شي جينپيڭ مەن پىڭ لييۋان جۇڭگو - چاۋشيان دوستىق مۇناراسىن قۇرمەتپەن كوردى

  • كەلۋ قاينارى: شينجياڭ گازەتى تورابى
  • 04:43:55 23/06/2019

   

 شينحۋا اگەنتتىگىنىڭ 6 - ايدىڭ 21 - كۇنى پيڭراڭنان بەرگەن حابارى (ءتىلشى چىن جى). 6 - ايدىڭ 21 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ مەن حانىمى پىڭ لييۋان جۇڭگو حالىق ەرىكتىلەر ارمياسى ەرجۇرەك قۇرباندارىنىڭ كەسەك ۇلەسىن، ەرەن ەڭبەگىن ەسكە ءتۇسىرۋ ءۇشىن سالىنعان جۇڭگو - چاۋشيان دوستىق مۇناراسىن قۇرمەتپەن كوردى. چاۋشيان ەڭبەك پارتياسىنىڭ كوميتەت باستىعى، مەملەكەت ىستەرى كوميتەتىنىڭ باستىعى جين جىڭىن مەن حانىمى لي شۋەجۋ سەرىك بولدى.

    جەرگىلىكتى ۋاقىت تۇستەن بۇرىن ساعات 10دا شي جينپيڭ مەن پىڭ لييۋان پيڭراڭ قالا رايونىنداعى مۋدان شوقىسىنىڭ باۋرايىنا ورنالاسقان جۇڭگو - چاۋشيان دوستىق مۇناراسىنا باردى، جين جىڭىن مەن لي شۋەجۋ اۆتوكولىكتەن تۇسەتىن جەردە قارسى الدى. ايبىندى بەينە ىشىندە، چاۋشيان حالىق ارمياسى 3 ارمياسىنىڭ قۇرمەت قاراۋىلى سالتاناتتى تۇردە قاتارعا تۇردى، اسكەري وركەستر جۇڭگو مەن چاۋشيان ەكى ەلدىڭ مەملەكەت ءانىن ورىندادى. مەملەكەت ءانى اياقتاعاننان كەيىن، قۇرمەت قاراۋىلى گۇل شارباقتى كوتەرىپ، مۇنارا تاعانىنىڭ تەكشەسىنە اكەلىپ قويدى. شي جينپيڭ بايسالدى قاداممەن ءجۇرىپ باسپالداقپەن شىعىپ، الدىعا ءوتىپ گۇل شارباقتىڭ لەنتاسىن رەتتەدى. قىزىل ءتۇستى تورعىن لەنتاعا ”جۇڭگو حالىق ەرىكتىلەر ارمياسىنىڭ قۇرباندارى ماڭگى جاسايدى“ دەپ جازىلعان. بارلىق ادام جۇڭگو حالىق ەرىكتىلەر ارمياسىنىڭ قۇرباندارىنا ءۇنسىز ازا ءبىلدىردى. ءۇنسىز ازا ءبىلدىرۋ اياقتاعاننان كەيىن شي جينپيڭ مەن جين جىڭىن قۇرمەت قاراۋىلىنىڭ سالتانات قاتارىن كوزدەن كەشىردى.

    شي جينپيڭ مەن حانىمى جين جىڭىن مەن حانىمىنىڭ سەرىك بولۋىندا، مۇنارانى اينالىپ، مۇناراعا ورنەكتەلگەن جۇڭگو حالىق ەرىكتىلەر ارمياسىنىڭ چاۋشيانعا اتتانعان كورىنىستەردى جانە جۇڭگو مەن چاۋشيان ەكى ەل حالقىنىڭ دوستىعى بەينەلەنگەن بەدەرلى ناقىشتى زەر سالا كوردى. وسىدان كەيىن شي جينپيڭ مەن حانىمى جين جىڭىن مەن حانىمىنىڭ سەرىك بولۋىندا، جۇڭگو - چاۋشيان دوستىق مۇناراسىنىڭ ەسكەرتكىش زالىنا كىردى. ەسكەرتكىش زالىندا شي جينپيڭ ەرىكتىلەر ارمياسى قۇرباندارىنىڭ ەسىمدىك داپتەرىنىڭ ءتۇپ نۇسقاسىن زەر سالا پاراقتاپ كوردى، داستاندىق قابىرعا سۋرەتتەردى كوردى. جۇڭگو - چاۋشيان دوستىعى جولىندا ەرلىكپەن ءوزىن ارناعان وتاننىڭ تاڭداۋلى پەرزەنتتەرىنە شىنايى ساعىنىشتا بولا وتىرىپ، شي جينپيڭ ارناۋ ءسوز داپتەرىنە: ”قۇربانداردى ساعىنا ەسكە الىپ، ۇرپاقتان - ۇرپاققا دوس بولايىق“ دەپ ارناۋ ءسوز جازدى.

