نەكەدەن اجىراسۋ دەلولارىنداعى رۋحاني تولەم ماسەلەسى جايلى

  • كەلۋ قاينارى: شينجياڭ زاڭ جانە تۇرمىس گازەتى
  • 10:24:45 12/11/2018

  

    دەلو مىسالى

    بيكە مەن مىرزانىڭ ۇيلەنگەنىنە 13 جىل بولعان بولىپ، ارالارىندا 12 جاسقا كەلگەن ٴبىر پەرزەنتتەرى بار، جاقىن جىلداردان بەرى ەكى جاق قىزمەت سەبەبىنەن بولەك تۇرعان بولىپ، ٴبىر جولى بيكە وقىستان جۇبايىنىڭ كوڭىلدەسى بارىن ٴارى ولاردىڭ بىرنەشە جىلدان بەرى بىرگە تۇرىپ كەلە جاتقاندىعىن، ارالارىندا ەكى جاسار ٴبىر بالانىڭ دا بار ەكەندىگىن بايقايدى. بيكە حالىق سوت مەكەمەسىنە ارىز ۇسىنىپ، نەكەدەن اجىراسىپ، بالانىڭ باعىپ - تاربيەلەۋ ۇقىعىن تالاپ ەتىپ، ورتاق مۇلىكتەردى ٴبولىسىپ الۋدى ورتاعا قويۋمەن بىرگە جۇبايىنان 100 مىڭ يۋان رۋحاني تولەم تالاپ ەتەدى.

    بيكەنىڭ بالا، مال - مۇلىك تۋرالى تالاپتارى بۇل ماقالامىزدىڭ نەگىزگى ٴتۇيىنى بولماعاندىقتان بۇل تۋرالى توقتالمايمىز، قايتا قازىر قوعامىمىزدىڭ قاسىرەتى بولعان نەكە داۋ - شارلارىنداعى رۋحاني تولەم جايلى ايالداۋدى ٴجون كوردىم. وندا بۇل ٴتۇيىن تۋرالى زاڭ نە دەيدى ەكەن، نازار سالايىق.

    1. نەكەدەن اجىراسقاندا رۋحاني تولەم تالاپ ەتۋگە بولا ما؟

    «جۇڭحۋا حالىق رەسپۋبليكاسى نەكە زاڭىنىڭ» 46 - تارماعىندا: تومەندەگى جاعدايلاردىڭ ٴبىرى كورىلىپ، نەكەدەن اجىراسۋعا تۋرا كەلگەندە، اعاتتىعى جوق جاقتىڭ تولەم تالاپ ەتۋ ۇقىعى بولادى:

    (1) قوس نەكەلەنگەن بولسا.

    (2) جۇبايى بولا تۇرىپ، باسقالارمەن ءبىر ۇيدە تۇرمىس كەشىرگەن بولسا.

    (3) وتباسى زورلىقتى قيمىل قولدانعان بولسا.

    (4) وتباسى مۇشەلەرىن قورلاپ، تاستاندى ەتكەن بولسا، -دەپ بەلگىلەنگەن.

    بۇل دەلوداعى احۋال وسى بەلگىلەمەنىڭ 2 - تارماقشاسىنا سايكەسەتىن بولىپ، بيكەنىڭ اعاتتىعى بولماعاندىقتان نەكەدەن اجىراسۋ بارىسىندا تولەم تالاپ ەتۋىنە بولادى. مۇنداعى «تولەم» رۋحاني تولەم مەن زاتتىق تولەمدى قامتيدى. الايدا ەكى جاق نەكەدەن اجىراستىرىلماعان جاعدايدا، ەكى جاقتىڭ نەكە بايلانىسى ساقتالىپ تۇرعان مەزگىلدە تولەم تالاپ ەتۋ تالابىن حالىق سوت مەكەمەسى قابىلدامايدى، تولەم تالاپ ەتۋدىڭ العى شارتى نەكەدەن اجىراسۋ تالابىن ورتاعا قويۋ بولىپ تابىلادى، باسقا تالاپتار وسى تالاپپەن بىرگە ورتاعا قويىلۋى كەرەك.

جاۋاپتى رەداكتور: گۇلدەن ماقسات قىزى