مەڭگەرىپ وتىرادى. وقىتۋشى تەك كومپيۋتەر ارقىلى عانا ساباق بەرەتىندىكتەن، وقۋشىلار وقىتۋشىنىڭ بەت – بەينەسىن، قيمىل – ارەكەتىن كورمەيدى. بۇل جاعدايدا وقۋشىلارعا وقىتۋشى جوق سياقتى سەزىلىپ، ولاردىڭ ساباققا دەن قويماۋى، ٴوزارا اڭگىمەلەسىپ كەتۋى سياقتى احۋالدار پايدا بولادى. مۇندايدا وقىتۋشى جاعدايعا قاراي مەتودىن(وقىتۋ ٴادىسىن) وزگەرتۋى كەرەك. وقۋشىلاردىڭ تالابىنا مەن ىنتاسىنا كوبىرەك كوڭىل اۋدارىپ، ٴونىمدى وقىتۋ تاسىلدەرىن قولدانىپ، وقۋشىلاردىڭ كومپيۋتەر ساباعىنا اۋەسىن كۇشەيتىپ، وقىتۋشى مەن وقۋشىنىڭ بىرگە العا باسۋىن ىسكە اسىرۋ كەرەك.

    ٴۇشىنشى، كومپيۋتەر وقىتۋدىڭ ٴتۇرلى جوبالارىن قولدانا وتىرىپ، وقىتۋ ٴادىسىنىڭ فورماسى مەن مازمۇنىن مولايتۋ

    وقىتۋشىلار ٴونىمدى وقىتۋ جوبالارىن قولدانا وتىرىپ وقۋشىلاردىڭ بەلسەندىلىگىن قوزعاپ، وقىتۋ ماقساتىن ىسكە اسىرۋى كەرەك. مىسالى كلاستا شاعىن باسەكە قيمىلىن وتكىزۋ. باسەكە قيمىلدارىندا وقۋشىلاردىڭ كومپيۋتەر ساباعىنا دەگەن قىزعىندىلىعى كۇشەيىپ، كومپيۋتەرى قولدانۋ تەحنيكالارىن جاقسى يگەرىپ، ۇيرەنگەن نەگىزدىك بىلدەرىن بەكەمدەي تۇسەدى. كەيدە وقىتۋشىلار بەلگىلەنگەن ۋاقىت ىشىندە بەرىلگەن مازمۇندى ٴتىلتاقتادا تەرۋ جارىسىن ۇيىمداستىرۋىنا دا بولادى. مۇنداي قيمىلدار وقۋشىلاردىڭ ەرىنشەك ادەتىن جەڭىپ، ولاردىڭ ۇيرەنۋ بەلسەندىلىگىن قوزعاۋىنا بولادى. سونىمەن بىرگە وقىتۋشىلار تۋىندىلار كورگىزبەسىن ۇيىمداستىرۋىنا دا بولادى. وسى ارقىلى دا ولاردىڭ ۇيرەنۋ ىنتاسىن كۇشەيتىپ، بەلسەندىلىگىن ارتتىرۋىنا دا بولادى. وقۋشىلارعا تاپسىرماعا بەرگەن تۋىندىلاردىڭ ىشىندەگى جاقسى ورىندالعاندارىن كلاستا ۇلگى ەتىپ، كورسەتىپ ماقتاسا، ول تەك سول وقۋشىنىڭ عانا ەمەس، باسقا وقۋشىلاردىڭ دا تاپسىرمانى جاقسى ورىنداپ، كلاستا ٴوز تۋىندىسىن كورسەتۋگە قۇلشىنادى.

جاۋاپتى رەداكتور: گۇلدەن ماقسات قىزى