«التىن كۇزدەگى وقۋعا كومەك بەرۋ» قيمىلى وتباسىندا قيىنشىلىعى بار22 ستۋدەنتتىڭ ارمانعا قانات قاعۋىنا دەم بەردى

  • كەلۋ قاينارى: ىلە گازەتى
  • 03:52:38 25/08/2019

    ايبىندى تۋ شىعارۋ سالتى اياقتالعاننان كەيىن قىستاق كوميتەتىنىڭ ۇلكەن اۋلاسىندا قيمىلعا قاتىناسقان باسشىلار مەن مەيىر باعىشتاعان كاسىپورىن جاۋاپتىلارى، وتباسىندا قيىنشىلىعى بار 22 ستۋدەنتتىڭ ءار بىرىنە 2 مىڭ 500 يۋان كومەك قاراجات تاراتىپ بەردى. كومەك قاراجاتتار ستۋدەنتتەردىڭ قولىنا ءتيىپ، مەيىرگە تولى شابىتتاندىرۋ سوزدەرى ارت – ارتىنان ايتىلعاندا، اسەرلەنگەن اتا – انالار مەن وقۋشىلار قوعامنىڭ مەيىر – شاپاعاتىنا العىس جاۋدىردى. كومەككە يە بولعان ستۋدەنتتەر ۋاكىلى ماۋليدا مامەتاسەن وزىنە كومەك بەرگەن ىزگى جاندارعا العىس ايتىپ، ورايدى قاستەرلەپ، قۇلشىنا ۇيرەنىپ، ومىرلىك ارمانىن جۇزەگە اسىرىپ، قوعامنىڭ ءار سالاسىنداعىلاردىڭ وزىنەن كۇتكەن ءۇمىتىن اقتايتىندىعىن ءبىلدىردى. بۇل رەتكى قيمىلدى وبلىستىق قىزىل كرەست قوعامى مەن ىلە وبلىستىق ۋىنجۋلىق ساۋداگەرلەر بىرلەستىگى، شينجياڭ جينماۋ ساۋدا شەكتى سەرىكتىگى ىلە بولىمشە سەرىكتىگى، جينماۋ شينتياندي پارتكومى ۇيىمداستىرىپ ورىستەتكەن، قيمىلدا مەيىر باعىشتاعان مەكەمەلەر مەن كاسىپورىندار 55 مىڭ يۋان جىلۋ اتادى.

    الەمدەگى بارشا تىرشىلىك كۇننىڭ شۇلەن شۇعىلاسىنا مۇقتاج. دەركەزىندە ورىستەتىلگەن «التىن كۇزدەگى وقۋعا كومەك بەرۋ» قيمىلى وتباسىندا قيىنشىلىعى بار بۇل ستۋدەنتتەردىڭ نۇرلى بولاشاققا دەگەن تالپىنىسىنا زور ءۇمىت جانە شەكسىز قوزعاۋشى كۇش قوستى.

    «مەنىڭ ۇلىم بيىل سولتۇستىك جۇڭگو ەلەكتر ەنەرگيا داشۋەسىنە قابىلدانعاندا، وتباسىمىزداعىلار تۇگەل قاباعات قۋاندىق! دەسە دە وقۋ باستاۋ ۋاقىتىنىڭ تاياي تۇسۋىنە ىلەسىپ، وقۋ قارجاتىن قالاي تابۋ ءبىزدى قاتتى قامىقتىرعان ەدى. بۇگىن مەيىر باعىشتاعان مەكەمە جانە كاسىپورىندار ۇلىما 2 مىڭ 500 يۋان كومەك قاراجات بەردى، بۇل از اقشا ەمەس، ءبىزدى ءبىرتالاي ۋايىمنان ارىلتتى. پارتيا مەن ۇكىمەتتىڭ قامقورلىعىنا راقىمەت، مەملەكەتىمىزدىڭ كۇننەن – كۇنگە قۇدىرەتتەنۋىنە تىلەۋلەستىك بىلدىرەمىز» - دەدى 43 جاستاعى امينا تۇرسىن اسا اسەرلەنگەن بەينەدە. امينانىڭ ۇلى ابدۇللا ابدىكەرىم بىلاي دەدى : «شەشەمنىڭ جوعارى قان قىسىم اۋرۋى جانە اۋىر دارەجەدەگى قان ازدىق ناۋقاسى بار، ءار ايدا 400 يۋاندىق ءدارى ىشەدى، ءىنىم ورتالاۋ مەكتەپتە وقيدى، 5 جاستاعى قارىنداسىمنىڭ تۋما جۇرەك اۋرۋى بار، وتباسىمىزداعى ءبارىمىز اكەمنىڭ جۇمىس ىستەپ تاپقان اقشاسىنا سۇيەنەمىز. وتباسىمىزدىڭ ەكونوميكالىق اۋىرتپالىعىن جەڭىلدەتۋ ءۇشىن جوعارى مەكتەپ ەمتيحانى اياقتاعان سوڭ اكەممەن بىرگە قۇرىلىس ورىندارىنا بارىپ جۇمىس ىستەپ، ءبىر مىڭ 500 يۋان اقشا تاپتىم، شەشەمە سول اقشامنان 500 يۋان بەرۋدى ويلاپ ءجۇر ەدىم، قازىر 2 مىڭ 500 يۋان كومەك قاراجاتتى تاپسىرىپ الىپ، اسا قۋانىپ وتىرمىن. بۇل اقشانى ءوز ورنىنا ىستەتىپ، جاڭا ءبىلىم جانە تەحنيكا - ونەر تەتىگىن يگەرىپ، ءبىلىم دەڭگەيىمدى جوعارىلاتامىن».

جاۋاپتى رەداكتور: گۇلدەن ماقسات قىزى