وبلىستىڭ ءتورت باسشىلىق القاسىنىڭ باسشىلارى وقىتۋشىلار مەرەكەسىنە تاماشا تىلەك ارناپ، حال سۇراۋ قيمىلىن ورىستەتتى

  • كەلۋ قاينارى: ىلە گازەتى
  • 04:17:01 11/09/2019

   

    تىلشىلەرىمىز جاڭ جينفىڭ، شيە چىن، پاتيما، لي يافىڭ حابارلايدى. وقىتۋشى – ادام جانىنىڭ ينجەنەرى. 35 – رەتكى وقىتۋشىلار مەرەكەسى قارساڭىندا 9 – ايدىڭ 9 – كۇنى وبلىستىڭ ءتورت باسشىلىق القاسىنىڭ باسشىلارى 4 حال سۇراۋ گرۋپپاسىنا ءبولىنىپ، قۇلجا قالاسى، قۇلجا اۋدانى، چاپچال سىبە اۆتونوميالى اۋدانى سياقتى جەرلەرگە بارىپ، حال سۇراۋ قيمىلىن ورىستەتىپ، وقىتۋشىلارعا گۇل سيلاپ جانە مەرەكەلىك تىلەك جەتكىزدى.

    قۇلجا قالاسىندا وبلىستىق پارتكومنىڭ ورىنباسار شۋجيى، وبلىس باستىعى قۇرماش سىرجان ۇلى، وبلىستىق حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى سۇن پىڭ قاتارلىلاردان ۇيىمداسقان حال سۇراۋ گرۋپپاسىنداعىلار ۇزدىك حالىق وقىتۋشىلارىنان شىنايى حال سۇرادى.

    قۇلجا قالاسى كاڭنيڭ جيايۋان تۇرعىندار رايونىنداعى جاڭ اييىڭنىڭ ۇيىندە حال سۇراۋ گرۋپپاسىنداعىلار شينجياڭعا كومەككە كەلگەن وقىتۋشى جاڭ اييىڭمەن بۇكپەسىز اڭگىمەلەستى. 2018 – جىلى 8 – ايدا جاڭ اييىڭ نانجيڭ جياڭبەي جاڭا رايونىنداعى 61 – باستاۋىش مەكتەپتەن قۇلجا قالالىق 26 – ورتا مەكتەپتىڭ باستاۋىش مەكتەپ بولىمىنە كومەككە كەلەدى. شينجياڭعا باعىتتامالى كومەكتەسۋ بويىنشا وقۋ – اعارتۋ ىسىنە كومەككە كەلگەننەن بەرى، ول وقىتۋشىلاردى وقىتۋدى زەرتتەۋ قىزمەتىن ورىستەتۋگە باستاپ، «بەينەلەۋدى كوزدەگەن كىتاپ وقۋ - وقىتۋىن» تۇراقتاندىرىپ، ادەبيەت ساباعىنىڭ ەرەكشەلىگىن كورنەكتىلەندىرىپ، وقىتۋشى – وقۋشىلاردىڭ قىزۋ قارسى الۋىنا بولەندى.

    قۇرماش سىرجان ۇلى شىن ىقىلاسپەن ونىڭ جاعدايىن ۇعىسىپ، تۇرمىسىندا قيىنشىلىق بار – جوقتىعىن، مەكتەپتىڭ جاعدايىن جانە بيىلعى وسى مەكتەپتىڭ تۇڭعىش رەتكى ورتا مەكتەپ ەمتيحانى جاعدايىن ەگجەي – تەگجەيلى ۇعىستى. جاڭ اييىڭ بىلاي دەدى: ىلە حالقىنىڭ ىستىق ىقىلاسى مەن قويۋ سۇيىسپەنشىلىگىنە بولەنىپ كەلەمىن، ءبىر جىلدان استام ۋاقىتتا ىلەگە تەرەڭ سۇيىسپەنشىلىك ورناتتىم.

    قۇرماش سىرجان ۇلى بىلاي دەدى: جاڭ اييىڭ مۇعالىم وتباسى مۇددەسىن قايىرىپ قويىپ كوپشىلىككە نانجيڭنىڭ وزىق وقىتۋ تانىمىن الا كەلدى، وقىتۋدى زەرتتەۋ، وقۋ - وقىتۋ جاعىندا دا ۇلگى كورسەتۋ، جەتەكشىلىك ەتۋ رولىن ساۋلەلەندىردى. ونىڭ وقۋ – اعارتۋ ىستەرىن ۇزدىكسىز دامىتىپ، قۇندى تاجىريبە جەتكىزىپ، ونەگە كورسەتىپ، ىشكى ولكەلەردەگى وزىق وقىتۋ كوزقاراسىن ءتىپتى دە كوپ وقىتۋشىعا جەتكىزۋىن ءۇمىت ەتەمىن.

    سۇڭ شياۋيىڭ – ىلە وبلىسىندا ساڭىراۋ بالالارعا ءتىل جاتتىقتىرۋىن جۇرگىزگەن تۇڭعىش وقىتۋشى، ول ءتۇرلى قيىنىشىلىق پەن قىسىمعا توتەپ بەرىپ، 1992 – جىلى 3 – ايدا قۇلجا قالاسىندا حالىق ىستەرى بويىنشا ساڭىراۋ بالالار ءتىل جاتتىعۋ كۋرسىن اشىپ، قۇلجا قالاسىندا ساڭىرۋ بالالاردى ءتىل جاتتىقتىرىپ قالپىنا كەلتىرۋ تاربيەسى بولماۋ تاريحىن اياقتاتتى. 30 جىلعا جۋىق ۋاقىتتان بەرى ول جاستىق كوكتەمىن ەرەكشە وقۋ – اعارتۋ ىستەرىنە ارنادى.

جاۋاپتى رەداكتور: گۇلدەن ماقسات قىزى