حابارلاسۋ ىستەرىندەگى قارقىندى قادام

  • كەلۋ قاينارى: ىلە گازەتى
  • 03:53:46 09/11/2018

 

    رەفورما جاساپ، ەسىك اشقان 40 جىلدان بەرى حابارلاسۋ قۇرالدارىنىڭ وزگەرىسى ءداۋىردىڭ دامۋىمەن بىرگە وراسان زور وزگەرىستەردى باستان وتكەرىپ، حالىقتىڭ كۇندەلىكتى تۇرمىسىنا ىشكەرىلەي كىرىپ، قوعامنىڭ العا باسۋى مەن ەكونوميكانىڭ دامۋىنا وزىندىك ۇلەس قوستى.

    الدىڭعى عاسىردىڭ 70 – 80 – جىلدارىنداعى ادامداردىڭ نەگىزگى حابارلاسۋ قۇرالى حات نەمەسە تەلەگرامما بولدى. بۇل حابارلاسۋ قۇرالدارى سول ءداۋىر ادامدارىنىڭ ءوزارا حابار – وشار جەتكىزۋىندەگى ەڭ ماڭىزدى تاسىلدەردىڭ ءبىرى ەدى. دەسە دە، بۇل حابارلاسۋ قۇرالدارىنىڭ وزىندىك قولايلىلىعى بولعانىمەن، كەمشىلىكتەرى دە كوپ ەدى. حاتتار توبە بولىپ ءۇيىلىپ، جەتكىزۋ بارىسىندا جوعالۋ، ناقتى يەسىنە جەتە بەرمەۋ جايتتەرى تۋىندايتىن. ال تەلەگرامما تەز بولعانىمەن اقىسى تىم جوعارى بولىپ، كوپ ساندى بۇقارانىڭ تەلەگرامما جولداۋعا اقشا تولەۋ مۇمكىنشىلىگى از ەدى.

    موڭعۇلكۇرە اۋدانى ۇزىنبۇلاق اۋىلى جارمالى قىستاعىنىڭ تۇرعىنى شيە فىڭجيە بىلاي دەدى: ول داۋىردە بىزدە تەلەفون بولمايدى. الىستاعى جاقىن تۋىس – تۋعاندارعا، دوستارعا حابارلاسۋ ءۇشىن حات جازاتىن ەدىك. جازعان حاتتارىمىز پوچتا ارقىلى ءبىر ايدا ارەڭ جەتەتىن. وتە قولايسىز بولاتىن.

    ءداۋىردىڭ العا باسۋىمەن بىرگە، قوعامدىق ەكونوميكا دامىپ، ادامداردىڭ كۇندەلىكتى حابارلاسۋ قۇرالدارى دا كۇن سايىن جاڭالانىپ، دامىپ وتىردى. العاشقى اينالما تاباقشالى تەلەفون، BB اپپاراتى، «داگىدادان» تارتىپ، كەيىنگى عىلىم – تەحنيكانىڭ دامۋىنا ىلەسىپ، رەڭسىز سيفرلى GSM تەلەفوندارى جارىققا شىعىپ، جىلجىمالى تەلەفوندار بۇقارانىڭ تۇرمىسىنا تاماشا تيىمدىلىكتەر اكەلدى. بۇل تۇرپاتتى تەلەفونداردىڭ داۋىسى تۇنىق، سيگنالى تۇراقتى، يقۋاتى كۇشتى، شىدامدى سياقتى ارتىقىشىلىقتارىمەن كوزگە ءتۇستى. ءسويتىپ، قولفون بىرتىندەپ جالپىلاسۋعا بەت الدى. ال 21 – عاسىرعا قادام قويعاننان كەيىن جاڭا يقۋاتتى قولفونداردىڭ تۇرلەرى دە مولايىپ، ادامداردىڭ حابارلاسۋىنا قولايلىلىق جاراتتى. سونىمەن بىرگە، توراپ كەڭىستىگى دە ۇشقان قۇستاي دامىپ، QQ حابارلاسۋ قۇرالى، ۋيچات تەكشەسى سياقتى وزىق حابارلاسۋ قۇرالدارى كەڭ كولەمدە جالپىلاسىپ، ادامداردىڭ دىبىستى، كەسكىندى حابارلاسۋىنا قولايلىلىق جاراتىلىپ، قاس – قاعىمدا دۇنيەنىڭ جەر – جەرىمەن حابارلاسۋعا بولاتىن بولدى.

    قىستاق تۇرعىنى شيە فىڭجيە تاعى دا بىلاي دەدى: قازىر وتە جاقسى بولدى، مەملەكەت قۇدىرەتتەندى. عىلىم – تەحنيكا دامىدى. قازىر ىستەتىپ جۇرگەن قولفوندارىمىز جاڭا تيپتى، كوپ يقۋاتتى. تورعا جالعاپ كەسكىندى سويلەسۋگە بولادى. قاي جەردە جۇرسەڭ دە سيگنالى كۇشتى. وتە قولايلى بولدى.

    جاڭا اقپارات قۇرالدارى داۋىرىنە قادام تاستاعاننان بەرى قولفوندا حابارلاسۋعا، ۋيچاتتا سويلەسۋگە، سۋرەت – كەسكىن تۇسىرۋگە، ورىن تۇراقتاندىرۋعا، ينتەرنەتتەن زات ساتىپ الۋعا، ساباق وقۋعا، دەنە شىنىقتىرۋعا، اۋرۋ كورسەتۋ كەزەگىنە الدىن – الا كەلىسۋ سياقتى ىستەرگە قولدانىلۋعا بولاتىن بولدى. مىنە مۇنىڭ بارلىعى رەفورما جاساپ، ەسىك اشۋدىڭ شۇعىلالى ناتيجەسى.

           سەرىك تۇرسىنالى ۇلى

جاۋاپتى رەداكتور: گۇلدەن ماقسات قىزى