19 جىلدان كەيىن قايتا باس قوسۋ

  • كەلۋ قاينارى: ىلە گازەتى
  • 06:42:04 12/10/2018

 

    19 جىلدىڭ الدىندا نىلقى اۋدانىنىڭ تۇرعىنى سەرىك ءالي ۇلى بالا كەزىندە ۋ-شي قالاسىنان كەلگەن ەرىكتى تاڭ چۋانجيمەن تانىسىپ، اكە مەن بالا قاتىناسىنداي تەرەڭ سۇيىسپەنشىلىك ورناتقان بولاتىن. 19 جىلدان كەيىن سەرىك ءالي ۇلى تىلەگى ورىندالىپ، حانزۋ اكەسى تاڭ چۋانجيدى تاپتى ءارى 2018-جىلى ولار نىلقى اۋدانىندا باس قوسىپ ارالارىنداعى وسى قويۋ سۇيىسپەنشىلىكتى تىلگە تيەك ەتتى.

    نىلقى اۋدانى قاراسۋ اۋىلى جارتوعان قىستاعىنىڭ تۇرعىنى سەرىك ءالي ۇلىنىڭ ۇيىندە ەكى وتباسىنداعىلار باس قوسىپ، بىرگە تاماقتانا وتىرىپ، سول جىلدارداعى ەستەن كەتپەس ەستەمەلەردى ايتىستى. تاڭ چۋانجيدىڭ جۇبايى سەرىك ءالي ۇلىنىڭ اشتى تاعامداردى ۇناتىپ جەيتىنىن قازىرگە دەيىن ۇمىتپاپتى، ول ادەيى قىزىل بۇرىش سەبىلگەن نەداۋىر اشتى كاۋاپتى سەرىككە بەردى.

    1999-جىلى ۋ - شي مەن ىلە ءوڭىرى بىرلەسىپ ىلەدەگى ورەندەردىڭ ۋ - شيلىق ەرىكتىلەرمەن شاعان مەرەكەسىن بىرگە وتكىزۋ قيمىلىن وتكىزەدى، 11 جاستاعى سەرىك ۋ - شيلىق ەرىكتى تاڭ چۋانجيدىڭ ۇيىنە بارىپ، ءبىر رەتكى ەستەن كەتپەس شاعان مەرەكەسىن وتكىزدى. ۋ - شيداعى كەزىندە تاڭ چۋانجي مەن ونىڭ جۇبايى كەم ءسوزدى جۋاس سەرىكتى اعىنان اقتارىلا كۇتتى. اۋىلعا قايتاردا سەرىك ولارمەن قيماستىقپەن قوشتاستى. سەرىك: « 1999-جىلى ۋ - شيعا بارعام، ول جاقتا ون نەشە كۇن تۇردىم، تاڭ چۋانجي اكەمدى ەرەكشە جاقسى كورەمىن» دەدى.

    سەرىك كەتكەننەن كەيىن قىزمەت بابىمەن تاڭ چۋانجيدىڭ وتباسى بۇرىنعى ورنىنان كوشىپ كەتەدى دە وسىدان كەيىن ولاردىڭ اراسىنداعى بارىس - كەلىس ءۇزىلىپ قالادى. دەگەنمەن ەكەۋى دە ءبىرىن -ءبىرى ىزدەيدى. 2016 - جىلى 11- ايدا جاناشىر جانداردىڭ جانە اقپارات قۇرالدارىنىڭ كومەگىندە «اكەلى -بالالى ەكەۋى» توراپتاعى كەسكىن ارقىلى حابارلاسادى. وتكەن جىلدىڭ باس شەنىندە سەرىك ۋ - شيعا بارىپ، تاڭ چۋانجي اكەسىمەن جانە وسى شاڭىراقتاعىلارمەن كەزىكتى ءارى ولاردى نىلقى اۋدانىنا كەلىپ قوناق بولۋعا ۇسىنىس ەتتى. وسى رەت نىلقىعا كەلگەندە سەرىكتىڭ اۋدان قالاشىعىندا ءۇي اشەكەيلەۋ جۇمىسىمەن شۇعىلداناتىنىن، ساۋداسىنىڭ جاقسى ەكەنىن، وتباسىنداعى ءۇش جاننىڭ باقىتتى تۇرمىس كەشىرىپ جاتقانىن كورىپ، تاڭ چۋانجي ءدان ريزا بولدى. ول: «وسى رەت وسىندا كەلىپ ەرەكشە قۋاندىق، وتكەن جىلى كەلمەكشى بولعانمىن، ءبىراق دەنساۋلىعىم جار بەرمەدى، قىزمەت تە نەداۋىر قاربالاس، سونىمەن كەلە المادىم. بيىل ۋاقىتتى مىقتى يگەرىپ، كەلىپ وتىرمىن» دەدى.

    ىلەدە تۇرعان ءۇش كۇندە سەرىك تاڭ چۋانجي اكەسىن تاڭبالى جايلاۋى، نارات ساحاراسى سياقتى جەرلەرگە اپارىپ، شينجياڭنىڭ كوركەم تابيعات كورىنىسىن ولارعا تاماشالاتتى. قوشتاساردا ولار جىل سايىن باس قوسىپ تۇرۋعا كەلىستى. سەرىك: «مەن قازاق، تاڭ چۋانجي اكەم حانزۋ بولعانىمەن، ءبىراق ءبىزدىڭ قاتىناسىمىز اكە مەن بالا قاتىناسىنداي» دەدى.

    بايسۇلتان نۇپتەبەك ۇلى

جاۋاپتى رەداكتور: گۇلدەن ماقسات قىزى