سىبە شەشەي ۋ شيۋفاڭ تەرەڭ سۇيىسپەنشىلىكپەن ۇلتتار ىنتىماعىنىڭ ماداق جىرىن شىرقادى

  • كەلۋ قاينارى: ىلە گازەتى
  • 04:11:40 11/07/2019

 

   يان جيانشيا (ءوز ءتىلشىمىز)

 

    چاپچال سىبە اۆتونوميالى اۋدانىندا سىبە شەشەي ۋ شيۋفاڭنىڭ اڭگىمەسىن جۇرت تەگىس بىلەدى. ول انالىق ۇلى ماحابباتىمەن 8 بالانى باعىپ ەرجەتكىزدى، ونىڭ ەكەۋى عانا ءوز بالاسى بولسا، قالعان التاۋى قانداستىق قاتىناسى جوق حانزۋ پەرزەنتتەرى بولاتىن. ول 20 نەشە جىلدان بەرى 21 كەدەي وقۋشىعا قالتقىسىز قارجىلاي كومەك بەردى.

    مەملەكەتتىك ۇلتتار ىنتىماعى العاباسارلىعىنداعى ۇلگىلى جەكە، اۆتونوميالى رايوندىق ۇلتتار ىنتىماعى العاباسارلىعىنداعى ۇلگىلى جەكە، شينجياڭداعى «10 تاڭداۋلى انا»، مەملەكەتتىك وركەنيەتتى وتباسى، ىلە وبلىسىنىڭ ءمورال ۇلگىسى... مىنە، وسىلاردىڭ بارلىعى ۋ شيۋفاڭنىڭ قول جەتكىزگەن داڭقتارى. جۋىقتا ۋ شيۋفاڭ اۆتونوميالى رايون بويىنشا ءمورال ۇلگىسى، شينجياڭ بويىنشا تاڭداۋلى كوممۋنيستىك پارتيا مۇشەسى بولىپ ماراپاتتالدى.

    شىنايى بوداۋ بەرىپ، 6 حانزۋ پەرزەنتىن اسەرلەندىردى

    «ءبىزدىڭ ءومىر ءسۇرۋىمىز تۇرمىستا نەندەي ءبىر نارسەگە قول جەتكىزۋىمىز ءۇشىن بولماستان، قايتا باسقالاردى اناعۇرلىم باقىتقا كەنەلتۋگە قۇلشىنۋ ءۇشىن» دەپ ۋ شيۋفاڭ ءوزىنىڭ رۋحاني تالپىنىسىن قاراپايىم عانا بەينەلەپ بەردى. ول بيىل 63 جاسقا كەلىپ دەنساۋلىعى ناشارلاپ قالسا دا، كۇيەۋى ەكەۋى 5 سيىر باعىپ، ءار كۇنى بازاردا جالىقپاي ءسۇت ساتىپ، ودان تۇسكەن اقشامەن ءوزىنىڭ الەۋمەتتىك يگىلىك ىستەرىن ۇزدىكسىز جالعاستىرىپ كەلەدى.

    ۋ شيۋفاڭ جاس كەزىندە چاپچال گازەتحاناسىندا قىزمەت ىستەگەن، قوساعىنان ەرتە ايىرىلعان ول 20 نەشە جىلدىڭ الدىندا باسقالاردىڭ تانىستىرۋىمەن قازىرگى حانزۋ كۇيەۋى سۇي گوشينمەن تانىسقان. كەزىندە سۇي گوشين 6 بالا ەرتىپ كەلگەندىكتەن، 8 بالانى باعىپ – قاعۋعا تۋرا كەلدى، 10 ادامنان قۇرالعان وسى ۇلكەن شاڭىراق كوپتەگەن ءىس جۇزىندىك ماسەلەگە ءدوپ كەلدى.ۋ شيۋفاڭ ءبىر شەشىمگە كەلە الماي ءارى – ءسارى بولىپ جۇرگەندە، بۇعاناسى قاتپاعان بالالاردىڭ قارايلاساتىن شەشەسى جوق، كىپ – كىشكەنە قولدارىمەن كىر جۋىپ وتىرعانىن كورگەندە، ءىشى ۋداي اشىپ، وسى وتباسىنا كىرۋ جونىندە ءبىر بەكىمگە كەلەدى.

    كەزىندە كەيبىرەۋلەر ۋ شيۋفاڭ سيىر باعاتىن حانزۋ شالدى تاۋىپ «اقىماق» بولىپتى، اۋەلى 6 بالاسى بار ەكەن دەسەدى. ۋ شيۋفاڭ ۇلكەن اۋىرىتپاشىلىققا توزە ءجۇرىپ، كۇيەۋىمەن بىرگە قۇلشىنىپ، وتباسىن ويداعىداي باعىپ – قاعىپ، بالالاردى دارىندى ەتىپ تاربيەلەۋ جونىندە ىشتەي ءبىر بەكىمگە كەلەدى. نەكەلەنگەننەن كەيىنگى العاشقى 3 جىلدا تۇرمىستارى بارىنشا جاپالى بولىپ، بۇكىل وتباسىنىڭ كيىم - كەشەك، جاتىن ورىن، ءجۇرىپ – تۇرۋ ىستەرى مەن بالالارىنىڭ وقۋ قاراجاتى سياقتىلار ۋ شيۋفاڭدى مازاسىز كۇيگە تۇسىرەدى. ول كۇيەۋىمەن بىرگە ءار كۇنى ساعات 5، 6 لاردا ورىندارىنان تۇرىپ، ءشوپ ورىپ كەلىپ سيىرلارىنا بەرىپ، سيىر ساۋعاننان كەيىن ۆەلوشيپەدپەن بازارعا بارىپ ءسۇت ساتاتىن.

جاۋاپتى رەداكتور: گۇلدەن ماقسات قىزى