قاتىناس شىرعالاڭىندا تولەمگە كەلىسكەننەن كەيىن، مۇگەدەكتىك دارەجەسىنە جەتەتىنىن بايقاسا قايتالاي تولەم تالاپ ەتۋگە بولا ما

  • كەلۋ قاينارى: شينجياڭ زاڭ جانە تۇرمىس گازەتى
  • 10:28:29 12/11/2018

 

    ورال قاسەيىن ۇلى

    قاتىناس شىرعالاڭى تۋىلعاننان كەيىن، شىرعالاڭداعى ەكى جاق نەمەسە ءبىر قانشا جاق كەلىسىمگە كەلىپ تولەم بەرىپ بولعاننان كەيىن، ءبىر قىدىرۋ ۋاقىت وتكەننەن كەيىن زياندالۋشى جاق مەديتسينالىق جاقتان تەكسەرۋ الىپ بارۋ ارقىلى ساراپتاۋ ناتيجەسىندە مۇگەدەكتىك دارەجەسىنە جەتكەندىگى بايقالسا، قايتالاي تولەم تالاپ ەتۋگە بولا ما؟ بۇل جونىندە تومەندەگى دەلو مىسالىنا نازار سالايىق.

    دەلو جاعدايى

    2005 - جىلى 10 - ايدىڭ 4 - كۇنى، ۋ×× شاعىن اۆتوكولىگىمەن چىن ×× تى سوعىپ جارالاندىرىپ، قاتىناس ساقشى تاراۋى ۋ×× شىرعالاڭدا بارلىق جاۋاپكەرلىكتى ارقالايدى، چىن×× تە جاۋاپكەرلىك جوق دەپ تۇراقتاندىرادى. تاراپتار قاتىناس ساقشى ۇلكەن اترەتىنىڭ جاراستىرۋىندا ۋ×× چىن ×× تىڭ شيپاحانادا جاتىپ ەمدەلۋ بارىسىنداعى ەمدەلۋ قاراجاتىنان سىرت، جۇمىستان قالۋ اقىسى، كۇتىمدەنۋ اقىسى، سىرتتاي داۋالانۋ اقىسى بولىپ ءبىر جولاتا 8 مىڭ 500 يۋان بەرەتىن بولىپ كەلىسىپ، ۋ×× ناق مايداندا كەلىسىم بويىنشا تولەم سوماسىن بەرەدى.

    2007 - جىلى 10 - ايدىڭ 26 - كۇنى چىن×× شيپاحاناعا جاتىپ ەكىنشى رەت وپەراتسيا جاساتقان، دياگنۋزى ۇرشىق سۇيەگى بۇزىلعان. ءادىليالىق ساراپتاۋ ارقىلى وڭ جاق ۇرشىعىنىڭ باسى كونە سىنىق سەبەبىنەن ۇرشىعى بۇزىلعان بولىپ، ۇرشىعىن اۋىستىرۋ وپەراتسياسىن جاساتۋ قاجەت بولعان. ساراپتاۋ ناتيجەسى: 8 - دارەجەلى مۇگەدەك دەپ شىعارىلعان. چىن×× سوت مەكەمەسىنە ۋ××تىڭ ۇستىنەن مۇگەدەكتىك تولەمى، جالعاستى ەمدەلۋ قاراجاتى، رۋحاني ازاپ اقىسى بولىپ جيىنى 72 مىڭ 239 يۋان تالاپ ەتىپ ارىز بەرگەن. چىن×× ەكى جاق شىرعالاڭداعى تولەم ماسەلەسى جونىندە كەلىسىمگە كەلگەمىز، بۇدان كەيىن قۋزاستىرمايتىن بولعان، كەلىسىمدى الدەقاشان اتقارىپ بولعامىن دەپ ءوزىن اقتاپ، سوت مەكەمەسىنەن تالاپكەردىڭ ارىزىن تويتارۋىن تالاپ ەتكەن.

    سوت ۇكىمى

    سوت مەكەمەسى تەكسەرىپ كورىپ تالاپكەر مەن جاۋاپكەر قاتىناس ساقشى تاراۋىنداعى كەلىسكەن جاراستىرۋ كەلىسىمى تاراپتاردىڭ ناقتىلى ويىنىڭ بەينەلەنۋى، كەلىسىمدەگى تولەم تۇرلەرىن كۇشكە يە دەپ تۇراقتاندىرۋ كەرەك. ءبىراق، تاراپتاردىڭ تولەم كەلىسىمىندە مۇگەدەكتىك تولەم سوماسى، جالعاستى ەمدەلۋ قاراجاتى، رۋحاني ازاپ اقىسى قاتارلىلار قامتىلماعان دەپ قاراعان. چىن××تىڭ وڭ ۇرشىعىنىڭ بۇزىلۋى مەن وڭ ۇرشىعىنىڭ سىنۋىندا سەبەپ - سالدارلىق قاتىناسى بار، وڭ ۇرشىعىنىڭ سىنۋى وڭ ۇرشىعىنىڭ بۇزىلۋىن كەلتىرىپ شىعارعان نەگىزگى فاكتوردىڭ ءبىرى، ۋ×× دىڭ چىن×× تىڭ وڭ ۇرشىعىنىڭ بۇزىلۋىن باسقا سەبەپتەردەن بولعان دەيتىن دالەل - ىسپاتى جوق، سوندىقتان، ۋ×× چىن××كە مۇگەدەكتىك تولەم سوماسى، جالعاستى ەمدەلۋ قاراجاتى، رۋحاني ازاپ اقىسى ءۇشىن 57 مىڭ 239 يۋان تولەسىن دەپ ۇكىم شىعارادى.

جاۋاپتى رەداكتور: گۇلدەن ماقسات قىزى