ەكى ولكەدەگى بەس كۇن

  • كەلۋ قاينارى:
  • 05:22:47 18/10/2018

    سەنبەك اۋەسقان ۇلى

 

    مەملەكەت مەرەكەسىنىڭ التىن اپتالىعىندا جولىمىز ءتۇسىپ، چيڭحاي ولكەسى مەن گانسۋ ولكەسىندە 5 كۇن تۇرىپ قايتتىق. 10 – ايدىڭ 3 - كۇنى تاڭەرتەڭ ۇشاقپەن قۇلجادان ءۇرىمجى قالاسىنا جەتىپ، وندا ءبىر كۇندەي ايالداپ، كەشكى ۇشاقپەن چيڭحاي ولكەسىنىڭ ورتالىعى شينيڭ قالاسىنا باردىق، ودان حۋاڭجۇڭ اۋدانىنا بارىپ، ءبىر قونىپ، ەرتەسى تۇسكە تاياۋ بەيجيڭنەن جۇبايىمەن بىرگە ساياحاتتاپ كەلگەن بو ي ەسىمدى جىگىتپەن بىرگە كىرە كولىگىن مايعا الىپ چيڭحاي كولىنە باردىق. جول بويى چيڭحاي – شيزاڭ ءۇستىرتىنىڭ كورىنىسىن، ونداعى مالشىلاردىڭ تۇرمىس – تىرشىلىگىن كورىپ، كولگە اپساتتە جەتىپ الدىق، ەلىمىزدىڭ ءار ولكەسىنەن ساياحاتشىلار اعىلىپ كەلىپ جاتىر... چيڭحاي كولىنە شىعىس سولتۇستىك باعىت بويىنشا كەلگەن جولمەن جاناسا بەرگەن تۇسقا ۇلكەن ماڭدايشالىق جاسالىپ، وعان «جۇڭگوداعى ەڭ كوركەم كول ــ چيڭحاي كولى» دەگەن جازۋ جازىلىپتى. جانە جارىم ساعاتتاي جۇرگەندە شىعىس جاقتان تاعى ءبىر ۇلكەن جول قوسىلدى. كول بويىندا جەكەلەردىڭ وزدەرى اشىپ العان كورىنىس تۇيىندەرى كوپ ەكەن. كەيبىرەۋلەرى كوركەمدىك ءۇشىن قىشى گۇلىن جانە باسقا ءبىز بىلمەيتىن گۇلدەردى ەگىپ تاستاپتى، ءارقايسى كىرە بەرىستە اپپاق قوداستارىن ەرتتەپ، گۇلدەپ، قوناق قابىلداپ وتىرعان زاڭزۋ مالشىلارىن كوردىك... كول بويىندا سۋرەتكە ءتۇسۋ ءۇشىن، سەيىل ءۇشىن اتتارىن جالداپ جۇرگەن مالشىلار كوپ ەكەن، ءتورت دوڭگەلەكتى دالا موتوتسيكىلى دە بار...

    كەشتە كول بويىنداعى كورىنىس وڭىرلەرىنىڭ بىرىندە تۇنەپ، ەرتەسى كول بويىندا تاعى بىردەم ايالداپ، كولدەن ناق شىعىسقا بەت العان جولمەن سەرىكتەرىمىزبەن بىرگە شينيڭگە ءتۇس اۋا جەتىپ الدىق. كولدىڭ ماڭايى ۇزاققا دەيىن سازداۋىت بولىپ كەلەدى ەكەن، وڭتۇستىكتەگى تاۋ بوكتەرلەرىندە بىتىراي ورنالاسقان مالشى ۇيلەرى ءبىرتالايعا دەيىن جالعاسىپ جاتتى، ءسىرا، مالشىلاردىڭ قىستاۋلىق جەرى سەكىلدى. شينيڭدە بەيجيڭدىك ساپارلاستارىمىزعا قوش ايتىپ، ءبىر كۇن ايالداپ، ەرتەسى پويەزبەن لانجوۋعا باردىق. حۋاڭحى وزەنى، ۋچۋان تاۋى باقشاسى، شىعىس جالپىلىق تولايىم بازارى قاتارلى جەرلەرىن ارالاپ، ەكى كۇن تۇرىپ، 10 – ايدىڭ 8 – كۇنى تاڭەرتەڭ قۇلجاعا توتە ۇشاتىن ۇشاقپەن اۋىلعا امان – ەسەن جەتىپ الدىق. وسى بارىستا ايرىقشا اسەر ەتكەن ءبىر جاعداي، لانجوۋدىڭ كونە قالا رايونى مەن جاڭا قالا رايونىنىڭ ارالىعىندا كەڭ اۋماقتى الىپ جاتقان ادىرلاردى ساتىلاپ جاسىلداندىرۋعا ەرەكشە كۇش سالىپتى، اعاش ەگىلمەگەن توبە جوقتىڭ قاسى، بۇرىن ەلسىز جاتقان توبەلەردىڭ وزىنەن ويىپ – ويىپ بيىك عيماراتتاردى قاز – قاتار تۇرعىزىپتى. وسىنىڭ ءوزى لانجوۋ حالقىنىڭ ەڭبەكشىلدىك رۋحىن تانىتقانداي. وقىرماندارعا وسى رەتكى ساپاردان ءبىر ءبولىم فوتو سۋرەتتەردى ۇسىندىم.

جاۋاپتى رەداكتور: جازيرا بولاتباي قىزى