اۋىل بالالارىنىڭ اعا جۇلدەگەر بولۋ ارمانى

  • كەلۋ قاينارى: ىلە گازەتى
  • 04:43:37 09/08/2019

    لۋ جۇڭ

    

    جايشىلىقتا ءتۇرلى ماشىقتارى جالعاساتىن جابىق جاتتىعۋ زالى اشەكەيلەنە باستاعاندىقتان، 7 - ايدىڭ 30 - كۇنى ەرتە 14 جاستاعى ەستاي جۇماتاي ۇلى جانە سەرىكتەرى زال ىشىندەگى توسەنىش سەكىلدى ءتۇرلى جاتتىعۋ اسپاپتارىن اۋلا ىشىندەگى قولايلى جەرگە تاسىپ جەتكىزدى دە، جاتتىعۋدى جالعاستىردى.

    ەستاي - نىلقى اۋدانى لاستاي قالاشىعى سەنترلى مەكتەبىنىڭ وقۋشىسى. ول - جىل باسىنان باستاپ وسى مەكتەپتە اشىلعان بالا بالۋانداردى تاربيەلەۋ كلاسىنداعى 30 وقۋشىنىڭ ءبىرى. لاستاي قالاشىعىنان سىرت، كورشى اۋىل - قالاشىقتان كەلگەن بالالار دا بار. بۇلاردىڭ دەنى جەتى - سەگىز جاستاردا. بالا بالۋانداردىڭ جاتتىعۋىنا قولايلى بولۋ ءۇشىن مۇندا 20 مىڭ يۋانداي قارجى شىعارىلىپ، ءتۇرلى جاتتىعۋ اسپاپتارى ساتىپ الىندى. بالالاردىڭ جاتتىعۋ كەزىندە پايدالانىپ وتىرعان توسەنىشتەرى دە سول اقشادان كەلگەن ەدى.

    بالاسى بالۋان تاربيەلەۋ كلاسىنا قاتىناسپاسا دا، لاستاي قالاشىعى مال شارۋاشىلىق، مال شيپاگەرلىك پۋنكتىنىڭ باستىعى شاعانبات 500 يۋان جىلۋ اتادى. «مەنىڭ بۇلاي ىستەۋىم بالالاردىڭ قامى ءۇشىن» دەدى ول.

    بالالار ءار كۇنى جاتتىقتىرۋشىنىڭ جالىقپاي جەتەكشىلىك ەتۋىندە دەنە قىزدىرۋ ارەكەتىنىڭ ءار ءتۇرىن بەلسەندى دە جالىندى ورىنداۋعا ۇمتىلادى.

    جاتتىقتىرۋشى باقىتباي نۇرقوجا ۇلى: «دەنە قىزدىرۋ ارەكەتىنىڭ ءتۇرى 30 دان اسادى، بارىنە اينالاسى جارىم ساعاتتان ارتىق ۋاقىت كەتەدى» دەدى.

    جاتتىعۋ بارىسىنداعى بولماشى جاراقاتتارىن ەلەمەي، جاتتىعۋىن تاباندىلىقپەن جالعاستىرعان ەستايدىڭ ەڭ ۇلكەن ارمانى - كۇندەردىڭ كۇنىندە وليمپيادا اعا جۇلدەگەر بولۋ.

    لاستاي قالاشىعىنداعى بۇقارا بالۋاندىقتى قۇمارتا قىزىقتايدى، بۇل ارادان تالايلاعان تانىمالى بالۋاندار دا شىققان، باقىتباي انە سولاردىڭ ءبىرى ەدى. ول 2004 - جىلى ورتالاۋدى ءبىتىرىپ، وبلىستىق دەنەتاربيە مەكتەبىنىڭ بالۋاندىق كاسىبىنە قابىلدانادى. بۇل مەكتەپتى بىتىرگەننەن كەيىن باقىتباي كوپ رەت اۆتونوميالى رايون دارەجەلى جارىسقا قاتىناسىپ، بىرنەشە رەت اعا جۇلدەگەر بولادى. قۇلجا قالاسىنداعى ءبىر جاتتىقتىرۋ سارايىندا ايىنا 5 مىڭ يۋان ەڭبەكاقى الاتىن باقىتباي قىسقى، جازعى كانيكۋل كەزى مەن اپتا سوڭىندا اۋىلىنا ارنايى ات باسىن بۇرىپ، مۇنداعى بالا بالۋانداردىڭ تالابىن ۇشتاۋدى ازاماتتىق بورىش سانايدى ءارى سونى تىنباي جالعاستىرادى. مۇندا تاباتىن كىرىسى ماردىمسىز بولعانىمەن دە، بۇل شارۋاسىن ماعىنالى جۇمىس دەپ تانيدى. قىزمەتتىڭ ءمانى زور دەپ قارايدى. ول بىلاي دەدى: «مىناۋ جاۋقازىندار بالۋاندىقتى قۇلاي سۇيەدى، ەگەر ولارعا مۇنى ەشكىم ۇيرەتپەسە، بۇل ورايدان ماڭگى ايىرىلادى. تۋعان اۋىلىمداعى وسى جەتكىنشەكتەردىڭ جىگەرىن شىڭداپ، دارىنىن ايگىلەۋىنە وراي جاراتۋدى بورىش ءارى داڭق سانايمىن».

    باقىتبايدى ەڭ قۋانتاتىنى - وسى بالالاردىڭ اراسىندا كوپتەگەن بالۋاندىق وركەننىڭ ءوسىپ كەلە جاتقانى. تاياۋدا وبلىس دارەجەلى جارىسقا 15 بالا بالۋان قاتىناسىپ، سەگىزى جۇلدەگەر بولىپ، تورتەۋى التىن مەدال الىپتى. ءبىر جىلعا جەتپەيتىن ۋاقىتتا مۇنشالىقتى تابىسقا قول جەتكىزۋ وڭاي ەمەس ەدى.

    شاكىرتتەرىنەن جەمىستى تابىس تىلەيتىن جاتتىقتىرۋشى باقىتباي دا شالقىعان كوڭىلىن باسا الماي: «وسى قارا دومالاقتاردىڭ اراسىنان ەرتەڭ -اق وليمپيادا اعا جٷلدەگەرى شىعۋى مۇمكىن» دەدى.

جاۋاپتى رەداكتور: جازيرا بولاتباي قىزى