باسكەتبولعا قىزىعۋ دا ءبىر باقىت

  • كەلۋ قاينارى: ىلە گازەتى
  • 03:30:45 12/09/2019

  

  ياۋ ميڭ

    سپورت - قوعامنىڭ دامۋىن كورسەتىپ بەرەتىن اينا، ٴبىزدىڭ باسكەتبول ىستەرىمىزدىڭ ۇزدىكسىز ەڭسە كوتەرۋىنىڭ كۇشتى تىرەگى بولىپ ۇلى جاڭا جۇڭگو تۇر.

    باسكەتبولعا قىزىعۋ دا ءبىر باقىت. مەن وسى باقىتتى ٴتىپتى دە كوپ ادامدارعا سيلاپ، جۇڭگو باسكەتبولىن وتانىمىزدىڭ العا باسۋ قادامىمەن تەڭ ىلگەرىلەپ، نەعۇرلىم الىسقا، ساليقالى ساپار شەگۋىن ٴۇمىت ەتەمىن.

    باسكەتبولعا قىزىعۋ دا ءبىر باقىت.

    كۇندەرىمدى قارشادايىمنان شاڭحايداعى سپورت سارايىندا وتىكىزدىم. اكە – شەشەم كاسىپتىك باسكەتبولشى بولدى، بىزبەن ٴبىر عيماراتتا تۇراتىن اعا، تاتەلەرىم دە سپورتپەن اينالىساتىن. بالا دوستارىم دا سپورتشى وتباسىنىڭ بالالارى بولاتىن. مۇنداي تۇرمىس ورتاسى مەنى سپورتتى تەرەڭ تانۋعا جانە ونى سۇيۋگە بەيىمدەدى. اينالامىزداعى ۇلكەندەر دە ماعان ۇنەمى اكە – شەشەمنىڭ باسكەتبول الاڭىنداعى اڭگىمەلەرىن ايتىپ بەرەتىن. ولاردىڭ جارىس الاڭىنداعى ارەكەتتەرى، جەڭىسكە جەتىپ، داڭققا قول جەتكىزگەن كورىنىستەرى سانامدا سايراپ تۇراتىن – دى. بالا ءۇشىن ءوز اتا – اناسىنىڭ تابىسىن داڭق ساناۋى تابيعي، بۇل مەنىڭ باسكەتبولعا دەگەن اۋەسىم مەن قۇشتارلىعىمدى تاسقىنداتتى. سولاردىڭ جولىمەن باسكەتبول جارىسىندا تابىسقا جەتىپ، ماقتانىشتارىنا اينالعىم كەلدى.

    مەنى العاش كورگەندە ەلدىڭ ءبارى بويىما قاراپ باسكەتبولعا لايىق جارالعان ادام دەپ ويلايتىنى داۋسىز. ٴبىراق مەن تالانتتىڭ تابىسقا دالەل بولا بەرمەيتىنىن قارشاداي كەزىمنەن انىق سەزىندىم. باستاۋىش مەكتەپتىڭ ٴبىر رەتكى دەنە تاربيە جارىسىندا مەكتەپ باسكەتبول جارىسىن ۇيىمداستىردى. ساباقتاستار مەنىڭ سورايعان بويىما جانە باسكەتبولشىلار وتباسىندا دۇنيەگە كەلگەنىمە بولا مەنى جارىسقا قاتىناسۋعا كورسەتتى ءارى كلاسقا داڭق اپەرەدى دەپ سەندى. مەن سوندا بويشاڭدىعىممەن قوسا اتا – انامنان دارىعان سپورتتىق اۋەستىگىم تۇرعاندا ەشقانداي ماسەلە جوق دەپ ويلاعان ەدىم. سول كۇنگى جارىستا ويلاماعان جەردەن گارعا تاستاعان ەكى دوبىم دا بۇكىلدەي دالاعا كەتپەسى بارما، بۇدان ءبىرتالايعا دەيىن كوڭىلسىز بولىپ ءجۇردىم. مۇنى ءالى كۇنگە دەيىن ۇمىتا المايمىن. ويتكەنى سول كۇنگى جاعداي ماعان باسەكەلىك سپورتتا تەك تالانت پەن گەنگە عانا سۇيەنۋگە بولمايتىنىن، جاقسى ناتيجەگە قول جەتكىزۋ ءۇشىن تاعى تاباندى قۇلشىنىسقا سۇيەنۋ كەرەك ەكەنىن ۇعىندىردى.

    سونىمەن باسكەتبولعا شىنايى كىرىسكەننەن باستاپ جالىقپاي جاتتىعۋ، شىنايى شىنىعۋ، تاماشا ناتيجە جاراتۋ مەنىڭ باستان – اياق قۇلشىنىس نىساناما اينالدى. مەن وتە تالەيلىمىن، كوپتەگەن ادامداردىڭ قولداۋىن، كومەگىن كوردىم، شاڭحاي قۇراماسىنان مەملەكەتتىك كومانداعا كىردىم. مەملەكەتتىك كومانداعا كىرۋ سپورتتىق ومىرىمدەگى ءبىر ەلەۋلى ۋاقيعا بولدى. بۇل تابىسىم – قابىلەتىمنىڭ مويىندالۋى عانا ەمەس، ماڭىزدىسى مەملەكەت مارتەبەسىن اسقاقتاتۋعا بولاتىن داڭق سەزىمى ەدى. سول سەبەپتى ءوزىمنىڭ مەملەكەت كومانداسىنا قابىلدانعانىمدى بىلگەندەگى اسەرىمدە شەك بولعان جوق.

جاۋاپتى رەداكتور: جازيرا بولاتباي قىزى