ءدوربىلجىن اۋدانىنىڭ ەلەكتروندى ساۋدا تەكشەسى حالىققا قولايلىلىق اكەلدى

  • كەلۋ قاينارى: ىلە گازەتى
  • 03:51:40 09/11/2018

 

    10 – ايدىڭ 29 – كۇنى ءدوربىلجىن اۋدانى مارالسۋ قالاشىعى مارالسۋ مال شارۋاشىلىق قىستاعىنىڭ مالشىسى ەربولات راقىمبەك ۇلى 200 تۇياق ەمىل اق قويىن شينجياڭ مايلى ازىق – تۇلىك سەرىكتىگىنە اپارىپ سويعىزىپ، ەتىن مۇشەلەپ ءبولدىرىپ، قوراپتاتىپ، سول كۇنى حاڭجوۋعا جونەلتتى. بىلتىردان قازىرگە دەيىن ول مىڭ تۇياق ەمىل اق قويىن ساتىپتى.

    ونىڭ ەمىل اق قويى ەتىن جەرگىلىكتى بازار باعاسىنان قىمبات باعادا حاڭجوۋعا ساتۋى ءدوربىلجىن اۋداندىق ەلەكتروندى ساۋدادان قىزمەت وتەۋ ورتالىعى سىندى تەكشەنىڭ پايداسى ەدى.

    بۇل تەكشەنىڭ پايداسى جونىندە ەربولات راقىمبەك ۇلى: «بۇرىن مال ساتقاندا باعانىڭ ارزان بولۋىنان الاڭدايتىن ەدىك، ەلەكتروندى ساۋدا تەكشەسى ءبىزدى الاڭداۋشىلىقتان ارىلتتى» – دەدى.

    ءدوربىلجىن اۋداندىق مال شارۋاشىلىعى – مال شيپاگەرلىگى مەكەمەسىنىڭ باستىعى ەربولات بەيسەنقان ۇلىنىڭ تانىستىرۋىنشا،10 ميلليون 490 مىڭ مۋ جايىلىمى بار ءدوربىلجىن اۋدانىنىڭ زالالسىز مال شارۋاشىلىق ونىمدەرى اسا مول بولىپ، شينجياڭ قوڭىر سيىرى، ەمىل اق قويى سياقتى ءناسىلدى تۇلىكتەردىڭ جەمدەپ باعىلۋ مولشەرى ءبىر ميلليون 500 مىڭ باسقا (تۇياق) جەتىپ، بىلتىردىڭ وزىندە 695 مىڭ باس (تۇياق) مال بازارعا سالىنىپ، مۇنىڭ ىشىندە، قورادا قالدىرىلعان ەمىل اق قويى سانى 40 مىڭ تۇياققا جەتكەن. الايدا تيجارات ۇلگىسى جالاڭ بولعاندىقتان ءدوربىلجىن اۋدانىنىڭ زالالسىز مال شارۋاشىلىق ونىمدەرىنە ماندىمدى بازار اشا الماي كەلگەن.

    2015 – جىلى ءدوربىلجىن اۋدانى زىفىڭ اۋىل شارۋاشىلىق ساۋدا بازارىنان ءدوربىلجىن اۋداندىق ەلەكتروندى ساۋدادان قىزمەت وتەۋ ورتالىعىن قۇرىپ، بىلتىر 8 – ايدا « ەلەكتروندى ساۋدا + كاسىپ»،« ەلەكتروندى ساۋدا + كاسىپ كوزىن اشۋ»،«ەلەكتروندى ساۋدا + كەدەيلەردى سۇيەمەلدەۋ» سىندى جوسپارلاردى رەسمي اتقاردى. «ءبىر جىل اينالىمعا ءتۇسۋ ارقىلى كەدەي وتباسىنان 40 ادام كاسىپتەنىپ، ايلىق كىرىستەرى 3 مىڭ يۋاننان استى. قازىرگە دەيىن گۋاڭجوۋ، شاڭحاي، بەيجيڭ، حاڭجوۋ سياقتى جەرلەرگە ءبىر مىڭ 600 توننادان استام ساپالى مال ەتى ساتىلىپ، تۇتاس اۋدانىمىزداعى 500 دەن استام وتباسىنىڭ 50 مىڭ تۇياقتان استام ەمىل اق قويى مەن 2 مىڭ باستان استام شينجياڭ قوڭىر سيىرىن قامتىپ، اۋىل – قىستاق تۇرعىندارى ەلەكتروندى ساۋدانىڭ پايداسىنان شىن مانىندە يگىلىكتەندى» دەدى ءدوربىلجىن اۋداندىق ەلەكتروندى ساۋدادان قىزمەت وتەۋ ورتالىعىنىڭ جاۋاپتىسى سۇي جياندى.

    قازىرگە دەيىن شينجياڭ مايلى ازىق – تۇلىك شەكتى سەرىكتىگى، شيندا تۇڭچۋاڭ بيو – تەحنيكالىق ينجەنەريا شەكتى سەرىكتىگى، ءدوربىلجىن تيانحى – يۋان ەكولوگيالىق اۋىل شارۋاشىلىعى شەكتى سەرىكتىگى، ءدوربىلجىن فىڭمين قاز ەتى ونىمدەرى كاسىپتىك سەلبەستىك كووپەراتيۆى، ءدوربىلجىن جۋشى كۇنباعىس ەگىمشىلىگى سەلبەستىك كووپەراتيۆى، ءدوربىلجىن شينمۋ باعىمشىلىق كاسىپتىك سەلبەستىك كووپەراتيۆى سياقتى كاسىپورىندار ءدوربىلجىن اۋداندىق ەلەكتروندى ساۋدادان قىزمەت وتەۋ ورتالىعىنا ىرگە تەپتى.

جاۋاپتى رەداكتور: گۇلدەن ماقسات قىزى