ساباقحانا وقىتۋىنىڭ ونىمدىلىگىن قايتكەندە جوعارىلاتۋعا بولادى

  • كەلۋ قاينارى: ىلە گازەتى
  • 03:50:16 25/10/2018

    شولپان اسكەرالى قىزى

    

    ساباقحانا وقىتۋى – تۇتاس مەكتەپ وقۋ – وقىتۋ قىزمەتىندە ماڭىزدى ورىندا تۇرادى، ساباقحان وقىتۋى ونىمدىلىگىنىڭ جوعارى – تومەن بولۋى وقىتۋشىنىڭ ىزدەنۋى مەن قابىلەتىنە ساياتىن ماڭىزدى بۋىنداردىڭ ءبىرى ەندەشە ءوزىمنىڭ ساباقحانا وقىتۋىنداعى تاجىريبەلەرىمە سۇيەنە وتىرىپ، ساباقحانا وقىتۋىنىڭ ونىمدىلىگىن جوعارىلاتۋ جونىندەگى ويلارىمدى ورتاعا سالماقپىن.

    بىرىنشىدەن، مۇندا ەڭ الدىمەن وقۋلىقتىڭ مازمۇنىنداعى قيىن تۇيىندەر مەن ماڭىزدى تۇيىندەردى قانىق يگەرۋ كەرەك. اسىرەسە، وقىتۋشىلىقپەن شۇعىلدانعانىنا ۇزاق بولماعان جاس وقىتۋشىلار جونىنەن العان ولاردىڭ الدىن الا ازىرلىك كورۋ تانىمى جەتەرسىز بولعاندىقتان، ايتەۋ ساباق وتەتىن ۋاقىتى تاياعاندا بارىپ وقۋلىقتى اسىعىس – ۇسىگىس كورىپ، شالا – شارپى ازىرلىك كورەدى دە ساباقحاناعا كىرەدى. بۇلاي بولعاندا ساباقحانا وقىتۋىنىڭ ساپاسى مۇلدە كوڭىلدەگىدەي بولمايتىنى انىق. سوندىقتان ءارقانداي وقىتۋشى الدىمەن وقۋلىقتى باستان – اياق مۇقيات، دەن قويا وتىرىپ وقىپ شىعۋى كەرەك، ۇيتكەنى قاي جىلدىقتىڭ وقۋلىعى بولسا دا بەلگىلى جوبا، جوسپار، ماقسات نەگىزىندە ءاربىر ساباقتىڭ مازمۇنى ءبىر – بىرىمەن سايكەستىرىلىپ، ۇلكەن پروگرامما نەگىزىندە جاسالادى، سوندىقتان وقۋلىق ءوزى ۇلكەن ءبىر تۇتاس تۇلعا، وسى تۇتاس تۇلعانىڭ مازمۇنىن جەتىك بىلمەگەن، ونداعى لوگيكالىق بايلانىستاردى تولىق يگەرمەگەن وقىتۋشى ساباقحانا وقىتۋىندا ايتارلىقتاي تابىسقا جەتە المايدى. ال وسى وقۋلىقتىڭ تولىق مازمۇنىن يگەرۋمەن بىرگە وتەتىن ءاربىر ساباعىنداعى ماڭىزدى تۇيىندەر مەن قيىن تۇيىندەر جونىندە الدىن الا ازىرلىك جاساپ، وقۋشىلارعا ونى اشالاپ ءتۇسىندىرۋ كەرەك. اسىرەسە جاڭادان كەلگەن وقىتۋشىلاردىڭ كەيبىرەۋى وقۋلىقتاعى مازمۇندى كىتاپتاعىسى بويىنشا ون نەشە مينۋتتا ءوتىپ بولىپ، قالعان ۋاقىتتا نە ىستەرىن بىلمەي قالسا؛ ال كەيبىرەۋلەرى وتكەن ساباعىن ولشەمدى قىرىق بەس مينۋتتا ءوتىپ بولا الماي ويىن شاشىراتىپ، ساباق مازمۇنىنان القىپ كەتەدى. مىنە وسىنىڭ ءبارى تولىق ازىرلىكتىڭ بولماۋىنان، ماڭىزدى بۋىنداردى، قيىن تۇيىندەردى جەتىك يگەرمەگەندىكتەن بولادى. ەندەشە ساباقحانا ونىمدىلىگىن جوعارىلاتۋ ءۇشىن ازىرلىك كۇشتى بولۋ كەرەك.

    ەكىنشىدەن، قاتىستى ماتەريالداردى كوپ كورىپ، ءوز كاسىپتىك ءبىلىمىن ۇزدىكسىز جوعارىلاتىپ وتىرۋ كەرەك. «بىرەۋگە ءبىر ءشومىش سۋ بەرۋ ءۇشىن وزىڭدە ءبىر شەلەك سۋ بولۋى كەرەك» دەيدى دانالار. ارينە، ساباقحانا وقىتۋىندا وقۋلىق كولەمىمەن وتپەكشى بولعان تەكىستىڭ (ساباقتىڭ) مازمۇنىمەن عانا شەكتەلىپ قالۋعا بولمايدى، قازىر مىنا ينتەرنەت داۋىرىندە قوسىمشا ماتەريالدار بارشىلىق، سوندىقتان ساباققا قاتىستى، وقۋلىققا قاتىستى قوسىمشا ماتەريالداردى كوپ كورىپ، ءوز ءبىلىم دەڭگەيىمىزدى تولىقتىرا ءتۇسۋىمىز كەرەك. كورگەن ماتەريالىمىز كوپ، ازىرلىگىمىز تولىق بولسا ساباق وتكەندە جان – جاقتى لوگيكالى، كەڭ ءورىستى سويلەۋگە بولادى. ايتالىق، بەلگىلى ءبىر جازۋشىنىڭ شىعارماسى جونىندە ساباق وتكەندە سول جازۋشىنىڭ ومىرىنە قاتىستى قىزىقتى اڭگىمەلەردى ايتىپ بەرۋ ارقىلى وقۋشىلاردىڭ سول ساباققا دەگەن قىزعىندىعىن ارتتىرۋ كەرەك، ارينە، ءبىلىمىڭىز مول بولسا، يلاندىرۋ قۋاتىڭىز دا جوعارى بولادى، ال وقۋشىلارىڭىز يلانعان ەكەن، وندا ساباقحانا وقىتۋىڭىزدىڭ ساپاسى ارينە جوعارى بولارى انىق.

جاۋاپتى رەداكتور: جازيرا بولاتباي قىزى