ۋ فۋليان: پارتيا ءۇشىن جان قيعان جەلەكتى قاھارمان

  • كەلۋ قاينارى: شينجياڭ گازەتى تورابى
  • 09:32:36 24/10/2018

    شينحۋا اگەنتتىگىنىڭ 10 - ايدىڭ 22 - كۇنى فۋجوۋدان بەرگەن حابارى (ءتىلشى چىن حۇڭ - ي). فۋجيان ولكەسى شاڭحاڭ اۋدانى گۋانجۋاڭ شىزۋ ۇلتتىق اۋىلىندا بيىكتىگى 1.10 مەتر كەلەتىن «ۋ فۋليان قۇرباننىڭ ەسكەرتكىشى» قاسقايىپ تۇر. ۋ فۋليان اتتى بۇل ايەل قاھارماننىڭ 25 جىلدىق ومىرىندەگى اسەرلى ەرلىك ىستەرى سانسىزداعان ادامداردى تەبىرەنتۋدە.

    ۋ فۋليان 1912 - جىلى فۋجيان ولكەسى شاڭحاڭ اۋدانىنداعى ءبىر كەدەي ەگىنشى وتباسىندا دۇنيەگە كەلگەن. ۇيلەرى كەدەي بولعاندىقتان ول جاسىنان قولبالا بولىپ تارتپاعان جاپاسى قالماعان.

    1929 - جىلى 3 - ايدا قىزىل 4 - ارميا شاڭحاڭدى ازات ەتىپ، فۋجياننىڭ وڭتۇستىك بازاسىن اشادى، ۋ فۋليان وتباسىنىڭ شىرماۋىنان باتىلدىقپەن قۇتىلىپ توڭكەرىسكە قاتىناسادى. بەينەسى ايتارلىقتاي بولعاندىقتان ول تەز ارادا جاستار وداعىنا مۇشە بولادى دا، كوپ ۇزاماي داڭقپەن جۇڭگو كوممۋنيستىك پارتياسىنا مۇشە بولادى.

    1930 - جىلدان باستاپ ۋ فۋليان ىلگەرىندى - كەيىندى ج ك پ شاڭحاڭ اۋدانى گۋانجۋاڭ رايوندىق كوميتەتتە، شاڭحاڭ اۋداندىق كوميتەتتە، ج ك پ فۋجيان - گۋاڭدۇڭ - جياڭشي ولكەلىك كوميتەتتە قىزمەت ىستەپ، رايوندىق پارتكومنىڭ مۇشەسى، رايوندىق سوۆەت ۇكىمەتى ايەلدەر ءبولىمىنىڭ باستىعى، اۋداندىق پارتكومنىڭ مۇشەسى، ولكەلىك پارتكومنىڭ مۇشەسى، ولكەلىك پارتكوم ايەلدەر ءبولىمىنىڭ شارلاۋشىسى مىندەتىن اتقارادى. 1933 - جىلى 4 - ايدا ۋ فۋليان ورتالىق پارتيا مەكتەبىندە وقىپ، وقۋىن بىتىرگەننەن كەيىن فۋجيان - گۋاڭدۇڭ - جياڭشي ولكەلىك پارتكوم ايەلدەر ءبولىمىنىڭ باستىعى مىندەتىنە تاعايىندالادى.

    1934 - جىلى 10 - ايدا ۋ فۋليان قىزىل 1 - باعىت ارمياسىمەن بىرگە ۇزاق جورىققا قاتىناسىپ، قىزىل ارميا دالالىق شايقاس شيپاحاناسى ساياسي باسقارماسىنىڭ القاسى مىندەتىن اتقارادى. 1935 - جىلى 6 - ايدا قىزىل 1 - ، 4 - باعىت ارميالارى سىچۋان ولكەسىنىڭ ماۋگۇڭ اۋدانىندا كەزدەسەدى. 10 - ايدىڭ اياق شەنىندە ۋ فۋليان قىزىل 4 - ارمياعا اۋىستىرىلىپ، ايەلدەر دەربەس 1 - تۋانىنىڭ جىڭۋيى مىندەتىن ۇستىنە الىپ، قىزىل 4 - باعىت ارمياسىنا ىلەسىپ قارلى تاۋدان، شالعىندى سازدىقتان 3 رەت وتەدى. 1936 - جىلى 7 - ايدا ۋ فۋليان قىزىل 4 - باعىت ارمياسى ايەلدەر اۆانگاردتار تۋانىنىڭ ساياسي كوميسسارى بولىپ تاعايىندالادى.

    1936 - جىلى 10 - ايدا قىزىل ارميانىڭ 3 ءىرى نەگىزگى كۇشى گانسۋدىڭ حۇينيڭ اۋدانىندا كەزدەسەدى. ورتالىق توڭكەرىستىك اسكەري ىستەر كوميتەتىنىڭ بۇيرىعىمەن قىزىل 4 - باعىتتىق ارميا باتىس باعىت ارمياسى بولىپ ۇيىمداسىپ، حۋاڭحى دارياسىنان باتىسقا ءوتىپ، نيڭشيا شايقاسى جوسپارىن اتقارۋعا ازىرلەنەدى، ۋ فۋليان قىزىل ارميانىڭ باتىس باعىت ارمياسى ايەل اۆانگاردتار تۋانىنىڭ ساياسي كوميسسارى بولىپ تاعايىندالادى.

جاۋاپتى رەداكتور: جازيرا بولاتباي قىزى