شاعانتوعاي اۋدانى «ءتورت +» اينالىم ۇلگىسىمەن بۇقارانىڭ كىرىسىن ارتتىردى

  • كەلۋ قاينارى: ىلە گازەتى
  • 08:26:33 08/11/2018

    ەرىكتى ءتىلشى حى يۇيلان حابارلايدى. 10 – ايدىڭ 28 – كۇنى شاعانتوعاي اۋدانى جيەك قالاشىعى كۋساق سولتۇستىك قىستاعىنىڭ تۇرعىنى جوۋ جيان وسى قالاشىقتاعى شياڭياڭحۋا سەلبەستىك كووپەراتيۆىمەن ەگىمشىلىك توقتامىنا قول قويىستى. كەلەر جىلى مول ءونىم الاتىنىنا سەنىم ارتقان ول: «سەلبەستىك كووپەراتيۆى ارتقى تىرەگىمىز بولعاندىقتان، ءبىز ەشتەڭەدەن الاڭدامايتىن بولدىق»،- دەدى.

    بيىل جىل باسىنان بەرى شاعانتوعاي اۋدانى پارتيا قۇرىلىسىن جەتەكشىلىككە الىپ، اۋىل شارۋاشىلىق كاسىپ قۇرىلىمىنا بارىنشا رەتتەۋ جۇرگىزىپ، «پارتيا قۇرىلىسى + ديقان وتباسى +سەلبەستىك كووپەراتيۆى +كاسىپورىن» سىندى اينالىم ۇلگىسىن دامىتىپ، اۋىل شارۋاشىلىعىنىڭ ونىمدىلىگىن جوعارىلاتۋدى، ديقاندار كىرىسىن ارتتىرۋدى بارىنشا جەبەپ، اۋىل – قىستاقتارداعى بوس ەڭبەككۇشتەردى جوتكەپ كاسىپتەندىرۋدى ىلگەرىلەتتى.

    جوۋ جيان 2017 – جىلى شياڭياڭحۋا سەلبەستىك كووپەراتيۆىنە مۇشە بولىپ، 100 مۋ جەرگە قىزاناق ەگىپ، ءار مۋ جەردەن ورتا ەسەپپەن 400 يۋاننان ارتىق كىرىس كىرگىزدى. بيىل پايداسىن كورگەن جوۋ جيان ەگىمشىلىك كولەمىن 450 مۋعا كەڭەيتىپ قالماستان، ءوزى دە سەلبەستىك كووپەراتيۆىندە كاسىپتەندى. ول قىزاناق ەككەن ءبىر جىلدان بەرى وزىندىك قۇن قاراجاتىن شىعارعاندا ءبىر مۋ جەردەن تاپقان تازا كىرىسى بۇرىنعى جىلدارى ەككەن ەگىس داقىلدارىنا قاراعاندا جوعارى دەپ ەسەپتەدى.

    قىستاق تۇرعىنى جاۋ زىشيان دا وسىنداي ۇقساس يگىلىككە كەنەلدى. ول بىلاي دەدى: وتباسىمىز ەككەن قىزاناق بۇرىنعى قولمەن جيناۋدان ءىرى تيپتى ماشينامەن جيناۋعا وزگەرگەننەن كەيىن ۋاقىت ۇنەمدەلدى، شىعىن دا بۇرىنعى ادام كۇشىنە قاراعاندا كوپتەپ ازايدى. جاۋ زىشيان سەلبەستىك كووپەراتيۆىنە مۇشە بولعاننان كەيىن كوڭىلى دە الاڭسىز بولدى. ول:«ءداستۇرلى ەگىمشىلىك ۇلگىسىنە قاراعاندا، قازىرگى سەلبەستىك كووپەراتيۆىنىڭ اينالىم ۇلگىسىن ايرىقشا ۇناتامىن»، - دەدى.

    ۇعىسۋىمىزشا، 2017 – جىلى شياڭياڭحۋا سەلبەستىك كووپەراتيۆى قىزاناق ءونىمى سەرىكتىگىمەن ساتىپ الۋ توقتامىنا قول قويىسقان ءارى ون مىڭ مۋدان ارتىق جەرگە قىزاناق ەگىپ، 3 ميلليون يۋاننان ارتىق تازا كىرىس كىرگىزگەن. 2018 – جىلى شياڭياڭحۋا سەلبەستىك كووپەراتيۆى «پارتيا قۇرىلىسى + ديقان وتباسى + سەلبەستىك كووپەراتيۆى + كاسىپورىن» ۇلگىسىنە جالعاستى رەتتەۋ جۇرگىزىپ جانە اينالىمعا سالىپ، ديقان وتباسىلارىنا ەكىنشى رەت تابىس بولگەن، باسقارۋ تەحنيكاسىن جاقسارتىپ، جەردى اينالىمعا سالۋمەن ۇشتاستىرىپ، اۋىل – قىستاق شارۋاشىلىق رەفورماسىن تەرەڭدەتىپ، ءداستۇرلى ەگىمشىلىك تاسىلىنە بۇرىلىس جاساپ، جاڭا ونىمدەر قىزاناق، ءشول كۇرىش، ماقتا، اراق اشىتاتىن جۇگەرى سياقتى ەرەكشە ەكونوميكالىق داقىلداردى ەگىپ، جەرگىلىكتى ورىننىڭ جاعدايىنا ۇيلەسەتىن ەرەكشە ەكونوميكالىق داقىلدار جونىندە ۇزدىكسىز ىزدەنىس جاساپ، بۇقارانىڭ كىرىستى ارتتىرىپ، ارقاتتانۋىنا، ناقتى يگىلىككە كەنەلۋىنە مۇمكىندىك جاراتقان.

جاۋاپتى رەداكتور: جازيرا بولاتباي قىزى