تۋ يوۋيوۋ ءبىر تال ءشوپ ارقىلى دۇنيەنى وزگەرتتى

  • كەلۋ قاينارى: ىلە گازەتى
  • 03:23:31 30/05/2019

ءارقايسى پاتشالىقتار كەزىندەگى ءدارى وسىمدىكتەرى جٶنىندەگى شيپاگەرلىككە قاتىستى كىتاپتاردى تاپتىشتەي وقىعاننان كەيىن تۋ يوۋيوۋ سوڭىندا 2 مىڭ تۇرلىدەن استام ءدارى ءشوپ ىشىنەن 640 تۇرلىدەن استام ءدارى ءشوپتى ىرىكتەپ شىعىپ، كوك ەرمەندى قامتىعان «بەزگەككە قارسى ءدارىنى جەكە ءتۇر بويىنشا تاجىريبەدەن وتكىزۋ جيناعىن» قۇراستىرىپ شىقتى. مۇنى قۇنتتاپ قايتا – قايتا تاجىريبەدەن وتكىزدى، بۇل ۇزاق ۋاقىتتى قاجەت ەتەتىن، بەينە تەڭىزدەن تەبەن ىزدەگەندەي ماشاقاتتى بارىس بولىپ، عىلمي زەرتتەۋ قىزمەتكەرلەرىنىڭ تالعامپازدىعى، عىلمي ورەسى جانە عىلىم جٶلىندا قاجىرلىلىقپەن ەڭبەكتەنۋ ورەسى جٶنىنەن العاندا ءبىر قاتاڭ سىن ەدى. سوڭىندا ول 200 ءتۇرلى دارىدەن 380 ءتۇرلى اكتيۆ زاتتى ايىرىپ شىعىپ، ايىرىپ شىققان بۇل زاتتاردى اق تىشقاننىڭ دەنەسىندەگى بەزگەككە قارسى تەكسەرۋگە پايدالاندى، دەسە دە، بۇل سىناق ونشا ءساتتى بولمادى. اسىرەسە، حايۋانداردىڭ دەنەسىنە العاشقى رەت جاسالعان سىناقتا بۇرىننان بەرى بەزگەكتى ەمدەۋدە ءونىمى كورنەكتى دەپ قارالعان ەرمەننىڭ ءونىمى ويداعىداي بولماعاندىقتان، تۋ يوۋيوۋدىڭ زەرتتەۋى دە ءبىر مەزگىل ىڭعايسىز جاعدايعا تاپ بولدى.

    ەرمەن - ءبىر ءتۇرلى جاسىل وسىمدىك. ۇنەمى سىرتتا ءدارى ءشوپ ىزدەيتىن تۋ يوۋيوۋ جونىنەن العاندا ەرمەن وعان بەيتانىس ەمەس ەدى. تۋ يوۋيوۋ بىلاي دەيدى: «ەرمەننىڭ قۇرامىندا ءونىمى ءبىر – بىرىنە مۇلدە ۇقسامايتىن 6 ءتۇرلى ءدارى ءشوپ ءنارى بار ءارى ءاربىرىنىڭ حيميالىق قۇرامى دا ءبىر – بىرىنەن پارىقتى، سول سەبەپتى بەزگەكتى ەمدەۋدەگى ءونىمى دە ۇقسامايدى». ءسوز وسى اراعا كەلگەندە ەسىمىزگە تۋ يوۋيوۋدىڭ اتىن قويعان كەزدە اكەسىنىڭ ەسىنە ەرىكسىز ورالعان الگى ولەڭ جولدارى كەلەدى. سوندا «يوۋيوۋ» مەن «ەرمەن» شىنىندا ويلاماعان تاعدىرلاستار بولعانى ما؟ بۇل جاعى بىزگە بەيمالىم بولعانىمەن، ايتەۋىر تۋ يوۋيوۋدىڭ زەرتتەۋ بارىسىنىڭ نەداۋىر كوپ ءبولىمى ءتۇرلى ەرمەندى زەرتتەۋگە جٷمسالدى، قايتا – قايتا تاجىريبە جاساپ، سىناقتان وتكىزۋ جانە قۇرامىنا تالداۋ جاساۋ بارىسىندا تۋ يوۋيوۋ ەرمەن قۇرامىنداعى بەزگەكتى ەمدەۋ ونىمدىلىگى ەڭ جٶعارى زاتتىڭ باسقا ورىندا ەمەس، ءدال جاپىراقتا، اسىرەسە، جاڭا شىققان جاپىراقتا ەكەندىگىن بايقادى. بۇدان تىس ارناۋلى تاقىرىپتىق زەرتتەۋ گرۋپپاسى تاعى ەرمەننىڭ جاپىراعىن جينايتىن ەڭ تاماشا مەزگىلدىڭ ەرمەننىڭ گۇل اشۋ الدىنداعى كەزى ەكەندىگىن، بۇل مەزگىلدە جاپىراق قۇرامىنداعى ارتەاننۋين مولشەرىنىڭ ەڭ جوعارى بولاتىندىعىن بايقادى. وسىلايشا قانىق جاسىل ءتۇستى ەرمەن قۇرامىندا ادام جانىن اجالدان اراشالايتىن شيپالى قاسيەتتىڭ بار ەكەندىگى راستالا باستادى. تۋ يوۋيوۋ جەتەكشىلىك ەتكەن زەرتتەۋ گرۋپپاسى 1971 – جىلى 10 – ايدىڭ 4 – كۇنى 190 – رەتكى ساتسىزدىككە تاپ بولعان سوڭ 191 – رەتكى تومەن تەمپەراتۋرادا ءدارى ءشوپ قايناتۋ تاجىريبەسىنە كىرىسىپ، تومەن تەمپەراتۋرادا قاينايتىن ىدىراتقىش ەتيل ەفير ارقىلى بەزگەكتى ەمدەۋدە ونىمدىلىگى جوعارى اكتيۆ قۇرامدى ايىرىپ شىقتى. وسىلايشا ەرمەن ارقىلى بەزگەك اۋرۋىنان ساقتانۋ جانە ونى ەمدەۋدىڭ ونىمدىلىگى جوعارىلاتىلدى. ولار قايتا – قايتا سىناقتان وتكىزۋ ارقىلى دارىگە قوسىلاتىن ەرمەندەگى ۋلى قۇرامدى بارىنشا تومەندەتتى. سودان كەيىنگى كوپ رەت حايۋاندارعا جاسالعان سىناقتىڭ ناتيجەسى بارشانى ەرەكشە قۋانتتى. ياعني رەت – ءتارتىبى 191 بولعان ەرمەننەن ايىرىپ الىنعان بۇل سۇيىقتىقپەن بەزگەك قوزدىرعىشتان جۇعىمدالعان تىشقان جانە مايمىلدى ەمدەگەندە ءونىمدىلىگى 0/0100 بولدى.

جاۋاپتى رەداكتور: گۇلدەن ماقسات قىزى