    شي جينپيڭ مىنانى ءبىلدىردى: بۇگىن مەن شەكسىز قۇرمەتكە تولى كوڭىل كۇيمەن جۇڭگو - چاۋشيان دوستىق مۇناراسىن قۇرمەتپەن كوردىم. ەرىكتىلەر ارمياسى قۇرباندارىنىڭ ەسىمدىك داپتەرىندە جانە ەسكەرتكىش زالىنداعى الىپ سىزبا سۋرەتتە جۇڭگو حالقىنىڭ بارىنە وتە تانىس حۋاڭ جيگۋاڭ، چيۋ شاۋيۇن، ياڭ گىنسى، لو شىڭجياۋ قاتارلى ەرىكتىلەر ارمياسىنداعى ەرجۇرەك قۇربانداردىڭ ەسىمى مەن وبرازى بار ەكەن، ولاردىڭ قاھارماندىق ىزگى ىستەرىن جۇڭگوداعى جالپى قاۋىم بىلەدى. بۇگىن ءبىزدىڭ جۇڭگو - چاۋشيان دوستىق مۇناراسىن بىرگە قۇرمەتپەن كورۋىمىز، بىرىنشىدەن، قۇربانداردى ساعىنا ەسكە الىپ، اعا بۋىن توڭكەرىسشىلەردىڭ تىزە قوسا سوعىس جۇرگىزگەن داڭقتى تاريحىمەن قايتا قاۋىشۋ؛ ەكىنشىدەن، ۇرپاقتاردى جۇڭگو مەن چاۋشياننىڭ ءداستۇرلى دوستىعىن ەستە بەرىك ساقتاۋعا ءارى جالعاستىرۋعا شابىتتاندىرۋ؛ ۇشىنشىدەن، دۇيىم جۇرتقا جۇڭگو مەن چاۋشيان ەكى ەلدىڭ بەيبىتشىلىكتى قورعاۋ بەرىك سەنىمىن ايگىلەۋ. ءبىز، ءسوز جوق، جۇڭگو مەن چاۋشياننىڭ دوستىعىن ۇرپاقتان - ۇرپاققا جالعاستىرىپ، ەكى ەلدىڭ سوتسياليزم ىستەرىن بەكەمدەپ جانە دامىتىپ، ەكى ەل حالقىن اناعۇرلىم ويداعىداي باقىتقا كەنەلتىپ، ءوڭىردىڭ بەيبىتشىلىگىن، ورنىقتىلىعىن، دامۋىن، گۇلدەنۋىن جەبەۋىمىز كەرەك.

    جين جىڭىن بىلاي دەدى: چاۋشيان - جۇڭگو دوستىق مۇناراسى − چاۋشيان مەن جۇڭگونىڭ ءداستۇرلى دوستىعىنىڭ وشپەس ەسكەرتكىشى، چاۋشيان پارتياسى، ۇكىمەتى جانە حالقى جۇڭگو حالىق ەرىكتىلەر ارمياسىنىڭ چاۋشياندا شاپقىنشىلىققا قارسى تۇرۋ بارىسىندا ەرلىكپەن قۇربان بولعاندىعىن ماڭگى ەستە ساقتايدى ءارى جاڭا داۋىردە چاۋشيان - جۇڭگو دوستىعىن ۇزدىكسىز جالعاستىرىپ جانە دامىتىپ، ەكى ەل سەلبەستىگىن كۇشەيتىپ، ەكى ەل قارىم - قاتىناسىنىڭ جاڭا دا اناعۇرلىم زور تابىستارعا قول جەتكىزۋىن ىلگەرىلەتەدى.

    ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.

    چاۋشيان جاقتان سۇي لۇڭحاي، پياۋ فىڭجۋ، لي جۋيۇڭ، لي يۇڭحاۋ، جين نىڭۋ، جين يۇيجىڭ قاتارلىلار قۇرمەتپەن كورۋگە قاتىناستى.

جاۋاپتى رەداكتور: گۇلدەن ماقسات قىزى