شينجياڭ تەمىر جول قۇرىلىسىنا جۇمسالاتىن 3 ميلليارد 500 ميلليون يۋان كومەك قارجىعا يە بولدى

  • كەلۋ قاينارى: ىلە گازەتى
  • 03:19:04 19/02/2019

    

    شينجياڭ گازەتىنىڭ حابارى (ءتىلشى شى شين). ءتىلشىنىڭ اۆتونوميالى رايوندىق دامۋ – رەفورما كوميتەتىنەن ۇعىسۋىنشا، اۆتونوميالى رايوندىق دامۋ – رەفورما كوميتەتى مەملەكەتتىك دامۋ – رەفورما كوميتەتى بوساتقان 2019 – جىلعى ورتالىقتىڭ مەجە ەسەبىنىڭ 3 ميلليارد 500 ميلليون يۋان كومەك قارجىسىنا يە بولعان، بۇل نەگىزىنەن حوتان – چارقىلىق تەمىر جولى، التاي – كوكتوعاي – شىعىس جوڭعار تەمىر جولى نىساندارىنىڭ قۇرىلىسىنا جۇمسالادى ەكەن.

    حوتان – چارقىلىق تەمىر جولى 2018 – جىلى 12 – ايدىڭ 20 – كۇنى جۇمىس باستاعان، بۇل نىسان باتىستا قاشقار – حوتان تەمىر جولىنىڭ حوتان ۆوگزالىنان باستالىپ، حوتان، لوپ، شەريا، كەريا، نيە، چەرچەن، چارقىلىق سياقتى 7 اۋدان – قالانى جانە شينجياڭ ءوندىرىس – قۇرىلىس بيڭتۋانى 2 – ديۆيزياسىنىڭ 37 –، 38 – تۋان الاڭىن، 10 – ديۆيزيانىڭ 225 – تۋان الاڭىن ەندەي ءوتىپ، شىعىستا گولمۋد – كورلا تەمىر جولىنىڭ چارقىلىق ۆوگزالىنا تۇتاسادى، لەنيانىڭ جالپى ۇزىندىعى 825.476 كيلومەتر، نىساننىڭ قۇرىلىس ۋاقىتى 3 جارىم جىل. التاي – كوكتوعاي – شىعىس جوڭعار تەمىر جولى 2015 – جىلدىڭ سوڭىندا جۇمىس باستاعان.

    بۇل تەمىر جولدىڭ لەنياسى سولتۇستىكتە سالىنىپ جاتقان بەيتۇن – التاي تەمىر جولىنىڭ التاي ۆوگزالى، وڭتۇستىكتە ءۇرىمجى – جياڭجۇنمياۋ تەمىر جولىنىڭ شىعىس جوڭعار ۆوگزالىنا تۇتاسادى، جالپى لەنياسى 420 كيلومەتر. وسى جولعى قارجى قوسۋ جوسپارىنىڭ بەكىتىلۋى شينجياڭنىڭ تەمىر جول نىسانى قۇرىلىسىن جەبەپ، حوتان – چارقىلىق تەمىر جولى، التاي – كوكتوعاي – شىعىس جوڭعار تەمىر جولى سياقتى نىسان قۇرىلىستارىن پارمەندى كەپىلمەن قامدادى.

    ۇعىسۋعا قاراعاندا، بيىل اۆتونوميالى رايون ءتۇيىندى نەگىزدىك قۇرىلعىلار قۇرىلىسىنىڭ اتقارىلۋىن ۇزدىكسىز ىلگەرىلەتىپ، قارجى قوسۋدىڭ ءتۇيىندى رولىن ساۋلەلەندىرىپ، ەكونوميكانىڭ دامۋ نەگىزىن بەكەمدەيدى. مۇنىڭ ىشىندە 2019 ـ جىلى شينجياڭنىڭ تەمىر جول نىسان قۇرىلىسىنا 10 ميلليارد 327 ميلليون يۋان قارجى قوسۋ جوسپارلاندى. اۆتونوميالى رايون جوسپارلاعان تەمىر جول نىساندارى مىنالاردى قامتيدى: كورلا – گولمۋد تەمىر جولى سياقتى جالعاستى سالىناتىن ءبىر توپ نىسان قۇرىلىسى، قارامايلى ـ شاۋەشەك تەمىر جولىن، بۇراتالا وبلىسىنىڭ قوسالقى لەنيالى تەمىر جولىن سالۋ؛ حوتان ـ چارقىلىق تەمىر جولى، وڭتۇستىك شينجياڭ تەمىر جولىنىڭ كورلا ـ قاشقار لەنياسىنىڭ قارقىنىن ارتتىرۋ، قۋاتىن كەڭەيتۋ، وزگەرتىپ سالۋ سياقتى نىسان قۇرىلىستارىن جەدەلدەتۋ؛ قۇلجا ـ اقسۋ تەمىر جولى سياقتى نىساننىڭ الدىڭعى مەرزىمدىك قىزمەتىن جەبەۋ.

جاۋاپتى رەداكتور: جازيرا بولاتباي قىزى