جۇماتاي اۋباكىر ۇلى: نەگىزگى ساتىعا تامىر تارتىپ، مال شارۋاشىلىق رايونىنا قىزمەت وتەپ، اۋەلگى ماقساتتى ساقتايمىن

  • كەلۋ قاينارى: ىلە گازەتى
  • 04:42:39 09/08/2019

    ىلە وبلىسىنان ءار جىلى مەملەكەت دارەجەلى، اۆتونوميالى رايون دارەجەلى جانە اۆتونوميالى وبلىس دارەجەلى ەڭبەك ۇلگىسى داڭقتى اتاعىنا يە بولعاندار ۋاكىلدەرىنىڭ ىزگى ىستەرى جونىندەگى جەلىلەس حابار (3 )

    لۋ جۇڭ

    

    تەكەس اۋدانىنداعى مەملەكەتتىك «1 – مامىر» ەڭبەك مەدالىنىڭ يەگەرى جانە مەملەكەتتىك تاڭداۋلى اۋىل – قىستاق شيپاگەرى جۇماتاي اۋباكىر ۇلى الدەقاشان تانىمال ادامعا اينالعان، ونى تانيتىنداردىڭ ءبارى: «سوڭعى ەكى جىلدا ول ءباز باياعىسىنداي، ءالى دە سونداي قاراپايىم تۇرمىس كەشىرۋدە» دەيدى.

    بوزادىر وتارىنداعى مىڭنان استام مالشى جونىنەن العاندا، جۇماتاي ەشقاشان وزگەرمەيتىن قاراپايىم جان، ول بۇرىنعىداي قارلى تاۋدان اسىپ، مۇزدى وزەننەن ءوتىپ، اسقار تاۋ قويناۋىنداعى تەرەڭ شاتقالداردى ارالاپ، مالشىلاردىڭ ناۋقاسىن ەمدەپ، ولارعا ءدارى – دارمەك جەتكىزەتىن ات ءۇستى شيپاگەرى. ەگەر قانداي وزگەرىس بولدى دەگەن سۇراۋ تۋىنداسا، جۇماتاي ءوزىنىڭ ارقالايتىن جۇگىنىڭ ءتىپتى دە اۋىرلاعانىن تىلگە تيەك ەتەدى. ويتكەنى، تەكەس اۋدانى بوزادىر كوكسۋ اراسانى مال شارۋاشىلىق ەمحاناسىنىڭ ورىنباسار باستىعى بولعان ونىڭ الاڭدايتىن شارۋاسى كوپ – اق. «ەمحانادا قازىر جۇڭگوشا ەمدەۋ شيپاگەرى مەن ءدارىشى كەم بولىپ وتىر. مۇنان تىس، ەمحاناداعى قازىرگى بار 8 شيپاگەردىڭ ءبارى دە 40 جاستان اسقاندار، ءبىز زەينەتكە شىققان سوڭ، بۇل اراداعى قىزمەتتى كىم جالعاستىرادى؟» دەدى 7 – ايدىڭ 26 – كۇنى تىلشىلىك بارىسىندا جۇماتاي تىلشىگە اعىنان اقتارىلا.

    بوزادىر تيانشاننىڭ تەرەڭ قويناۋىنا ورنالاسقان، تەڭىز دەڭگەيىنەن بيىكتىگى 3 مىڭ مەتردەن اسادى، تەكەس اۋدانىنداعى ەڭ تاماشا تابيعي قىستاۋلىق، ءار جىلى قىستا مىڭنان استام مالشى وتباسى وسى ارادا قىستايدى. قىس ماۋسىمى جۇماتاي ءۇشىن ەڭ قاربالاس ماۋسىم، 12 – ايدان باستاپ 4 – ايعا دەيىن ەمحاناداعى 8 شيپاگەر 2 گرۋپپاعا ءبولىنىپ، ارالاپ ءجۇرىپ ناۋقاس كورىپ، مالشىلاردى ەمدەپ، ءدارى - دارمەك جەتكىزەدى. جۇماتاي مەن ەمحانا باستىعى ەكەۋى جەكە - جەكە ەكى گرۋپپاعا ءبولىنىپ كەزەكتەسىپ ناۋقاس كورىپ، مالشىلاردى ەمدەيدى. ءبىر قىستا ءبىر شاعىن گرۋپپا ءۇش – ءتورت رەت، ءبىر رەتتە 20 نەشە كۇن تەكسەرۋ جۇرگىزىپ، اۋرۋ ەمدەيدى. «ەڭ الىس ارالىق 100 كيلومەتردەن اسادى، اتپەن 4 كۇندە بارۋعا بولادى. كەيىنگى جىلداردا بوزادىردىڭ جولى كوپ جاقساردى، جارىم جولعا دەيىن جەڭىل اۆتوكولىك قاتىناي الادى. بۇرىنعى 6 جاي اسپالى كوپىردىڭ بارلىعى بولات تاقتالى كوپىرگە وزگەرتىلىپ جاسالدى، ۇستىنەن جۇرگەندە تەربەلمەيدى» دەدى جۇماتاي.

    جارتى جولعا دەيىن كولىك قاتىناعانىمەن، ارالاپ تەكسەرۋ كەزىندە جۇماتاي مەن قىزمەتتەستەرى جانە دە اتقا مىنۋگە تۋرا كەلەدى، «ات بولماسا قالعان جولدى قالاي جۇرۋگە بولسىن».

    2012 – جىلدىڭ قىس مەزگىلىنەن باستاپ مالشىلارعا نەگىزگى ءدارى – دارمەك اقىسىز بەرىلەتىن بولدى. ءار رەت ارالاپ تەكسەرۋ كەزىندە جۇماتاي 40 كيلوگرامنان استام ءدارى – دارمەكتى، ون كيلوگرامنان استام ۇگىت ماتەريالدارىن الىپ جۇرەدى، بۇدان تىس، ءمىنىس كولىگىنىڭ 30 كيلوگرام جەم – ءشوبى تاعى بار، جۇماتاي تاعى ءبىر دوربا ءتاتتى – تامەلەك الا جۇرەدى ەكەن. ول ءتاتتى - تامەلەكتى مالشىلاردىڭ بالالارىنا تارتۋ رەتىندە بەرەدى، ول بىلاي دەيدى: «بالالاردىڭ ءتاتتىنىڭ قابىعىن ارشىپ اۋزىنا سالعانداعى قۋانىشتى بەينەسىن كورگەندە، ايرىقشا شاتتانامىن».

جاۋاپتى رەداكتور: جازيرا بولاتباي قىزى