«1 - قازان» التىن اپتالىعىندا شينجياڭنىڭ ساياحات بازارى دۋمانعا بولەندى

  • كەلۋ قاينارى: شينجياڭ گازەتى تورابى
  • 10:04:16 09/10/2018

    ساياحاتشىلاردىڭ جالپى مولشەرى، تۇتىنۋ جالپى سوماسى جاڭا ورەگە جەتتى

 

    ءتىلشىمىز ياۋ گاڭ 10 - ايدىڭ 7 - كۇنى ۇرىمجىدەن حابارلايدى. ءتىلشىنىڭ اۆتونوميالى رايوندىق ساياحاتتى دامىتۋ كوميتەتىنەن ۇعىسۋىنشا، 3 - جاق ساناق سەرىكتەستىگىنىڭ ۇلگى الىپ تەكسەرۋىنە جانە جالپىلىق ەسەپتەۋىنە نەگىزدەلگەندە، «1 - قازان» التىن اپتالىعىندا شينجياڭنىڭ ساياحات بازارى دۋمانعا بولەنىپ، ەل ىشىنەن 10 ميلليون 212 مىڭ 700 ساياحاتشى قابىلداپ، سالىستىرمالى ولشەم بويىنشا سايكەس مەزگىلدەگىدەن %31.05 ارتىپ، ساياحاتتىڭ جالپى تۇتىنۋ سوماسى 14 ميلليارد 247 ميلليون يۋانعا جەتىپ، سالىستىرمالى ولشەم بويىنشا سايكەس مەزگىلدەگىدەن %37.56 ارتىپ، ساياحاتشىلاردىڭ جالپى مولشەرى، تۇتىنۋ جالپى سوماسى جاڭا ورەگە جەتكەن.

    مەملەكەت مەرەكەسى دەمالىسىندا كوپتەگەن ساياحاتشىلار ءوز اۆتوكولىگىمەن ساياحاتقا شىقتى، ەكولوگيالىق ورتانى سەرۋەندەۋ ساياحاتشىلاردى باۋرادى. جۇڭچيڭلۇي شينجياڭ حالىقارالىق ساياحات مەكەمەسى شەكتى جاۋاپكەرلىك سەرىكتەستىگى ۇيىمداستىرعان 2018 «مىڭ كولىك، 10 مىڭ ادام تاكلاماكان شولىنەن كەسىپ ءوتۋ» قيمىلى بەيجيڭ، شاڭحاي، گۋاڭدۇڭ قاتارلى جەرلەردەن كەلگەن جەكە اۆتوكولىگىمەن ساياحاتتاۋشىلاردى قىزىقتىردى. ساندى مالىمەتتەن «1 - قازان» التىن اپتالىعىندا تۇتاس شينجياڭنىڭ جەكە اۆتوكولىگىمەن ساياحاتتاۋشىلاردان 7 ميلليون 436 مىڭ 900 ادام - رەت قابىلداپ، جەكە اۆتوكولىگىمەن ساياحاتتاۋشىلاردىڭ يەلەگەن سالىستىرماسى %72.82 كە جەتكەندىگى ايگىلەندى. بۇگۇر اۋدانى، پوسكام اۋدانى، موري قازاق اۆتونوميالى اۋدانى قاتارلى جەرلەر التىن كۇزدە كوركەم توراڭعى ورمانىندا ۋادەلەسۋ ساياحات قيمىلىن ورىستەتىپ، شينجياڭنىڭ ءىشى - سىرتىنان كوپتەگەن ساياحاتشىلاردى وزىنە باۋرادى. قاناستىڭ كۇزگى كورىنىسى كوزدىڭ جاۋىن الدى، 10 - ايدىڭ 1 - كۇنى قاناستىڭ كۇزگى كوركەم كورىنىسىن ساياحاتتاۋعا كەلگەندەردىڭ سانى 23 مىڭ ادام - رەتكە جەتتى. قاشقار كونە قالا كورىنىس وڭىرىنە كەلگەن ساياحاتشىلار ۇزبەي ارتىپ، 10 - ايدىڭ 3 - كۇنى جالپى 15 مىڭ 96 ادام - رەت قابىلداپ، سايكەس مەزگىلدەگىدەن % 405.55 ارتقان.

    اق، جاسىل ءتۇس ارالاسقان جاڭا سورت، شەبەرلىكپەن جاسالعان جاسىل ءمۇسىن، سارقىراما فورماسىنداعى قۇلاما كۇرەڭكەي... مەملەكەت مەرەكەسى دەمالىسىندا 7 - كەزەكتى شينجياڭ (سانجى) كۇرەڭكەي كورمەسىندە كۇرەڭكەيدىڭ 1018 سورتى، ءبىر ميلليوننان استام گۇلى ساياحاتشىلارعا كورسەتىلدى. 7 - كەزەكتى شينجياڭ (سانجى) كۇرەڭكەي كورمەسىنىڭ ارقاسىندا، سانجى مەملەكەتتىك اۋىل شارۋاشىلىق عىلىم - تەحنيكا باقشا رايونى شينجياڭ اۋىل شارۋاشىلىق كورمە باقشاسى ماڭايىنداعى رايونداردان جانە ىشكى ولكەلەردەن كەلگەن كوپتەگەن ساياحاتشىلاردى جەكە اۆتوكولىگىمەن ساياحاتتاۋعا، ءبىر كۇندىك ساياحاتتاۋعا باۋرادى. «1 - قازان» التىن اپتالىعىندا، تۇتاس شينجياڭدا ءبىر كۇندىك ساياحاتتاۋعا كەلگەن ساياحاتشىلاردىڭ سانى 5 ميلليون 165 مىڭ 600 ادام - رەتكە جەتكەن.

    شىراقتار جۇلدىزداي جارقىراپ، كورىنىسى كوز تارتتى. 10 - ايدىڭ 6 - كۇنى كەشتە، ۇرىمجىدە «سۇيەم سەنى، جۇڭگو» تاقىرىبىنداعى شىراق سالتاناتى وتكىزىلىپ، ەلىمىزدىڭ جەر - جەرىنەن كەلگەن ساياحاتشىلاردى وزىنە باۋرادى. ءۇرىمجى شينجياڭ حالىقارالىق ۇلكەن بازارىنىڭ جاياۋلار كوشەسى ساياحاتشىلارعا لىق تولدى، شيداچياۋ كوپىرىندە تاماشالاۋشىلار ءيىن تىرەستى، كوپشىلىك قول تەلەفوندارىن، اپپاراتتارىن الىپ، كوركەم ساتتەردى سۋرەتكە ءتۇسىرىپ، وتاننىڭ ەرتەڭىنىڭ ونان ارى جاقسى بولۋىن، شينجياڭنىڭ ەرتەڭىنىڭ بارعان سايىن جاقسى بولۋىن بىرگە تىلەدى.

جاۋاپتى رەداكتور: جازيرا بولاتباي قىزى