اۋىل – قىستاق مەكتەپتەرىندە دەنەتاربيە وقىتۋىنىڭ ساپاسىن قايتكەندە جوعارىلاتۋعا بولادى

  • كەلۋ قاينارى: ىلە گازەتى
  • 08:12:28 19/10/2018

    جارىلقاسىن بەكتۇرسىن ۇلى

    

    ادام ساپاسى اقىل – وي ساپاسى مەن دەنە ساپاسىن قامتيدى. ادامنىڭ اقىل – وي قابىلەتى دەنەتاربيەلىك شىنىعۋىمەن تىكەلەي بايلانىستى. ويتكەنى دەنساۋلىعى كۇشتى ادام عانا اقىل – وي ەڭبەگىمەن جۇيەلى شۇعىلدانا الادى. سپورتپەن جۇيەلى شۇعىلدانۋدىڭ جاستاردىڭ اقىلى – ويىنىڭ جەتىلۋىنە اسەرى مول . وسى تۇرعىدان العاندا جاستار مەن ورەندەردىڭ ءوسىپ – جەتىلۋىندە باستاۋىش، ورتا مەكتەپتەردەگى دەنەتاربيە وقىتۋى مەن دەنەتاربيەلىك شىنىعۋ ماڭىزدى رول اتقارادى.

    بيىل 9 – ايدىڭ 10 – كۇنى 34 – رەتكى وقىتۋشىلار مەرەكەسىندە باس شۋجي شي جينپيڭ پارتيا ورتالىق كوميتەتى اتىنان بۇكىل ەلىمىزدەگى قالىڭ وقىتۋشىلار مەن وقۋ – اعارتۋ قىزمەتكەرلەرىنە مەرەكەلىك ىقىلاستى سالەم جولداپ سويلەگەن سوزىندە بىلاي دەپ باسا دارىپتەدى: دەنساۋلىق ءبىرىنشى دەيتىن وقۋ – اعارتۋ ۇستانىمىن ورناتىپ، دەنەتاربيە ساباقتارىن تولىق، جەتكىلىكتى اشىپ، وقۋشىلاردىڭ دەنەتاربيەلىك شىنىعۋ بارىسىندا قۋانىش – قىزىقتان ءلاززاتتانۋىنا، دەنە ساپالارىن كۇشەيتۋىنە، كىسىلىك قاسيەتتەرىن اقاۋسىزداندىرۋىنا، ەرىك – جىگەرىن شىڭداۋىنا كومەكتەسۋ كەرەك.

    باس شۋجيدىڭ سويلەگەن سوزىنەن دەنەتاربيە وقىتۋى مەن سپورتتىق شىنىعۋدىڭ ادامنىڭ جالپى تۇلعالىق جەتىلۋىندە قانشالىقتى ماڭىزدى ەكەنىن كورىپ الۋعا بولادى.

    دەنەتاربيە وقىتۋى - جاستار مەن ورەندەردىڭ دەنەسىن شىنىقتىرىپ، ميىن سەرگىتەتىن ءارى اماليات پەن نازاريا ۇشتاستىرىلىپ وتىلەتىن ساباق ءتۇرى. دەنەتاربيە ساباعىنىڭ باستى پاندىك ساباقتارمەن ۇقساس تۇراقتى وقۋ – وقىتۋ مازمۇنى، مەتوديكاسى بار. ءبىراق وقۋ – وقىتۋ فورماسى باسقا پاندىك ساباقتارعا قاراعاندا قيمىلدى نەگىز ەتەتىن دارالىعىمەن ەرەكشەلەنەدى.

    اۋىل – قىستاق مەكتەپتەرىندە دەنەتاربيە وقىتۋشىلارى قوسىنى از، وقىتۋ قىزمەتى اۋىر، كاسىپتىك ۇيرەنۋ جەتەرسىز، ماشىق قۇرىلعىلارى دا كەمشىل بولعاندىقتان، جاڭا ساباق رەفورماسىنا ۇيلەسە الماۋ، دەنەتاربيە قىزمەتتەرىنىڭ ونىمدىلىگى تومەن بولۋ، دەنەتاربيە وقىتۋىنا ءمان بەرۋى جەتكىلىكتى بولماۋ جايتتەرى ساقتالىپ كەلگەن.

    بۇرىن ورتالاۋ، ورتا مەكتەپتەردىڭ دەنەتاربيە ساباعىندا وقىتۋشى وقۋشىلارعا تەك قىسقا ارالىققا جۇگىرۋ، ۇزاق ارالىققا جۇگىرۋ، بيىككە سەكىرۋ، فۋتبول تەبۋ سياقتى ارەكەتتەردىڭ تەحنيكالىق ولشەمدەرىن عانا ۇيرەتەتىن. قازىر وسىنداي ءداستۇرلى وقىتۋ ادىسىنە بۇرىلىس جاساۋ باسا دارىپتەلىپ وتىرعانىمەن، بۇرىنعى وقىتۋ تاسىلىنە ابدەن داعدىلانىپ العان وقىتۋشىلار ءالى دە كونە سۇردەكتەن شىعا الماي وتىر. قازىر مەكتەپتە وقۋشىلاردىڭ ۇيرەنۋ باسىمدىلىعى اۋىر، ۇيگە بارعان سوڭ دا تاپسىرما ورىنداۋمەن قاربالاس بولادى، مىنە وسىنداي اۋىر رۋحاني باسىمدىلىق وقۋشىلاردىڭ پسيحيكاسى مەن دەنە ساپاسىنا ىقپال جەتكىزۋدە. مەكتەپ دەنەتاربيە وقىتۋىنىڭ ساپاسىن جٶعارىلاتۋ، ونى قازىرگى وقىتۋ رەفورماسىنا ۇيلەستىرۋ، ءتۇرلى دەنەتاربيە قيمىلدارى ارقىلى جاستار مەن ورەندەردىڭ رۋحاني باسىمدىلىعىن جەڭىلدەتۋ، جىگەر – قايراتىن ءوسىرىپ، جاسامپازدىق قۋاتىن ارتتىرۋ وتە ماڭىزدى.

جاۋاپتى رەداكتور: جازيرا بولاتباي قىزى